Read Khiamniungan Naga Mikhem 1 Bible Online

Mikhem 1 - Khiamniungan Naga bible

Mikhem 1

¹Yihusua eankütün phiai Israelhaiüh “sam kau sübao chongting khuküta Kananhai komane ta APAOU tü sang?”

²APAOU nou thalakü ngiom, “Yihuda kau chong khu-e. Ngo nung goumchi ngüso phamongai kiuwaniu.”

³Yihuda kau nou Simeon kautü nungti ngiom, “Sam hau sonkiutsün goumchi haoson nai samko aikü anapha, küta sam kamlokü Kanan haiko eh liko. Naiuso sam asam goumchi haoson nai asamko aikü napha-e.” Nungtiphe Simeon kauso

⁴naiuso Yihuda kauso ehliao kamlokü khu. APAOU nou ngüso hau Kananhai naiuso Perizhai khako Bezek nai ashiolotsün kium.

⁵Ngüso Adonibezek ko nungai epekü apako ehli tsalo.

⁶Apa khulükhun, lüko ngüsoüh apatü komkü khukü thalo- küta phakha hokkhapao tapankiu.

⁷Adonibezeküh ngiom, “Phakhapao naiuso hokkhapao nouso tapankü noitsün nokpao aochinyat nousoüh jü thaisampuo khemai nou jüonlo. Ngo ngüsotü ti chhin, Goa nou lo ngütü chhi-iu.” Nungai apa Yirusalem nai kankü khu naiuso apa nungai ean.

⁸Yihuda kausoüh Yirusalem komküta nung shiolo. Ngüsoüh khaiuniahoi loatküta noknio tü in jeklut.

⁹Nungphiai ngüso ajepekki gohwai goumchi nai kihtsün, kinghok nai kihtsün, king goh nai kihtsün Kanan haiko ehli ao khu.

¹⁰Kiriat Arba ta jontsün Hebron noknio nai kihtsün komanao ngüso shin. Nungai ngüsoüh Sheshai, Ahiman, naiuso Talmai kau nouso shiolo.

¹¹Nung ainou Yihuda kau Debir noknio nai kihtsünso thako ehli ao khu. Pe naito Debir tü Kiriat Sefer ta jonkü noiküla.

¹²Ngüso ongko Kaleb ta niankü khaiunia tsaküh ngiom, “Kiriat-sefer thaloau khaiunia sauüh shio-e, ngo nung khaiunia hau jüthso menyiuthso Aksa tsamsigoh yangau kiu-e.”

¹³Nungai Kaleb nio Kenas thso Otnielüh nung noknio thaloum, nungtiphe Kalebüh apa thso menyiu- thso nung apa hau tsamsigoh yangau kiuwan.

¹⁴Tsamsigoh yangtsün ajekhaiu nai Otnielüh Aksa tü apa po ainou goh tsak akiu ta sao au koja. Menyiuthso nou apa gado chiai moknoitsün ainou saonai, Kalebüh apatü ti aiuji ta sang.

¹⁵Apaüh tha- lakü ngiom, “Ngo khiamngan ajantso hakü aiuji. Ni ngü hau kiutsün gohthang nou gohwai nai noin.” Nungtiphe Kalebüh apa hau asung- thon naiuso asaothun khiamngan nouso kium.

¹⁶Mosa kaio thsaosithsoso Kenhai, pengpai noitsün noknio ta jontsün Yeriko ainou Yihuda haiko aikü Yihuda nai Arad tü ajepekki nai noitsün gohluon gohthang nai napha, küta nungai ngüso Amalekhai ongai kiha.

¹⁷Yihuda khaiuniahoi nung Simeon khaiuniahoiko aikü khuküta ngüsoüh Zefat noknio nai kihtsün Kananhai shiolo. Ngüsoüh nung noknio khako athe shanlutkiukü lotheankiu, naiuso nungtü Horma ta jonkiu.

¹⁸APAOU nou Yihudahai tü hachu, naiuso ngüsoüh king goh nou thalo. Lüko ngüsoüh Gaza, Askelon, Ekron naiuso ngüso lemkü noitsün chenpa nouso tsüthalo. Nung khaiunia haiusai nai kihtsünsoüh son nou langtsün ehli tsam taiuküla, nung- tiphe Yihudahaiüh ngüso komanao tsüshio.

²⁰Mosaüh thoiluttsünli, akomshiantsün Anak thsaosithsoso kau süme nouso kihtsün noknio Hebron nung Kaleb hau kium.

²¹Lüko Benjamin kau nousoüh Yirusalem nai kihkü noitsün Jebushai tsükoman, nungtiphe Jebushai lonyi saokü Benjamin kau nousoko kihkü noin.

²²Efraim naiuso Manase kau nouso Bethel noknio komao khu taoko APAOU nou ngüso hachu, nung taoko noknio tü Luz ta jonkü noiküla. Ngüsoüh noknio nai akautha hongthio nai,

²⁴khaiunia tsak akhuwantsün epkü apatü sangkü ngiom, “Sam hau noknio nai titi nape nung ayam ahan, samüh nitü tsümeikü ti tsüchhi-e.”

²⁵Nungai nung khaiunia nou ngüso hau ayam hanthio, küta Efraim naiuso Manase khaiunia nousoüh nung khaiunia naiuso apa tsammonglu poitaiukü noknio nai noitsün khaiuniahoi apem loatkü wan.

²⁶Nungphiai apa Hit hai goumchi ai khukü nungai noknio tsak shan, küta nungtü Luz ta jon, nung nian lonyi saokü noin.

²⁷Manase kau nou Betshan, Tanak, Dor, Ibleam, Mekido, noknio nouso naiuso nung shimkü noitsün noksong nousoko kihtsün Kananhai tsükoman, ngüso lonyi saokü nungai kihkü noin.

²⁸Tilai Israelhai kongkü iula, ngüsoüh Kananhai tü ngüso thaiutha chhisiya achek nouso chhi-i, lüko loüh ngüsoüh nungso apem tsükoman.

²⁹Efraim kau nou Gezer noknio nai kihtsün Kananhai tsükoman, nungtiphe Kananhai lonyi saokü ngüsoko aikü kihji.

³⁰Zebulun kau nou Kitron si Nahalal noknioso ai kihtsün Kananhai tsükoman, nungtiphe Kananhai ngüsoko aikü kihji. Naiuso ngüso thaiutha chhisiya thsüokü chhi-iji.

³¹Asher kau nou Akko, Sidon, Alap, Akzib, Hilba, Aphek, naiuso Rehob noknio nousoko kihtsün khaiunia nouso tsükoman.

³²Ngüsoüh tsükomanphe, Asher khaiunia nouso Kananhaiko aikü kihkü noin.

³³Napthali kau nou Betshemis naiuso Bethanat noknio nousoko kih- tsün khaiunia tsükoman. Napthali khaiunia nouso Kananhaiko aikü kihji, ngüsoüh Kananhai hau ngüso thaiutha chhisiya thsüokü chhi-iji.

³⁴Amorhaiüh Dan kau tsamei nai tsüsao-ikü king goh nai kih-ikü taiu.

³⁵Amorhai Aijalon naiuso Shaalbim naiuso Heres king nai losaokü kihji, lüko Efraim naiuso Manase kau- soühto ngüsotü ngüso thaiutha chhisiya kongkü chhi-iau ngüso ngiokhem khemai taiuwan.

³⁶Edomhai ajenapki Sela elung nung Akrabim Aoyan thsatkü khukü noin.