Read Khiamniungan Naga 1 Yohan 4 Bible Online

1 Yohan 4 - Khiamniungan Naga bible

1 Yohan 4

¹Atsüojintsünso, asamüh onthso apem da lamonglam, lüko onthso nouso Goa ainou süne tsüde, ngüso lülilu; tititenai atsüotsüdekü chimtsün piakü goumchiko sung-iu.

²Asamüh Goa Onthso nung tsangkü ngeao shio-e: Yisu Khrista nyih nai shin ta nung onthso sübao nou thaloji, nungtin Onthso chikü Goa ainou noin,

³lüko Onthso sübaoüh Yisu nyih nai shitsün tsüthaloji, nungtin chikü Goa ainou tsüde. Nung Khrista thako noitsün eh nouso onthso, sübao thaiutha achimtsün shiji ta samüh lula-iu, naiuso nung loto goumchiko noin.

⁴Methsoso, asam to Goa ün nou noin, naiuso asamüh atsüo tsüdekün onthso nouso shio-iu, tiautenai goumchiko noitsün onthso ko naito asam da noitsün onthso oukongting.

⁵Nung goumchi ün nousoüh goumchi thaiutha ngio chiteji, naiuso goumchi nou ngüso ngio angji tiautenai ngüso goumchi ün noin.

⁶Lüko sam to Goa ainou, sauüh Goa ngeji, apaüh sam ngio angji, sau Goa ainou tsüde, apaüh sam ngio tsü-angji. Nung tsangkü samüh Atsüo Onthso naiuso üji onthso titi emekü noin nung ngesanji.

⁷Atsüojintsünso, sam tsak sei tsak ta tsüojineko, tiautenai atsüojin Goa ainou noin. Sauüh tsüojinji, apa Goa ainou chettsün, naiuso apaüh Goa ngen.

⁸Sauüh tsütsüojinji apaüh Goa tsünge; tititenai Goa to atsüojin noin.

⁹Goa Thsosa tsangkü sam aa noiau Apaüh Yisu goumchi ai hong; nungti samüh apa tsangkü aa nou eppe.

¹⁰Samüh Goa da tsüojin tsüde, lüko apaüh bao sam tü tsüojin, naiuso sam angei thaiutha aasan chaithio Apa Thso hong; nungko atsüojin noin.

¹¹Atsüojintsünso, Goa nou sam tü nungti tsüojin naito, samüh lüko tsaküh tsak tü tsüojineau noin.

¹²Khaiunia sauüh Goa tilaitso tsüepka, lüko samüh tsaküh tsak tsüojine naito Goa sam da noiji, naiuso apa atsüojin sam da thapungkü iulaji.

¹³Apa sam da noiji naiuso sam apa da noiji, nung apaüh sam hau kiutsün Onthso tsangkü samüh ngen.

¹⁴Naiuso goumchi hau aasan kiuau Po nou Thso hong, nung samüh ep, naiuso tsangsheikiuji.

¹⁵Yisu Goa Thso noin ta samüh thalunaito, Goa sam da noiji, naiuso sam Goa da noiji.

¹⁶Naiuso sam thaiutha Goa atsüojin sübao taim, nung samüh ngen, naiuso monglamiu. Goa to atsüojin noin; naiuso sau atsüojin nai noiji, apa Goa da noiji,

¹⁷naiuso Goa apa da noiji. Mikhem Ajekhaiu nai sam mongsongkü theau shiokü hau nungai sam da atsüojin thapungkü iula-iji; tititenai apa titi noin sam lüko nung goumchiko nungti noin.

¹⁸Atsüojin nai ahat tsünoi; lüko athapem atsüojin nou ahat apem komanji. Nungtiphe ahat nou da aluhat noin, naiuso sau hatji apa atsüojin nai thapemkü mo-iula.

¹⁹Goa nou da sam aya tsüojinphe, samüh tsüojinji.

²⁰Samüh Goa tsüojinji ta ngionai, lüko amaohai chinyan nai, sam atsüotsüdekünso. Tititenai samüh tsüepkün Goa tsüojinau tsüshio, samüh eptsün amaohai tsütsüojinkü naito,

²¹sauüh Goa tsüojinji, apaüh meshen deisinio lütsüojin ta nung athoiluttsün samüh Khrista ainou ep.