Read Khiamniungan Naga Mikhem 11 Bible Online

Mikhem 11 - Khiamniungan Naga bible

Mikhem 11

¹Lo Gilead hainou Jeptha nung mongsong khaiunia tsak noiküla, naiuso apa ajisiwop nyiuhai tsak thso noiküla.

²Jeptha po Gilead naiuso Gilead ün tsammongnyiu tsangkü amao melothsoso lüko chetkiu naiuso tilai ngüso shejikan ngüsoüh Jeptha nung kojakü tsam ainou koman. Ngüsoüh apatü ngiom, “Ni sam po ainou tengkam titso tsükame; ni amao nyiuhai tsak ün thso noin.”

³Jeptha apa deisinioso ainou khulükhunküta Tob goumchi ai kih. Nungai apaüh tiau tsüthekün khaiuniahoi tailo, küta ngüsoko aikü tsakeiha.

⁴Nungphiai atao intso noiküta, Amonhai Israel thako ehliao khu.

⁵Tilai nung thawao, Gileadhai aheihoi nouso Tob goumchi ainou Jeptha nialokü shiao khu.

⁶Ngüsoüh ngiom, “Sam Amonhaiko ehliao ni shiküta sam ania.”

⁷Lüko Jepthaüh thalakü ngiom, “Asamüh ngütü thsüokü chinyan shioko jüpo tsam ainou kojakü koman. Lo asam angja taokoto jüdongai tiau shiji?”

⁸Ngüsoüh Jeptha tü ngiom, “Ni samko khuhaküta Amonhaiko ehli au naiuso Gilead nai kihtsün apem khako ni ahei the-iau thaiutha sam lonyi adongai shiji.”

⁹Jepthaüh ngüsotü ngiom, “Asamüh ngo Amonhaiko ehliao ayashi tünaito, naiuso APAOU nou ngü hau ashiolotsün kiu naito, ngo asam nokpao au the-e”

¹⁰Ngüsoüh thala, “Samüh mongchioji, Sam mitha APAOU noin.”

¹¹Nungtiphe Jeptha Gilead nai noitsün aheihoi nousoko khuha, naiuso khaiuniahoi nousoüh apa ngüso nokpao au the-i. Jepthaüh nung athaluetsün ngio nouso apem Mizpa nai APAOU khako chiten.

¹²Nungai Jethaüh Amonhai nokpao dongai ngiongem kantsünso nungti ngioau hong: “Ni samko ti thaiutha tsaoji? Ni jü goumchi tiauta juolowan?”

¹³Amonhai nokpaoüh Jeptha ün ngiongem kantsünso tü thalan, “Tilai Israelhai Ijip goumchi ainou shikhu, ngüsoüh jü goumchi Arnon Haiu ainou Jabbok Haiu naiuso Yordan Haiu saokü lowan. Nungli asamüh nokmei nai laokü kiuwan shiao noin.”

¹⁴Jepthaüh Amonhai nokpao dongai ngiongem kantsünso müjam laokü hongshiküta nungti thashin:

¹⁵“Israelhaiüh Moabhai goh naiuso Amonhai goh lowankium ta ngiotsün tsütha.

¹⁶Nungti shithawaokü noiküla: Tilai Israelhaiüh Ijip lean, ngüso singtso goh yankü Agaba gohjet shenio ai khuküta Kades ai shin.

¹⁷Nungai ngüsoüh Edom nokpao dongai apa goh yankü khuau ngiokhem sao au ngiongem kan- tsünso hong, lüko Edom nokpao nou ngüso hau yanlükhuniau tsüthalo. Ngüsoüh Moabhai nokpao tü lüko sang, naiuso apaüh lüko tsüthalo. Nungtiphe Israelhai Kades nai noian.

¹⁸Küta ngüso liutsa lang yankü Moab goh ajepek nai naiuso Arnon Haiukok etsai moshikün lektso, Edom naiuso Moab goumchi lemlokü khu. Ngüsoüh asaothang nungai shanlo, lüko ngüsoüh Arnon Haiu tsüyan, tiautenai nung Moabhai elung noiküla.

¹⁹Küta Israelhaiüh Hesbon nai nokshingtsün Amorhai nokpao Sihon dongai ngüso goumchi ai yaau apa goh yankü akhu-i ta ngiokhem sao au hong.

²⁰Lüko nokpao Sihonüh Israelhai tsüyanlükhuni. Nungliko apaüh meshen süpai hoithum nialokü shikü Jahaz ai kamloküta Israel tü poh.

