Read Khiamniungan Naga Mikhem 16 Bible Online

Mikhem 16 - Khiamniungan Naga bible

Mikhem 16

¹Nyitso Samson Filistiahai noknio Gaza nai khu, nungai apaüh ajisiwop chhitsün nyiuhai tsak phetekü apako emkam.

²Gaza haiüh Samson nungko noin ta ngela- küta, ngüsoüh nung athang lemlokü noknio bekhan nai asoh chikü jiokü jim. Ngüsoüh asoh chikü ti tsü- ngemkü, “Samüh a-nge tü thalutkü jime, naiuso apa loatkü wane ta yangkü jim.”

³Lüko Samson nung ajisiwop nyiuhai nouko awem saokülu noiküla. Nungai apa chüokü noknio bekhan tü thaloukü kou, kheam, kuokiap nouso apem phat- sanan, küta nung sangdongkhaiu nai pilokü Hebron tü lalutkü noitsün kingson nai loksankü wan.

⁴Nungphiai Sorek Tsamei nai nyiuhai tsak nian nou Delilako apa tsüojinekü iula.

⁵Filistiahai nokpao pungo nouso Delila dongai khuküta ngiom, “Samson tiau thatü kong, samüh titi thekü nung oukong ngelokü apa keloküta outsükongkü iula-i-e, nung ngeloau apa lütaimelo, naiuso samüh nihau tangkason tsom chekü tsak kiu-e.”

⁶Nungtiphe Delilaüh Samson tü ngiom, “Ni tiüh oukongiji? khaiunia ajantsoüh ni tsülemlemikü ketaiuao aiu nai, apaüh nung titi chhi-e, tsüojinyangkü ngü hau achite.”

⁷Samsonüh thalakü ngiom, “Uo- kop ao ayan chinyat nou ngü keshi naito, ngo outsükongkü amaohaililu iula-e.”

⁸Nungtiphe Filistiahai nokpao nousoüh Delila hau uokop auo langyan chinyat kankü shikiu, küta apaüh Samson kejeikü wan.

⁹Apaüh khaiunia ajantso tsampai tsakko taiuküta sang songkü wekü ngiom, “Samson! Filistiahai shianji!” Lüko Samsonüh nung uokop auo nou ewoi in nou chetheantsün khekkü phoi- that. Nungti ngüsoüh apa oukong akaungio nou tsüngelo.

¹⁰Delilaüh Samson tü ngiom, “Athaplu, ni ngo tsüwesankü kankei- iu, naiuso ngühau yaang chite-iu, tsüojinyangkü ni titi kejeiao shio-e nung nguhau achite.”

¹¹Apaüh thalakü ngiom, “Ngü- soüh ngo auo alangyan nou kenaito, ngo outsükongkü amaohaililu iula-e.”

¹²Nungtiphe Delilaüh auo ayan ajantso loküta apa keshikü wan. Nungai apaüh wekü ngiom, “Samson! Filistiahai shianji!” Loüh Khaiuniahoi nou tsampai tsakko taiukü noiküla. Lüko apaüh nung auo nou ewoili chanthatkü wan.

¹³Delilaüh Samsontü ngiom, “Ni losaokü ngü tsüwesankü kankei-iu, naiuso ngühau yaang chite-iu. Tsüojinyangkü ni titi kejeiao shio-e nung ngühau achite.” Apaüh thalakü ngiom, “Ni jü khaiuo awoi chinyat nou nela nouko jenkü lathioha naito, ngo outsü- kongkü amaohaili iula-e.”

¹⁴Nungai Delilaüh apa losaiküta apa khaiu woi chinyat loküta nungso meikü nela nai lathiokü wan. Apaüh nung nela lung nou mongkü lathiokü wanküta sang songkü wekü jon, “Samson! Filistiahai shianji!” Lüko apa chüoküta apa khaiuo lathiotaiu ainou tenshikü lowan.

¹⁵Nungtiphe Delilaüh apatü ngiom, “Amongpem ngüko tsünoikü ni ngo tsüojinji ta titi thekü ngioji? Ni ngü samjam tsüwesankü kankei-iu, naiuso aoukong asong nou tiai noin nung ngühau tsüchiteji.”

