Read Khiamniungan Naga 2 Peter 3 Bible Online

2 Peter 3 - Khiamniungan Naga bible

2 Peter 3

¹Atsüojin haiso, ngü nung thsamsat müjam nou asam dongai satji. Nung thsamsat nemtso ko asam mongyang sanglingkü lothsümonao thaiutha noin.

²Asio Goa e-pohoi nou chitetsün ngio nouso naiuso Akipsantsün APAOU nou thoiluttsün nung hongthonhoi tsangkü chitetsün asamüh asangling mongyang nou yangsanao thaiutha ngü asam lotsüokiuji.

³Athon ajekhaiu nai alochikiutsünhoi nou lochikü shi-e ta ngekü lünoi. Ngüso meshen achinek nai,

⁴“APAOU shi-e ta thalo, apaüh tsüthalo süne? Apa tiai noin? ta sangkü tsakei-e. Sam paosiposo eanio, lüko goumchi apung anyim ainou losaokü alum nunglu noin!”

⁵Tititenai maou nouso kümi ainou naiuso goumchi nou khiam ainou khiam tsangkü shantsün Goa ngio nou noiküla, nung ngüsoüh beyanji,

⁶naiuso nung akeng goumchi khiam nou limmatkü mowan.

⁷Lüko tsüsiokün khaiunia nouso mikhemao naiuso amowanao ajekhaiu mosaokün lektso nung Goa ngio nou yangjeikü taim. Lo noitsün goumchi naiuso maou nouso lüko lotheanao Goa tsüngekün khaiuniaso da taiukü noin.

⁸Lüko atsüojintsünso, APAOU khako ajekhaiu tsak nou pon heng tsakli, naiuso pon heng tsak nou ajekhaiu tsakli noin, nung ngio nou asamüh labeyan.

⁹Ajantsoüh apa athaloutsün thaiutha tsangküli yangji, APAOU nou apa athalo thaiutha tsütsangji, apaüh sau lüko mowan-iao tsü-aiu, lüko chikü angei ainou mong phokle-iao aiukü asam thaiutha apaüh alaiukü jeiluji.

¹⁰Lüko kao tsak shitsünli APAOU ajekhaiu shi-e. Nung ajekhaiu nai maou nouso ngaokü ngemkü soikü khuwane, naiuso maou nai noinso chethean-e naiuso nyoman-e, goumchi naiuso nungai noitsün apem mowane.

¹¹Nungti nungso chikü mowanao noiphe asam titi nou khaiunia the-ela? Asam aa asio naiuso Goa hao thumkü kiutsün theao noin.

¹²Nung APAOU Ajekhaiu ta taiukü naiuso thatü yangkü shakta shi-ikü, nungüh aün naiuso nungai noitsün chikü lotheane naiuso ajek nou khiamkü khuwane.

¹³Lüko samüh Goa nou ti thalutaiu: ayan aün nok tsak naiuso ayan goumchi tsak tiai asiohoi nouso tsam noi-e nungtü taiuji.

¹⁴Nungtiphe jühaiso, asamüh nung Ajekhaiu ta taiutsün ko asam apa khako alengsat naiuso aphio tsülepkü iulakü, naiuso apako asam nokmei nai eppiao thaiutha lükowe.

¹⁵Sam APAOU üh laiukü jeilutsün nung asam aasan thaiutha ta lüyang, nungti sam atsüojin deisinio Paulüh lüko apa hau kiutsün mongyangli asam dongai sat.

¹⁶Tilai apaüh nung thaiutha thsamsat satji, apa thsamsat chikü nai nungti ngioji. Tsüngekün, naiuso mongtsükongkün khaiunia nousoüh phiokü chiteau apa thsamsat nouko achek ajantso noin, nungli ngüsoüh amao Asiongioli chiteji. Nungtiphe ngüsoüh meshen chiai ngüso chija alothe kanjikanji.

¹⁷Lüko asam jühaimeiso, asamüh nung ngekü noin. Achija tsüokü lünoi, naito asam ngiokhem lothetsün Aphio khaiunia nouso hao lanialükhun-i naiuso mongkü noitsün ainou tsüsaliao lütsüolu.

¹⁸Lüko sam APAOU nian Aasantsün Yisu Khrista atsüojin naiuso angetsün nai lüsong. Lo naiuso athontsüyangkü apa tü ajinka lünoi! Amen.