Read Khiamniungan Naga 1 Peter 5 Bible Online

1 Peter 5 - Khiamniungan Naga bible

1 Peter 5

¹Ngo, jüpem petche tsak nou, asam ongko donthe nai petche nouso tü kojaji. Khrista omhetsün thaiutha ngo mitha noin, naiuso tsangsheikü sungau noitsün ajinka nai ngo haoson the-e.

²Goa nou asam hau Onnemok hoi jimau kiutsün ko, Apaüh asam hau chhi-iau aiutsünli, tsümongchiokü tsüde, lüko mongchiokü paotsangau, ngo asam tü kojaji. Amai thaiuthalu tsüde, lüko atsüoting amongchio nou yathsüoau mongchiosankü asamüh lüchhi.

³Asam hau paotsang-iau kiutsün onnemok hoi nouso khako APAOU tsü-iulakü, lüko onnemok hoi nouso khako athatluau lü-iula.

⁴Naiuso tilai Onnemok jimtsün Asong nou tsangsheikü sunge, asamüh tilaitso sappankü tsükhukü nou ajinka kandio eppe.

⁵Nungli asam oum nouso, petche nouso khemai lünoi. Naiuso asam apemüh meshen chija hai nou hai yathsüoau amongmei sheitho lütholu; tititenai Asiongio nou ngioji, “Goa nou abülom nouso kiapji, lüko amongmei nouso hau atsüojin hanji.”

⁶Nungtiphe, Goa pha oukong khemai asam henkü lü-iula, naito apaüh apa atao tongtü nouko nai asam lotsok kiu-e.

⁷Asam ayangelattsün thsale chikü apa da lüleluttan, tiautenai apaüh asam thaiutha paotsangkiuji.

⁸Thsümonkü, tsüokü lünoi! Asam eh, Biya nou, khaiunia ajantso heau eppemo ta thapkü, chongkhaoli ngaokü lemkü tsakeiji.

⁹Asam amonglam nai mongkü lüthe küta apa lükiapjei, tiautenai nung goumchi apemai amonglam deisiniohoi apem wekülu angja yankü khukü noin ta asamüh ngen.

¹⁰Lüko asam sakhalektso thaiutha omhekütün phiai, atsüojin nou miankü noitsün Goa, sauüh asam Khristako athontsüyangkün ajeiai ajinka haoson nai haau jon, apaüh asam thapemkiu-e naiuso asam hau amongtsün, oukong, naiuso atsüoting athanya nou kiu-e.

¹¹Apa tü athontsüyang oukong lüthe! Amen.

¹²Ngo nung thsamsat asam dongai sattsün ngü vesankü noitsün amonglam Khristan deisinio Sila ahachu lokü satji. Goa ün ngiotsüo atsüojin nou miankü noin ta jü mitha nou ngo asam lutsüoau aiuji. Asam nungko mongkü lütsa.

¹³Asamko aikü Babilon nai noitsün donthe, naiuso Goa nou chosantsünsoüh naiuso jüthso Marküh asam hau salam hongji.

¹⁴Khristan atsüojin soncheppetsün nou tsaküh tsak ko salam lükiu-e. Asam sauhai Khrista ün hoi noin nungso chikü ko aalu lünoi.