¹⁶Delilaüh apatü ajekhaiu tsütokü sanglutkü noin shioko, apa nengnengtsün thaiutha apa akiahaili tanatkü iula,

¹⁷küta apaüh aphiting nai Delila hau ngiotsüo nou phekde. Apaüh ngiom, “Jü khaiuo tilaitso tsü iuwan.” “Ngo achet nai yanou losaokü Goa tü thumkü losiokü Nazarene tsak noikü shin, Jü khaiuo iuwan naito, jü oukong mowane, naiuso amaohaililu outsükongkü iula-e.”

¹⁸Tilai Delilaüh apahau ngiotsüo nou chite-iu ta ngela, apaüh Filistiahai nokpao nouso dongai ngio- ngem hongkü ngiom, “Lo jam laokü ashishi. Apaüh ngü hau ngiotsüo nou chite-iu.” Nungai ngüso tangkason nou kankü shin.

¹⁹Delilaüh Samson apa shiokha chiai saila-iao sailokü taiunai Samson khaiuo awoi chinyat nouso iuwan kiuao khaiunia tsak tü jon. Nungai Delilaüh apatü angja kiuao yalo, tititenai Samson apa oukong mowankü noiküla.

²⁰Nungai apaüh wekü jon, “Samson! Filistiahai shianji!” Apa asaitaiu ainou chüo nai apaüh, “Ngo asaita chhikü shitsünli meikü khu-e ta yang.” APAOU nou apa leaniu ta apaüh tsüngekü noiküla.

²¹Nungai Filistia haiüh apa thaloküta apa niovei hüonshian kiu. Ngüsoüh apa Gaza nai nialoukü khu, apatü sonkhiang nou ke, küta apa aketsam nai thamthao au wanan.

²²Apa khaiuo loüh samsanshi.

²³Filistiahai nokpao nousoüh ngüso goa dagon hau chaithio asong kiukü monglengau kamshi. Ngüsoüh jih hangkü ngiom, “Sam goaüh sam eh Samson shioloi-iu!”

²⁴Ngüso monglingekü noi taoko, ngüsoüh ngiom, “Samson lüjon, küta samüh apa hau lonyai-iko!” Tilai ngüsoüh Samson akho tsam ainou nialokü shin, ngüsoüh apa hau lonyai-ikü noiküla, naiuso apa kheam nouso jetko tsakü noi-i. Tilai khaiuniahoi nousoüh apa ep, “sam goaüh sam eh, sauüh sam goumchi lotheankiu, naiuso khaiunia piakü loatan, apa shioloi-iu” ta ngüso goa nianlomkü jih hang.

²⁶Samsonüh apa pha ai hekü niakeitsün melothso tü ngiom, “Tsam thengtaiutsün kheam nousotü ngo heloau mongchioji, ngo nungso da niolutao aiuji.”

²⁷Nung tsam melo menyiuhoi nousoüh meankü, naiuso Filistiahai nokpao pungo nouso apem nungko hakü, tsamkhaiu chiai noitsün melo menyiu apem nai heng 3, 000 thatso ngüso nungko Samsonüh lonyaitsün tü thapkü noiküla.

²⁸Nungai Samsonüh misao sao, “O APAOU, Goa, ngo nitü kojaji, ngo ayangsanshi-i, naiuso loüh jam oukongkü a-iula-ishi, O Goa, ngo jü niovei nime lowantsün thaiutha jamlu lüko, ngü hau Filistia hai tü phao nou ashan-ishi.”

²⁹Nungtiphe Samsonüh tsamwem kheam nime noutü thaloküta tsam nou loksan. Apa pha e pungkü kheam noutü tha- loküta ngüso chiai thoilutkü wekü ngiom,

³⁰“Ngo Filistia haiko aikü eane!” Apaüh apa oukong apem nou saiusaiu, nai nung tsam nou nokpao pungo nouso hakü khaiunia apem chiai loilut. Samsonüh apa aakihlaiu taoko loattsün ko naito, apa eantaoko loattsün piatso noiküla.

³¹Apa deisinioso naiuso tsam- mongso apa mea loau saom. Ngüsoüh apa mea lokü yakü apa po Manoa etam Zora ai Estaol jetko khannan. Apa Israelhai khaiuko mikhem ponkhei thekü noiküla.