Read Khiamniungan Naga Mikhem 13 Bible Online

Mikhem 13 - Khiamniungan Naga bible

Mikhem 13

¹Loüh Israel haiüh APAOU thako angei sunhe, küta APAOU nou Israel khaiuko Filistiahai hau pon aopüle nok-shingi.

²Nung taoko Zora noksong nai khaiunia tsak Manoa ta niankü noi- küla; apa Dan kau mongko mepem tsak; naiuso apa tsammongnyiu luon noiküla.

³APAOU hongthon shikü apa tü ngiom, “Ni luon noikü shin, lüko tsütsangkü ni pemtsükengkü iula-e naiuso melothso tsak chetkiu-e.

⁴Theng tsüdekünai phoplao thiotsün naiuso anuotsün titso tsüheshiuao lütsüolo,

⁵naiuso melothso nou chetküta apa khaiuo tilaitso tsü iuwanao noin, tiautenai apa achet ajekhaiu ainou Goa ün Nazarene tsakli thumkü kiuwanao noin. Apaüh Filistiahai phamong ainou Israelhai kipsanao chhi tsalo-e.”

⁶Nungai nyiuhai nou khukü apa tsammongpo tü ngiom, “Goa ün khaiunia tsak jüdongai shin, apa hongtsakli ahatau lümeikü noiküla. Ngo apa ti ainou shin ta tsüsang, naiuso apaüh ngü hau apa nian tsüchite.

⁷Lüko apaüh ngo pemtsü- kengkü iula-e naiuso melothso tsak chete ta chite. Apaüh ngütü theng tsüdekünai phoplao thiotsün naiuso anuotsün titso laheshiu ta ngiom, tiautenai nung melothso nou apa aakihlaiu chikü Nazarene tsakli hau losiokü thumkü kiuwane.”

⁸Nungai Manoaüh APAOU tü misao nungti saokü noiküla, “APAOU, tsüojinyangkü methso nou tilai chette nungai samüh ti chhi-e nung chiteshiao Goa khaiunia ni hongtsün müjam laokü ahongshi.”

⁹Manoaüh sangtsün Goa nou thala, naiuso Manoa tsammongnyiu eiu ai moknoitsün taoko nung hongthon nou apa dongai laokü shin. Nung taoko apa tsammongpo Manoa apako tsühakü noiküla,

¹⁰nungtiphe apa meshen tsammongpo dongai jingkü khuküta ngiom, “Athaplu! Ajekhaiu tsakko khaiunia sau jüdongai shikü noiküla, apa loüh jüdongai laokü shishin.”

¹¹Manoa apa tsammongnyiu phiai hoilut, küta nung khaiunia dongai khukü sangkü ngiom, “Jütsammong- nyiuko chitetsün khaiunia nou ni süne?” Apaüh “Ah,” ta thala.

¹²Nungai Manoaüh sang, “Tilai angio nouso shithawao-e, apa aakih ti khekkü noi-e? naiuso apaüh ti chhi-e?”

¹³APAOU hong nou thalakü ngiom, “Atsammongnyiuüh ngo apatü ngiotsün apem chhiao tsangsheikü theao noin.

¹⁴Apaüh sainaoshep nou shantsün titso tsüheau noin, naiuso theng, phoplao thiotsün theng, tsüdekünai anuotsün eheshiu titso tsüheao noin. Ngo apatü ngiotaiutsün apem chhiao noin.”

¹⁵Manoaüh nung APAOU ün hongthon ta tsüngekü noiküla, nungtiphe apaüh hongthon tü ngiom, “Tsüojinyangko lümokhu, samüh nihau wonthso tsak atheng wao.” Lüko hongthon nou ngiom, “Ngo noiha-e lüko titso tsüheha-e. Lüko ni nung khemsane tünaito, APAOU hau ajah chaithio tsaklibao lükiuwan.”

¹⁷Manoaüh thashin, “Sam hau anian achite, nungaito angio nouso atsüo shithawao nai samüh nihau asuhat kiuao shio-e.”

¹⁸Hongthon nou sangkü ngiom, “Ni tiauta jünian ngeau aiuji? Nung angawantsün nian tsak noin.”

¹⁹Nungtiphe Manoaüh wonthso tsak naiuso chih intso loküta lung amthang shankü APAOU sauüh angawantsün chhiji apahau nungso chaithio kiu.

²⁰Amthang ainou in nyaisan nai, Manoa naiuso apa tsammong- nyiuüh APAOU hongthon in nyai ongai aün ai sungkhuwantsün ep. Nungai Manoaüh nung khaiunia nou APAOU hongthon noiküla ta ngesan, naiuso Manoa si apa tsammongnyiu ne nemtsoüh kha goh ai kaothio. Ngüsoüh nung hongthon nou tilaitso tsüepshikü mowan.

²²Manoaüh apa tsammongnyiu tü ngiom, “Sam atsüoting eane, tiautenai samüh Goa epiu!”

²³Lüko apa tsammongnyiuüh tha- lakü ngiom, “APAOU nou sam loatao yangtünto, apaüh sam chaithio nouso tsülo-ela, naiuso nung chikü hankü tsüchite-ela.”

²⁴Nyiuhai nou melothso tsak chetkiu, naiuso apa Samson ta niankiu. Methso nou shejikan naiuso APAOU nou apa oukkiu.

²⁵Apa Dan nai Zora si Estaol jetko noitaoko APAOU nou oukongkiuau yalo.