Read Khiamniungan Naga 1 Yohan 2 Bible Online

1 Yohan 2 - Khiamniungan Naga bible

1 Yohan 2

¹Jü thsoso, asamüh angei tsükankeiau thaiutha, ngo nung asam dongai satji; lüko khaiunia ajantsoüh angei kankei nai, sam liko po nou tü sangkiutsün asio tsak nou Yisu Khrista samüh taim.

²Naiuso Khrista apa pem sam angei thaiutha aasan chaithio noin; naiuso sam angei thaiuthalu tsüde, lüko goumchi apem angei thaiutha noin.

³Samüh apa ngiokhem nouso kankei naito, samüh apa ngeji ta monglamji.

⁴Samüh apa ngen ta ngio naito, lüko apa ngiokhem nouso tsükankeinai, sam atsüotsüde, naiuso sam da ngiotsüo tsünoi.

⁵Lüko samüh apa ngio angnaito, sam da Goa atsüojin atsüoting thapung-iu. Nungti Goa ko sam ajeiai noin ta nung tsangkü samüh ngen:

⁶Sam apa da ajeiai noin ta samüh ngionai, sam apa titi tsakei, nungti tsakei au noin.

⁷Atsüojintsünso, nung ngü asam dongai sattsün athoilut ayan tsüde, lüko ayating ainou asamüh ti ep, nung akeng athoiluttsün satji. Nung akeng athoilut asamüh ti ngio lula nung lu noin.

⁸Külüko athoilut sübao ngo lo asam dongai satji; nungto Athoilut ayan noin, tititenai nung ngiotsüo Khrista naiuso asam da epji. Anyakhem nou yanlükhunji, naiuso atsüoting awon nou jeeji.

⁹Samüh sam awon nai noin ta ngionai, lüko meshen deisinio chinyannai sam losaokü anyakhem nai noin.

¹⁰Samüh deisinio tsüojinnai, sam awon nai noiji, naiuso sam da amaohai thekkatau ti tsünoi.

¹¹Lüko samüh deisinio chinyannai, sam anyakhem nai noin, naiuso anyakhem nai tsakeiji, naiuso sam tiai khuji nung tsünge, tiautenai anyakhem nou sam niopek iula-i-iu.

¹²Methsoso, Khrista nianko asam hau angei wankiuphe, ngü asam dongai satji.

¹³Po nouso, sau ayating ainou noikü shin, asamüh apa ngephe ngü asam dongai satji. Oum hoiso, asamüh Tsümeikün shiolophe, ngü asam dongai satji.

¹⁴Po nouso, sau ayating ainou noin, asamüh apa ngephe ngü asam dongai satji. Oum hoiso, asam oukong naiuso Goa ngio asam da noikü, asamüh Tsümeikün shiophe, ngü asam dongai satji.

¹⁵Asamüh goumchi tsüdekünai nungko noitsün jengtsaiu nouso latsüojin. Asamüh goumchi tsüojin naito, Po nou da tsüojintsün asam da tsünoi.

¹⁶Tititenai goumchi nyih achinek, niovei nou chinekkü thaptsün, naiuso abülom, goumchi ko noitsün nungso apem Po ainou tsüde, lüko goumchi ainou noin.

¹⁷Goumchi naiuso nungko noitsün alum khaiunia nou chinektsün yanlükhunji lüko sauüh Goa nou mongchiotsün chhiji, athontsüyangkü noi-e.

¹⁸Methsoso, athon shimkü noin! Sam Khrista ün eh shiji ta asamüh lulatsünli, lo Khrista eh nouso piakü sungiu; nungüh athon atao shisaoji ta samüh ngeji.

¹⁹Nung khaiunia nouso sam ün ajeiai nai tsüha, nungtiphe ngüso sam ainou khuwan. Ngüso samko hakü noitünto, samko losaokü noi-ela. Lüko ngüso tsaktso sam ongko tsüha naiuso atsüoting sam ün tsüde ta tsangsheiao ngüso khuwan.

²⁰Lüko asam Khristaüh Asio Onthso nai tsomkiu naiuso nungti asam chikü nou nung ngiotsüo ngen.

²¹Asamüh ngiotsüo tsünge ta ngü asam dongai tsüsat, lüko asamüh ngiotsüo ainou atsüotsüdekün titso tsüsungji ta nge nou shiko ngü satiu.

²²Naito, atsüotsüdekün sau noin? Nung khaiunia sauüh Yisu to Messia tsüde ta ngioji nungso noin. Nungtin khaiunia to Khrista eh noin, ngüsoüh Po naiuso Thso nemtso tsüloji.

²³Sauüh Thso tsüthaloji, apaüh Po lüko tsüthaloji. Sauüh Thso thaloji, Po nou lüko thaloji.

²⁴Asam to aya ainou ti lula, nung asam da noin ta lümonglam. Nung aya ainou lulatsün asam da noi naito, Thso naiuso Po nou da lüko asam noi-e.

²⁵Athontsüyangkün aa nung Khrista pemüh thalotsün noin.

²⁶Sauhaiüh asam atsüotsüdekünai niaau aiuji, ngüso thaiutha nungso ngio ngü asam dongai satiu.

²⁷Lüko asam thaiutha to, Khristaüh apa Onthso asam da kheplutkiu-iu. Apa Onthso asamko noitsün lektsoto asam tü chimau amao sau pohkü tsünoi. Tititenai Apa Onthsoüh alum thaiutha asam tü chimji, naiuso apaüh ti chimji nung aphio tsüde, ngiotsüo noin. Onthso nou chimtsün angio lü-ang, naiuso Khrista ko jeiaikü lünoi.

²⁸Ah, Jü thsoso, apako ajeiai nai lünoi, naito tilai apa shi-e asam amongling nou miankü noi-e, naiuso apa shitsün Ajekhaiu nai apa khako amiam nou sam apamloau poukü tsünoi-e.

²⁹Khrista asio noin ta asamüh ngenaito, sauhaiüh asio kankeiji, asam lüko Goa ainou chettsün ta asamüh ngen.