Read Khiamniungan Naga Mikhem 15 Bible Online

Mikhem 15 - Khiamniungan Naga bible

Mikhem 15

¹Atao intso noiküta Whettso be-eiuyam taoko, Samsonüh wonthso tsak kankü apa tsammongnyiu sailuao saom. Nungai apaüh apa kaiotü ngiom, “Ngo jütsammongnyiu tsampai ai napao aiuji.” Lüko apaüh Samson tsünapi.

²Apaüh Samson tü ngiom, “Ni atsüoting apa chinyanji ta yangküta ngo apa apaio au kiuwaniu. Lüko ti tsüyang, nung meso tü meitsokü apa nio noishin, ni apa loau shio-e.”

³Samsonüh apatü ngiom, “Lo taoko naito, ngo Filistiahai tü ti chhiji nung thaiutha ngo thsale tsüloji!”

⁴Nungtiphe apa khuküta chiohoi tsom süme thalou. Ngüso nimeme ami nou keshiküta nung jetko tson kelut.

⁵Küta apaüh in sonlutkü chio nouso Filistiahai eiuai chonglam sungkü noinai hongpeng. Nungti apaüh chih nyankü noitsünso lu tsüdekü eiu nai noitsün chihsi- khiam lüko apem jekthiowan, naiuso nungko Olip shep nouso lüko hakü jekthiowan.

⁶Tilai Filistia haiüh nung sauüh chhin ta sang, nungai ngüsoüh nung Samson tsangkü chhin ta ngela, tiautenai Timna ainou Samson kaioüh Samson tsam- mongnyiu apa paio hau kiuwankü noiküla. Nungtiphe Filistiahai khukü nung nyiuhai nou po tsam jekthiowantsün ko aikü nyiuhai nou jekkatkü wan.

⁷Samsonüh ngüso tü ngiom, “Asamüh nungti chhiji süne? Ngo asam tü mothamshikün lektso tsülao-e ta ngiomong shingkü ngioji!”

⁸Apaüh ngüso koman naiuso piakü loatkü wan, küta apa khukü etam lungken nai kih.

⁹Filistiahai shikü Yihuda nai asaothang shanloküta, Lehi noksong koman.

¹⁰“Tiau asamüh samtü komji?” ta Yihuda khaiunia nousoüh ngüsotü sang. Ngüsoüh thalakü ngiom, “Sam nungko Samson keloau shin, naiuso apaüh samtü kankeitsünli samüh apatü kankei-e.”

¹¹Nungtiphe Yihudahai heng 3, 000 Etam lungken ai khukü Samsontü ngiom, “Filistiahai sam nokpao nouso noin ta ni tsüngeso? Ni samtü ti chhiji?” Apaüh thalakü ngiom, “Ngüsoüh ngütü ti chhikü noiküla, nunglu ngo ngüsotü chhin.”

¹²Ngüsoüh ngiom, “Samüh ni ngüso phamongai kiuwanao thaiu- tha, sam nungko ni keloau shikü noin.” Samsonüh ngiom, “Asamüh ngo tsüloate ta ngü hau ngio nou akiu.”

¹³Ngüsoüh thalakü ngiom, “Tha- kü noin” “Samüh ni akelu kelo-e, küta ngüso hau lethiowane, samüh ni tsüloate.” Nungtiphe ngüsoüh apa keloküta lungken ainou nialokü ya.

¹⁴Tilai apa Lehi nai yasaom, Filistiahai sang songkü wekü apa dongai jingkü shin. Nungai alekta APAOU oukong apa chiai shin, naiuso apa ketaiutsün ao nou inmut li thaman.

¹⁵Nungai apaüh gado kup ou goh ai epkü nung juonlo, naiuso nungüh khaiunia heng 1, 000 shioatkü wan.

¹⁶Nungti Samsonüh jih tsak hang, “gado kup ou tsak nou ngo khaiunia heng tsak loat; gado kup ou tsak nou ngo ngüso tenkamkü phankü wan.”

¹⁷Nungphiai apaüh gado kup ou nou yakkan, naiuso nung thawaotsün athang noutü Ramat Lehi ta jon.

¹⁸Nungai Samson khiam nou thatü lekü iula, nungtiphe apaüh APAOU tü jonkü ngiom, “Nung ashioloutsün asong ni ngühau kium, lo ngo khiamle nou eane süne? naiuso Filistiahai phamongai napane süne?”

¹⁹Nungai Goa nou Lehi nai goh kao tsakai khiam sungi. Samsonüh nung shiuküta thatü iwon meikü yang. Nungtiphe nung khiamngan noutü Hakor ta jon; losaokü nung Lehi nai noin.

²⁰Israelhai Filistiahai nokshing khemko noitaoko Samsonüh Israel- hai pon khei niakei.