²¹Lüko APAOU Israelhai Goaüh, Sihon naiuso apa süpaiso khako Israelhai hau ashiolotsün kium. Nungtiphe Israelhaiüh Amorhai sauhai nung goumchi ko kihakü noiküla ngüso goh apem thalowan.

²²Ngüsoüh Amorhai goumchi aje- pekki nai Arnon ajenapki nai Jabbok saokü naiuso ajepek nai liutsa lang ainou ajenap nai Yordan saokü apem thalowan.

²³Nungtiphe apa khaiunia Israelhai thaiutha Amorhai koman kiutsün nung APAOU Israelhai Goa noiküla.

²⁴Ni nung laolo shiao koweji süne? A goa Kemosüh ni hau tilüsong kiukü taim ni nung taiuao shio-e. Lüko samüh to APAOU sam Goaüh sam hau kiutsün alum taiu-e.

²⁵Moab nokpao Zebor thso Balak ko hauto ni meitso ta yangji süne? Apaüh Israelhai tilaitso tsütaimoyi? Apaüh sam thako jam lüko ehlikü noin süne?

²⁶Pon tsom süme ngoikü thaiutha Israelhaiüh Hesbon naiuso Aroer naiuso nungso lemkü noitsün noksong nouso naiuso Arnon Haiuko nai noitsün noknio nouso apem thalokü kihkü noin. Atao nung lektso nouko ni nungso tiauta laokü tsülowanshi?

²⁷Tsüde, ngo nitü tsüthakü titso tsüchhi taiu. Ni ngüko ehli ao thattsün tsangkübao ni tsüthakü chhiji. APAOU nou mikhemtsün noin. Israelhai naiuso Amonhai jetko apaüh lonyi janthat kiu-e.”

²⁸Lüko Amonhai nokpaoüh Jeptha ainou ngiongem hongtsün tü tsü-ang.

²⁹Nungai APAOU Onthso Jeptha chiai saom, Apaüh Gilead naiuso Manase yankü Gilead ai noitsün Mizpa ai laolükhunküta Amon ai tsülaokü khu.

³⁰Jepthaüh APAOU tü thalo: “Ni ngü hau Amonhai shiolo-i naito,

³¹Jütsam ainou ngüko pheteau chongting shitsün khaiunia in nai jahkü thiotsün chaithio tsak kiu-e, tilai ngo ehli ainou ashiolotsün epkü shi-e nung kiu-e.”

³²Nungtiphe Jeptha Amonhaiko ehli ao Haiu nou yankü khu, naiuso APAOU nou apa hau ashiolotsün kium.

³³Apaüh ngüso Aroer ainou Minit lemkü noitsün noknio khei Abel Keramim saokü apem chaothio- wan. Nungko achaoattsün thatü songkü noiküla, naiuso Amonhai Israelhaiüh shiolowan.

³⁴Tilai Jeptha apa tsam Mizpa ai laokü shin, nungai apa thso menyiuthso lungthong saiusaiukü jihangkü apako pheteao shin. Nung menyiuthso nou Jeptha thso tsaklu noiküla.

³⁵Tilai apaüh menyiuthso nou ep, apaüh amongkia nou apa neshe chipek küta ngiom, “Oh, jüthso! Ni jümongpem lotheji! Ngü yangelat-iau ni tiauta latha? Ngo APAOU ko ngiomong shinge tsak shanlowaniu, naiuso ngo nung laokü loshiao tsüshio!”

³⁶Apa thsoüh apatü ngiom, “Ni APAOU tü athalou-e shanio tünaito, ni ngütü ti chhiao shanlo nung lüchhi, tiautenai APAOU nou a ehso Amonhai thako nihau phaosani-iu.”

³⁷Lüko menyiuthso nou apa potü sang, “Jüthaiutha chhi tsak achhi. Ngo alei nime pemsa awan, nungaito ngo menyiu asangting noikü eanao noitsün thaiutha ngo meshen haisoko hakü king nai khuküta nungai mongsaiukü tsakei-e.”

³⁸Jepthaüh apa thso alei nime thaiutha hongan, nungai nung menyiuthso naiuso apa haiso king nai sungküta mongsaiukü noi, tiautenai apa tsamsigoh tsüyangkü eanao noiküla.

³⁹Alei nime yanküta apa meshen po dongai laokü shin. Jepthaüh APAOU tü thalotaiutsün chhin, naiuso menyiuthso nou nung taoko saokü asangting noikü nai ean. Nungtao nai yakü Israel nai saisile tsak yachukü,

⁴⁰Gileadhai nou Jeptha thso menyiuthso thaiutha pon pungkü ajekhaiu püle ngoikü thaiutha momo tsam ainou amongsaiu ao mesohoi aodangkü nai noian iuji.