Read Khiamniungan Naga Mikhem 10 Bible Online

Mikhem 10 - Khiamniungan Naga bible

Mikhem 10

¹Abimelek ean phiai Dodo thsao Pua thso nou Tola, Israel niasanao shin. Apa Isakar kau ainou naiuso Efraim king goumchi Shamir nai kihkü noiküla.

²Apa Israelhai ahei au pon kheikü süme theküta ean, naiuso Shamir nai khanan.

³Tola phiko Gilead ainou Jair shin. Apaüh Israelhai pon kheikü nime niakei.

⁴Apa thso aosam, ngüso gado aosam chiai moknoikü tsakei. Ngüso ün Gilead goumchi nai noknio aosam noiküla, naiuso nungso tü losaokü Jair nokso ta jonji.

⁵Jair ean naiuso apa Kamon nai khanan.

⁶Loüh Israelhaiüh Baal, Astarod, Siriahai, Sidonhai, Moabhai, Amon- hai, naiuso Filistiahai goa sotü am- khamkü APAOU thako angei sunhe. Ngüsoüh APAOU lean naiuso apa amkhamtsün laowan.

⁷Nungtiphe APAOU nou Israelhai ko mongmat, küta Filistiahai naiuso Amonhai hau ngüso shiolowani.

⁸Ngüsoüh Yordan Haiu yankü Gilead nai noitsün Amorhai goumchi ai kihtsün Israel- hai apem pon chekü petjei thaiutha thangmangkü ajeiat kiu.

⁹Loüh Amonhaiüh Yihuda kau, Benjamin kau, naiuso Efraim mele nousoko ehli ao Yordan lüko yankü khu. Nungtaonai Israelhai thatü angja nai noiküla.

¹⁰Nungai Israelhaiüh APAOU tü vekü ngiom, “Samüh athako angei sunlo-iu, tiautenai samüh ni, sam Goa lean, küta Baal tü amkham.”

¹¹APAOU nou ngüso hau athashitsün kiu: “Ayanan taoko asam Ijiphaiüh, Amorhaiüh, Amonhaiüh, Filistiahaiüh,

¹²Sidonhaiüh, Amalek- haiüh, naiuso Maonhaiüh, asam tü thangmangkü shin, nungai asamüh ngütü vekü ngiom, nungai ngo asam ngüso ainou tsükipsan süne?

¹³Lüko asamüh ngü leankü amao goa nousotü amkhamphe, ngo loto asam tsühalo shi-e.

¹⁴Lükhu, asamüh cholotsün goa nousotü vekü lüjon. Tilai asam angjanai nappe, asam ngüso hau lükipsani.”

¹⁵Lüko Israelhaiüh APAOU tü ngiom, “Samüh angei sunhe-iu. Ni titi mongchioji nungti lüchhi, lüko lonyito tsüojinyangkü sam akipsan.”

¹⁶Nungtiphe ngüsoüh gohmao goa nouso wananküta APAOU tü a-amkham, naiuso apa Israelhai omhetsün thaiutha yangkiukü iula.

¹⁷Nungai Amonhai süpai ehliao khemloküta Gilead nai noi, naiuso Israelhai kamsanküta Mizpa ai kamnoi.

¹⁸Nungai Israelhai naiuso mele nai aheihoi nousoüh tsaküh tsak tü sangkü ngiom, “Amonhai thako ehliao sauüh nia-e, apa Gilead nai noitsün apem chiai ahei the-e.”