Read Khiamniungan Naga Mikhem 14 Bible Online

Mikhem 14 - Khiamniungan Naga bible

Mikhem 14

¹Nyitso Samson Timna ai sao- nai apaüh Filistiahai menyiu- thso tsak ep.

²Nungko Samson, tsamai laokü shiküta, apa posinyiu netü ngiom, “Nungai Filistiahai menyiuthso tsak noin, apa da jümong kiuwaniu. Apa jüdongai nialokü ashi, ngo apa tsamsigoh yangau aiuji.”

³Lüko apa posinyiu neüh apatü sangkü ngiom, “Tsütipankün Filistiahai dongai ni tiauta tsamsigoh yangau khu-e? Ni sam kau mongko, sam khaiunia ongko menyiuthso tsak tsüeppe süne?” Lüko Samsonüh apa potü ngiom, “Apalu jüdongai nialokü shi-iao aiuji, ngo apa mongchioji.”

⁴Nung chhiao Samsontü APAOU nou yam niaji ta apa posinyiu neüh tsünge, tititenai APAOU nou Filistiahaiko ehliao thaiutha aküo noutü yamkü noiküla. Nungtaoko Israelhai chiai Filistiahaiüh nok- shingkü noiküla.

⁵Nungtiphe Samson Timna nai apa posinyiu ne hakü saom, ngüso nungai sainaoshep eiu yankü khu- tsün taoko, apaüh chongkhao tsak ngaotsün lula.

⁶Alekta APAOU ou- kong nou Samson chiai shin, naiuso apaüh chongkhao nou phajeüh nime hau thekü wonthso tsaklilu chipek, lüko apaüh ti chhin nung apa posinyiu hau tsüchite.

⁷Küta apa khukü menyiuthso nouko chite, naiuso apaüh nung menyiuthso aiukü iula.

⁸Ajekhaiu intso shamküta Samson nung menyiuthso nouko tsamsigoh yangau laokü khu. Akhu yamko apaüh chongkhao loattsün mea tü thapao khunai, apaüh nung chongkhao mea mongai liu piakü yaktaiukü naiuso liukhiam naptaiukü epkü ngawan.

⁹Apaüh liujob nou ngaoloküta yamai hehekü khu. Naiuso apa posinyiu dongai khukü ngüne hau intso kiuha. Ngüneüh nung he lüko Samsonüh ngüne hau nung liukhiam nou chongkhao mea mong ainou losan ta tsüchite.

¹⁰Nungai apa po menyiuthso nou tsamai khu, naiuso Samsonüh nungai sümai tsak wao, nung oumhai saisile tsakli noiküla.

¹¹Tilai Filistiahaiüh apa ep, ngüsoüh oum khaiunia aosam apako noiha ao hong.

¹²Samsonüh ngüsotü ngiom, “Ngo asamtü ayangheao ngio tsak sange, sümai ajekhaiu chinyatnyi mongko asamüh ngü hau nung athat nou chiteao shionaito, ngo asam hau ne ashethop naiuso nehong amei piakü kiu-e ta thaloji. Lüko asamüh nung ngütü tsüthashikü naito, asamüh ashethop nehong aosam naiuso sümai nehong aosam nou ngü hau kiu-e.” Ngüsoüh ngiom, “Sam hau ni yangheau noitsün achite,” “Samüh nung anglu-e.”

¹⁴Apaüh ngiom, “Eheantsün ainou tso eheao sungh; Kongsimongkü ainou tso anyaothing sungh.” Lüko ngüsoüh nung asangtsün thashiao samnyi phiai lüko tsüshiokü noiküla.

¹⁵Ajekhaiu pülenyi nouko nai ngüsoüh Samson tsammongnyiu tü ngiom, “Ayangheau nou athat sam hau achite, atsammongpo lütaimelo. Ni nung tsüchhikü naito, samüh apo tsam in nou jekkane, naiuso ni nungko hakü jahwane. Ajeüh sam ap heanau jon tsüdeso?”

¹⁶Nungtiphe Samson tsammong- nyiu apa dongai niochekhiam saokü shiküta apatü ngiom, “Ni ngütü tsütsüojin! Ni ngütü chinyanji! Ni jühaiso tü ayangheao tsak sang naiuso nung ti athat ta ngü hau tsüchite!” Samsonüh ngiom, “Athaplu, ngo jüposinyiu nehau tso tsüchitekünai nihau tiauta chite-e?”

¹⁷Tsam- mongnyiu nou nung thaiuthako sümai ajekhaiu chinyatnyi thumkü shap. Lüko tsammongnyiu nou apatü namnam lutkü noitsün shioko apaüh nung ayangheao tsak nou ti athat ta chinyatnyi nouko nai chite. Nungai nyiuhai nou Filistiahai hau chitean.

¹⁸Nungtiphe chinyatnyi nouko Samson apa asai tsampai ai monapankün khako noknio nai noitsün khaiuniahoi nousoüh apatü ngiom, “Liukhiam tü simkü ti nyaothing? Samsonüh thalakü ngiom, Chongkhao tsaktü simkü ti oukongting?” “Asamüh jü jangtsoko aikü eiu tsü a tünto, asamüh nung losaokü athashiao tsüshio-ela.”

¹⁹Alekta APAOU oukong nou Samson chiai shinküta apa Askelon ai saokü khaiunia aosam loat, naiuso nungso neshe amei nouso ngioloküta ayangheau nou thashiau shiotsünso hau kiuwan. Thawaokü shitsün thaiutha apa mongmatkü tsamai laokü shian.

²⁰Naiuso apa tsamsigoh shan taoko lamthiotsün khaiunia hau apa tsammongnyiu kiuwan.