Read Khiamniungan Naga 1 Yohan 5 Bible Online

1 Yohan 5 - Khiamniungan Naga bible

1 Yohan 5

¹Yisu nung Khrista ta sauüh monglamji, apa Goa ainou chet, naiuso sauüh Po nou tü tsüojinji, apaüh Po ainou chettsün Thso tü lüko tsüojinji.

²Samüh tilai Goa da tsüojinji, naiuso apaüh thoiluttsünso kankeiji, nung tsangkü samüh Goa thsoso tü tsüojinji ta ngen.

³Tititenai samüh apa athoilut nouso kankeiau nung Goa atsüojin noin, naiuso apaüh thoiluttsün nouso sau thaiutha thatü achek tsüde.

⁴Tititenai sau Goa ainou chet, apaüh goumchi shioji, naiuso ashiotsün sübao nou goumchi thashioloji nung sam amonglam noin.

⁵Yisu Goa Thso ta sauüh monglamji, apa tü simkü goumchi shiotsün sau tsünoi?

⁶Khiam naiuso ee nai limkü shitsün nung Yisu Khrista tsak noin. Apa khiamlu tsüde, lüko khiam naiuso she nemtso hakü shin. Naiuso Onthso nou chija nung atsüo noin ta mitha kiuji, tiautenai Onthso nou ngiotsüo noin.

⁷Nungko mitha süme noin:

⁸Onthso, Khiam, naiuso She; nung süme nouso apemüh mitha wekü kiuji.

⁹Samüh khaiuniahoi nou kiutsün mitha luji, lüko Goa mitha kiutsün nungtü songtso, naiuso apaüh Thso thaiutha nung mitha kiuji ta nung Goa nou tsangsheikiu-iu.

¹⁰Sauüh Goa Thso da monglamji, apa da nung atsangsheitsün noin, lüko sauüh Goa da tsümonglamji, apaüh Goa atsüotsüdekü hau iula-i-iu, tiautenai Goa nou apa Thso thaiutha tsangsheikiutsün da tsümonglam.

¹¹Goa nou sam hau asai aa nou kiu, naiuso nung aa nou apa Thso da noin, ta nung mitha noin.

¹²Sauüh Thso nou ep, apaüh aa nou taim, sauüh Thso nou tsüep apaüh aa nou tsütaiu.

¹³Goa Thso nianko monglamtsün asamüh athontsüyang aa taim, nung asamüh ngeau thaiutha asam dongai ngü nungso satiu.

¹⁴Apaüh mongchiotsünli samüh tsotsak saonai, apaüh angji, ta loüh samüh ngenai, nung samüh eptsün Goa da mongsong noin.

¹⁵Samüh tilüsong saoji, nung apaüh angji, ta samüh atsüo ta ngenaito, apa ainou samüh tilüsong saoji nungso epiu ta samüh ngen.

¹⁶Amonglam deisinio tsak eao maikü tsüdekün angei sonkü epnai, nung khaiunia hao aa kiuau sau noin, nung Goa tü asamüh misao ao noin. Nung eao maikü tsüdekün angei suntsün thaiutha noin. Lüko nungai ee dongai niatsün angei tsak noin, naiuso ngo asam tü nung thaiutha misao lüsao ta tsüngioji.

¹⁷Tsüthakü chhitsün chikü angei noin, lüko eantsün dongai tsüniatsün angei noin.

¹⁸Goa ainou chettsün thsoso sauüh angei sunlodekü tsünoiji, tititenai Goa Thso nou ngüso angei ainou lolaokü taiuji, naiuso Tsümeikün Tsak nou ngüso tü tsütawaiji ta samüh ngen.

¹⁹Goumchi athum tsümeikün oukong khemai noin lüko, sam Goa ün noin ta samüh ngeji.

²⁰Samüh Goa atsüo nou ngeao Goa Thso nou shikü sam hao angelatsün kium ta samüh nge-en. Sam Goa atsüo nouko ajeiai nai noijinung Apa Thso Yisu Khrista ko ajeiai nai noiji. Ta samüh ngen. Nung atsüo Goa, naiuso athontsüyangkün Aa noin.

²¹Methsoso, tsüthakün goa nouso ainou asam chija tsüokü lünoi!