Read Khiamniungan Naga 1 Peter 2 Bible Online

1 Peter 2 - Khiamniungan Naga bible

1 Peter 2

¹Naito tsümeikün, atsüotsüdekün, akausai, aluau tsüaiukün, tsüdekünai amongkia-etsün ngio chikü asamüh asam chija lüwanan.

²Nionyaothso nouso nyao nou letsün khekkü, asaichi Onthso nyao thaiutha lekü lünoi, naito nung shiutsün tsangkü asam sunge naiuso kipsane.

³Asiongio nou ngioji, “Asamüh APAOU titi atsüojinyang noin nung asam chija epsaniu.”

⁴Khaiunia nou atheau tsünoi ta wanan lüko Goa nou chaiou ta chosantsün, aa lung nou APAOU dongai ashi.

⁵Aa lung nousoli ashi, naiuso asam chija Onthso amkham tsam lahtsün nai atheau lüiula, nungai asio E-po nousoühli asamüh Yisu Khrista tsangkü Goa hau aluau lümeikü aa chaithio naiuso Onthso chaithio lüthio.

⁶Tititenai Asiongio nou ngioji, “Ngü chaiouting lung tsak chosaniu, Zion nai tsamnuo lung kheam tsak taiuji; naiuso sauüh apa da monglame apa tsümiami-e.”

⁷Nungtiphe asam amonglamhoi thaiutha nung chaiouting lung noin, lüko tsümonglamkünso thaiutha: “Tsamlah haiüh sübao Lung atheau tsünoikü wanan, nung tsamnuo nai apem chiko atengting Lung au iulan.”

⁸Naiuso loüh Asiongio tsak ko ngioji, “Nung Lung nou khaiuniahoi thekkate, nung Lung nou ngüso loian-i-e.” Ngüso khia-an tiautenai Goa mongthat nung noin ta ngüsoüh Goa ngio nai tsümonglam.

⁹Lüko asam achosantsün kau noin, nokpao ün e-po nouso, asio mele, Goa ün khaiunia, Goa athanga chhi nouso thipengkiuau chosan, apaüh asam anyakhem ainou meshen athanga awon nai jonsan.

¹⁰Ataojam asam Goa ün khaiuniahoi tsüdekü noiküla, lüko lo asam apa khaiuniahoi noin, ataojam asamüh Goa ün atsüojinyang tsüngekü noiküla, lüko lo asamüh apa atsüojinyang epiu.

¹¹Deisinioso, sam nung goumchi ko mesanhoi naiuso pan noin! Shesinyih achinek tisübao onthso thako ehli-etsün noin nungko pungekü lünoi ta ngü asam tü kojaji.

¹²Goa tsüngekünso ongko nai asam saisile amei kankeiküta, tilai ngüsoüh tsümeikü chhitsünsoli asam lotsao-e, nungai ngüsoüh asam chhi amei nouso ngesane naiuso apa shitsün ajekhaiu nai Goa nian lome.

¹³Asamüh APAOU nianko khaiunia ngiokhem chikü khemai lünoi, nungti nokpao tü apa chikü khako akhengting ta,

¹⁴naiuso nokshingpao nouso tü chhi tsümeikü chhitsünso lohatau naiuso chhi amei chhitsünso nianlomau thaiutha APAOU nou hong ta angio angkü lüthe.

¹⁵Tititenai Goa nou asam amei chhitsün tsangkü aiu nouso tsümeikü chitetsün losangau mongchioji.

¹⁶Asam khaiuniatsüoli tsümeikün lopokau tsükowekü Goa ün sua nousoli lünoi.

¹⁷Khaiunia chikü tü asu lühat, deisinioso lütsüojin. Goa lun lühat, nokpao tü asu lühat.

¹⁸Asam tsamki nouso, asamüh tsampao nouso hao asuhat lükiu naiuso ngüso khemai lünoi mongmei nouso khakolu tsüde, lüko mongthe nouso tü lüko angio angkü lünoi.

¹⁹Tiautenai apaüh amongchiotsün epau thaiutha tsütinkün angja omhe jeilu naito, nung thaiutha Goa nou asam ouk kiu-e.

²⁰Tititenai asamüh tilai phiowanji, naiuso nung thaiutha ashiuhtsün epji, nung jeilu nai ti nianlom eppe? Lüko tilai asamüh meikü chhiküta nung thaiutha angja epji, nung jeilu nai Goa nou oukkiu-e.

²¹Tititenai nung thaiutha asam jon, naiuso apa hokngam nai hoilutau Khrista lüko asam thaiutha athatluau tsak taiukiu.

²²Apaüh angei titso tsüchhi, tsüdekünai apa son ai atsüotsüdekü nou titso tsüep.

²³Tilai apa lochi apaüh laokü tsükiushi, tilai apa angja, apaüh tsülohat; lüko ngiotsüo Goa, Mikhemtsün hau apa chija thumkü kiuwan.

²⁴Angei nai eküta ashio nai kih-ao thaiutha Khristaüh meshen chija paiphu nai sam angei kan. Apa tü shiuhtsün mou nou tsangkü sam lomei.

²⁵Yam phiowankü khutsün onnemok hoili asam noiküla, lüko loto asam onnemok jimtsün naiuso onthso jimtsün tü hoilutau kankü shikü noin.