Read Khiamniungan Naga Mikhem 17 Bible Online

Mikhem 17 - Khiamniungan Naga bible

Mikhem 17

¹Efraim king goh nai khaiunia tsak Mika ta niankü noiküla.

²Apaüh apa nyiutü ngiom, “Tilai khaiunia ajantsoüh nung tangkason tsom chekü tsak nouso ni ainou kaolowan, nung kao nou hau athesan tsak kiu. Nung chhitsün ngü lulakü noiküla. Athaplu, nung tangkason nouso ngo taim, nung lotsün khaiunia nou ngü noin.” Apa nyiuüh ngiom, “Jüthso, APAOU nou lü oukkiu!”

³Apaüh nung tang- kason apa nyiuhau laokü kiuwan naiuso nyiuhai nou ngiom, “Jüthso khütha ai shiao noitsün athesan lolaoau ngo jüchija nung tangkason nou APAOU hau losiokü kiuwanji. Nung tangkason nou pai sotsom tsak nyingjeikü shanao kankei-e. Nung- tiphe lo, ngo nung tangkason nouso nihau laokü kiushi-e.”

⁴Küta apaüh nungso apa nyiuhau laokü kiuwan. Nyiuhai nou tangkason tsom nime loküta nungso sotsom langtsün hau kiuwan, apaüh nung sotsom sauüh tangkason nou nyingjeikü shankü noiküla, apahau kiuwan, naiuso nung Mika tsamai taiuküla.

⁵Nung taiutsün athang Mika ün tengkhaiu amkhamtsün athang noi- küla. Apaüh sotsom ajantso naiuso meson shitho ajantso ta shanküta apa thsoso ongko meson au tsak the-i.

⁶Nungtaoko Israel nai nokpao tsünoiküla, khaiunia pungkü nou momoüh mongchiotsünli chhin.

⁷Nungtaokolu Yihuda nai Betlehem noksong nouko Levihai oum tsak noiküla.

⁸Apaüh athang amao tsak nai kih ao thaiutha ko Betlehem lean. Apa tsakeitsün taoko Efraim king goh nai Mika tsamai shin.

⁹Mikaüh apatü sangkü ngiom, “Ni ti ainou shiji?” Apaüh thalakü ngiom, “Ngo Yihuda nai Betlehem noksong ainou Levihai tsak noin. Ngo akih ao athang tsak tü yamji.”

¹⁰Mikaüh ngiom, “Ngüko anoiha. Jüyam hantsün meson tsakli athe, naiuso ngo nihau pon tsakko tangkason che kiu-e, naiuso atheao neshe ajantso naiuso eheshiu kiu-e.”

¹¹Nung oum khaiunia nou Mikako kiha au thalo, naiuso apa Mika thso tsakli iula.

¹²Mikaüh apa meson ao the-i, naiuso Mika tsamai kih.

¹³Mikaüh ngiom, “Loto ngo Levihai tsak jü mesonli taim, nungtiphe loto APAOU nou jüthaiutha alum tsüomeikü shankiu-e.”