Read Khiamniungan Naga 1 Peter 3 Bible Online

1 Peter 3 - Khiamniungan Naga bible

1 Peter 3

¹Nungtilu asam tsammongnyiu nouso asamüh tsammongpo nouso hau thumkü kiuau noin, ngüso ajantsoüh Goa ngio da tsümonglamkünai, asam saisile tsangkü ngüsoüh monglamau shiolo-e. Nungai asam thaiutha ngio nou ngioau poukü tsünoi-e,

²tiautenai ngüsoüh asam saisile titi ayanthsüo naiuso asuhat noin nung eppe.

³Asamüh asam alengmeiau khaiuo achiai lomeitsün, tsüdekünai chaiou si neshe thotsün nou tsütheau noin.

⁴Lüko akhei ai mongpem nai, amongmei naiuso athatsam onthso amowanau tsüshiokü nou sheitho lüthe, nung Goa khako chaiouting noin.

⁵Tititenai kümi nyiuhai sauhaiüh mongyang Goa hau thumkü kiu, ngüsoüh ngüso chija meshen tsammongpo nouso hau thumkü kiutsün tsangkü ngüso shisileng meikü iula-in.

⁶Nungli Saraüh Abraham tü APAOU ta jonkü angio ang, asamüh ti ahat tsünoikü meikü chhi naito lo asam apa thso menyiuthso nouso noin.

⁷Nunglilu asam tsammongpo nousoüh tsammongnyiu nouso outsükong nou ngekü ngüsoko ajeiai nai noiau noin. Ngüso da asuhatkü lükankei, tiautenai ngüsoüh lüko Goa ün aa paopei asamko aikü eppe. Nungti lüchhi, naito asam misao tiühtso tsütumshi-e.

⁸Athon nai asam chikü mong tsak, mongai kiakü yangtsün, deisionioli tsüojinetsün, mongnyan naiuso amongmei mong lüthe.

⁹Tsümeikün liko tsümeikü tsükiukü, naiuso alochitsün liko tsülochikü, oukbao lü-ouk kiu, tititenai ouk tengkam kamao thaiuthabao asam jon.

¹⁰Asiongio nou ngiotsünli, “Sauüh aakih monglingkü aiuji, naiuso ajekhaiu amei eppau aiuji, tsümeikü singiotsün, naiuso atsüotsüdekü chitetsün ainou laoluau noin.

¹¹Apa tsümeikü ainou phoklekü amei lüchhi; apa mongpem apemüh aalu thaiutha lüyam.

¹²Tititenai APAOU nou asiohoi tü jiokü ngüso misao tü angji; lüko apa tsümeikü chhitsünso thako noin.”

¹³Asam amei chhiao mongchiokü noi naito, asam angja-iau sau noin?

¹⁴Lüko asio nou thaiutha asam angja au noinaito, asam thaiumei. Ngüso lon lahat, tsüdekünai mong lalothe.

¹⁵Lüko APAOU Khrista da asam mongai asuhatkü naiuso losiokü lütaiu, naiuso asam ayangtaiu noitsün thaiutha khaiunia sauüh sangji apa tü thalaao asaita asam khemlokü lünoi.

¹⁶Nung amongmei nai naiuso asuhat nai lüchhi. Asam mongyang awonkü lütaiu, Khrista sahoili asam saisile amei naito tilai asam lochi-e sauhaiüh lutsaoji ngüsoüh ti ngiom nungüh ngüsolu miame.

¹⁷Nung Goa mongchio naito, chhi tsümeikün thaiutha angjatsün koto, chhi amei thaiutha angja naibao chen.

¹⁸Tititenai asam Goa dongai niaao thaiutha, tsüsiokü nouso liko asio nou, nungti Khrista lüko asaichi thaiutha jam angei nouso thaiutha angja. Apa nyih nai ean-in lüko onthso nai aa iula-in,

¹⁹naiuso apa Onthso nai khouthiokü noitsünso onthso dongai khukü chim.

²⁰Nungti sauhai kümi Noa ajekhaiu nai kheng shantsün taoko, Goa nou laiukü jeilukü taiukü noi nai, Goa ngiongem tsü-ang. Khaiunia mepem petjei khiam ainou kipsan.

²¹Nung sübao nou lo asam kipsanji, nung khiamai limtsün athat hantsün noin. Nungto sam pemai noitsün miah tsaowantsün tsüde, lüko mongpem amei ainou Goa tü athalutsün tsak noin. Nung ahkü shitsün Yisu Khristaüh asam kipsanji.

²²Apa aün ai sungkü honghoi nouso naiuso ayathsüotsünso, naiuso oukong nouso chiai nokshingkü apa uai noin.