Read Khiamniungan Naga 1 Peter 4 Bible Online

1 Peter 4 - Khiamniungan Naga bible

1 Peter 4

¹Khrista shesinyih nai angjaphe, apaüh yangtaiutsünli asamüh lüko asam chija lomongloau noin; tiautenai sauhai shesinyih nai angjaji ngüso loto angei nai tsühashiji.

²Naito loyakü, asam aakihlaiu apoitaiu nouso shesinyih achinektsün tsangkü tsüde, lüko Goa mongchiotsün mongko noiau noin.

³Tititenai abülom, achinek, thengshiutsün, alunyai-etsün, ehethaikhan naiuso achinyan sotsom amkhamtsün nungso apemai asamüh tsakeikü, Goa tsüngekünsoüh chhitsünli chhikü atao laiukü wankü shin.

⁴Naiuso loto asam Goa tsüngekünso ko aikü abülom nai tsütsakeishiphe, ngüsoüh ngalakü asam thaiutha tsümeikü chiteji.

⁵Lüko sau aa naiuso ee nouso tü mikhemau khemlokü noin, nung Goa hau ngüsoüh meshenüh chhitaiutsün kiu-e.

⁶Nungshioko Ngem Amei nou eanhai tü lüko chimiu, khaiunia pungkü mikhemtsünli ngüso tü lüko shesinyih aa nai mikhem, nungti Onthso kihtsün nai ngüso Goali noiau ngüso tü lüko chim.

⁷Alum thaiutha athon shimkü shiji; nungtiphe asam misaoao shiokü hao tsüokü naiuso tsamlokü lünoi.

⁸Apem chiko asam ongko atsüojine lünoi; tititenai atsüojin nou angei piakü lomokiuji.

⁹Tsünamnamkü mesanhai tü lüpaotsang.

¹⁰Khaiunia pungkü nou Goa paopei lotsünli, nungüh Goa ainou eptsün khekkü haisihai ne lühachu-e.

¹¹Alumai Yisu Khrista nai ajinka-iau thaiutha, ajantsoüh ngio chitenai, Goa ngio nousoli lüchite, ajantsoüh yathsüo nai Goa oukongli lüyathsüo, tititenai Yisu Khrista ün ajinka naiuso ayathsüotsün athontsüyangkü noin. Amen.

¹²Atsüojin haiso, nung khako asam tü tsüthawaokün tsotsakli, asam tü akia sungkü lilunai asam lalekkat.

¹³Lüko Khrista ün angja janelutsün asam tichantso noin, apa ajinka tsangsheikü sungnai asam thsüokü amongling nou monglingau shiotsün lektso lümongling.

¹⁴Khrista nian thaiutha asam luchi nai, asam thaiumei, tititenai ajinka naiuso Goa Onthso asam da noin.

¹⁵Asam ongko ajantso angja nai, apa aluattsün, kau tsak, chhi tsümeikü chhitsün, tsüdekünai amaohai chhi nai angjakiutsün khaiunia tsak khekkü to tsüangja ao noin.

¹⁶Lüko amonglamhoili khaiunia tsak angja nai, apaüh nung nianko tsümiamkü Goa hau ajinka lükiu.

¹⁷Mikhem yaloau thaiutha atao shikü noin, naiuso nung ayating nai Goa ün khaiuniahoi mikheme. Nung sam amonglamtsünso tü yalonaito, Goa ainou Ngem Amei tü tsümonglamkünso ta nung titi thone?

¹⁸Asiongio nou ngiotsünli, “Asiohoi jeikülu kipsan naito, Goa tsüngekün naiuso angeihoi nouso tiau iula-e?”

¹⁹Nungtiphe sauhai Goa nou mongchiotsünli angjaji, ngüsoüh amei chhitsün nai, Ashantsün sauüh apa athalu taiuji apa da monglamtsün nai meshen thumkü lükiu.