Read Khiamniungan Naga 1 Yohan 3 Bible Online

1 Yohan 3 - Khiamniungan Naga bible

1 Yohan 3

¹Athaplu, Po nou sam tü titithatso tsüojinji! Sam Goa ün Thsoso ta jonau apa atsüojin to thatü asong noin naiuso nungli sam atsüoting noin. Nungshiko goumchi nou sam tsünge, nungüh Goa tsünge.

²Atsüojintsünso, lo sam Goa thsoso noin, lüko nungphiai sam ti noi-e nung loüh motsangshei. Lüko Apa tsangsheikü sungnai sam apali noi-e, tiautenai apa titi noin, nungti samüh apa eppe.

³Sauüh Apa da nung ayang noin, apa titi ayanthsüo, nungti apa lüko meshen chija yanthsüoji.

⁴Sauüh angei sunji, apaüh Goa ngiokhem lotheji, tiautenai angei nungto ngiokhem lothetsün noin.

⁵Angei kankü khuwanao Khrista shin ta asamüh ngeji, naiuso apa da angei tsünoi.

⁶Nungtiphe sauhai Khrista da noiji, apaüh angei tsükankeiji, lüko sauüh angei kankeiji, apaüh Khrista tilaitso tsüep, naiuso tsünge.

⁷Methsoso, sauhao asam atsüotsüdekü lasapthio-i! sauüh asio kankeiji Khrista titi noin, apa lüko nungti asio noin.

⁸Sauüh angei kankeiji, apa Biya ün nou noin, tiautenai Biya nou aya ainou angei sunlou. Biya chhi lomowanao thaiuthalu Goa Thso tsangsheikü sungiu.

⁹Sauhai Goa ainou chetkü noin, ngüsoüh angei tsükankeiji, tititenai Goa sakshi ngüso da noiji, naiuso ngüsoüh angei tsükankeishiji, tiautenai apa Goa ainou chet.

¹⁰Nungko Goa thsoso naiuso Biya thsoso tsangsheikü hanji; sauhaiüh asio tsükankeiji, ngüso Goa ün tsüde, tsüdekünai sauüh meshen deisinio tsütsüojinji, apa lüko Goa ün tsüde.

¹¹Sam tsaküh tsak tü tsüojineao noin ta asamüh aya ainou lutsün ngiongem nung noin.

¹²Sam Kain lito tsütheau noin, apa Biya ün noiküla, naiuso apaüh meshen nioteng Abel luat. Kainüh tiauta Abel luat? Tiautenai apa chhi nouso aphio, naiuso apa nio chhi nouso ayam thakü noiküla.

¹³Deisinioso, goumchi nou asam chinyan nai lalekkat.

¹⁴Samüh ee nou leankü aa nai shi-iu ta ngen, samüh nung ngetsün tiautenai samüh deisinio tü tsüojinji; sauhaiüh tsütsüojinji, ngüso loüh ee oukong khemailu noin.

¹⁵Sauhaiüh deisinio chinyanji, ngüso khaiunia luattsünso noin, naiuso khaiunia luattsün sau lüko tsü ekün aa tsütaiu ta asamüh ngen.

¹⁶Samüh atsüojin ti nung ngen; Khristaüh apa aa sam hao kiu. Nungti samüh lüko deisinio thaiutha sam aa taiukiukü hao noin!

¹⁷Sam memei thekü amaohai angja epnai, lüko apa thaiutha sam pha lamshikü wannai, samüh Goa tsüojinji ta titi ngioau shio-e?

¹⁸Methsoso, sam atsüojin nung ngio nou, tsüdekünai lei noulu tsüde, lüko chhi nou naiuso ngiotsüo nou tsüojinao noin.

¹⁹Naito, sam ngiotsüo ün ta samüh titi nge-e? Sam Goa khako sam nungti amonglam noin.

²⁰Tititenai sam mongpemko nai Goa song, naiuso apaüh apem ngen.

²¹Atsüojintsünso, sam mongpemüh sam tsüphio-ikü naito, Goa dongai sam thakü noin.

²²Samüh tilüsong saoji, nung apa ainou epji, tiautenai samüh apa athoilut nouso kankeiji, naiuso apa niothapko ti amei nung chhiji.

²³Apaüh sam hau athoilut kiutsünto, samüh apa Thso Yisu Khrista nianko monglame, naiuso tsaküh tsak tsüojineau nung apa athoilut nou noin.

²⁴Sauüh Goa nou thoiluttsünso kankeiji, nung khaiunia da Apa noiji; naiuso Apa sam da noiji; nung apaüh sam hau kiutsün Onthso tsangkü samüh ngen.