Read Khiamniungan Naga Mikhem 18 Bible Online

Mikhem 18 - Khiamniungan Naga bible

Mikhem 18

¹Nungtaoko Israel nai nokpao tsünoiküla. Nungtaoko nai Dan kau nousoüh tengkamao goumchi tsak pokü yamkü noiküla, tiautenai nung saokü nouko Israel- hai kau nouso ongko ngüso tengkam goumchi mosonkiu hakü noiküla.

²Nungtiphe Danhaiüh ngüso kau apem ainou a-nge khaiunia pungo shingsankü Zora naiuso Estaol noksong ainou tengkam lohaau noitsün goumchi tü thsalukü tsakeiluao thaiutha ayamhan kiukü hong. Naiuso tilai ngüso king goumchi Efraim ai shisaom, ngüso Mika tsamai sao.

³Ngüso nungko noitaoko ngüsoüh oum Levihai nou sang-i ngela, nungtiphe ngüso apa dongai sungküta sang, “Ni nungko ti chhiji? Ni nungai sauüh niajikan?”

⁴Apaüh thalakü ngiom, “Ngo atuh mesonli yathsüoau Mikako akhem- taiu tsak noin.”

⁵Nungai ngüsoüh apatü, “Sam khutsünko ashio epe süne tsüepe ta Goa tü asangkiu!” ta kojakü apatü ngiom.

⁶Naiuso meson nou thalakü ngiom, “Asam ti thaiutha yangelatao tsünoi, asam khutsün nai APAOU nou paotsang kiuji.”

⁷Nungtiphe khaiunia pungo nouso apako pungeküta Lais noksong ai shin. Ngüsoüh nungai Sidonhaili khaiuniahoi nouso alokü noitsün ep. Nungko ngüso mongtsamkü, sauko ti angemsingem tsüsonkü tangsep meikü, ngüsoüh potsün alum taiukü noiküla. Ngüso Sidonhaiko laiukü jetekü sauko chanekü tsünoiküla.

⁸Tilai khaiunia pungo nouso Zora naiuso Estaol ai laokü yashin ngüso khaiuniaüh ti epsankü noin ta sang.

⁹Ngüsoüh thalakü ngiom, “Atsalo,” “Samüh Lais hai komheanko. Samüh goumchi nou epiu, naiuso nung thatü meikü noin. Nungko titso tsüchhikü lanoian, liukü! atsalo küta goh nou thaloko!

¹⁰Tilai asamüh nungh sao- e, asamüh nung khaiuniahoi nouso da tikotso mongtsülamkü tsüepsane. Nung goumchi nou songkü noin, nungko a-aiutsün jengtsaiu alum noin, naiuso nung Goa nou asam hau kiuwaniu.”

¹¹Nungtiphe Dan kau ainou khaiunia tsom luok Zora naiuso Estaol ainou tsalokü ehliao thaiutha khemlo.

¹²Yihuda nai Kiriat Jearim tü ajenap nai ngüso sungküta asaothang shan. Nung shioko nung athang noutü losaokü Dan saothang ta jonji.

¹³Ngüso nung ainou tsülaokü khuküta Efraim king goh nai Mika tsamai laokü shin.

¹⁴Nungai khaiunia pungo Lais goumchi lemkü kautha ao khutsün- soüh ngüso deisiniosotü sang, “Nung tsam nouso ongko tsam tsak nai sotsom tsak tangkason nou chüojeikü noin ta asamüh ngejimo? Nungko amao goa sotsom naiuso, meson neshe lüko taim. Nungtiphe asamüh ti chhi-e lüyanglu?”

¹⁵Nungai ngüso Mika tsamai napnai, oum Levihai nou kihkü ep, nungai apatü titi noin ta sang.

¹⁶Nungailu Dan ainou süpai tsomluok nouso ehliao khemlokü bekhan nai tsakü noi.

¹⁷Akauthahoi khaiunia pungo nouso tsamai saitha khuküta napkü sotsom sübao tangkason nou chüojeikü taiu, amao sotsom nouso, naiuso meson neshe nouso lowan, nungai meson nou bekhan nai süpai tsomluok nousoko hakü noiküla.

¹⁸Tilai khaiuniahoi nouso Mika tsamai nap, ngüsoüh asio jengtsaiu nouso lowan, naiuso nungai ngüsotü meson nou, “Asamüh ti chhiji?” ta sang.

¹⁹Ngüsoüh ngiom, “Ni nyankü anoian. Ngio tsaktso lasingio. Samko ashi, küta sam meson au naiuso ayamhan au athe. Tsamkhaiu thaiu- tha meson theantsün koto, athaiutha Israel mele apem thaiutha meson theao tsümei-e süne?”

²⁰Nung ngio nou meson thatü monglingkü iula-i, nungtiphe apa asio jengtsaiu nouso loküta ngüsoko hoilutkü khuha.

²¹Ngüso laploküta, ngüso thsoso, thainianso, naiuso jengtsaiu nouso khaau the-ikü tsalokü khu.

²²Tilai Mikaüh apa phaosiposo ehli ao thaiutha jontsün taoko ngüso tsam ainou intso laiukü khuwankü noiküla, ngüsoüh Dan kauso tha-iu.

²³Küta ngüsotü wekü ngionai, Dan kau nousoüh lapkü shiküta Mika tü sang, “Tiauta ngemmatji?”

²⁴Mikaüh thalakü ngiom, “Asamüh ngo shantaiutsün sotsom nouso, naiuso meson nou nialokü khuwanji, lüko ngü hauto ti in poi- taiukiukü noin? Atsüoting tünaito, tiau asamüh ngü tü, ‘Ti in nou angja-iji ta sangji?’”

²⁵Dan kau ongai nousoüh apatü ngiom, “Ni nung khaiunia nouso mongmatikü, naiuso asam komaniao tsüaiu naito, ni ngüsotü ngio titso tsüngiokü noianbao chen. Nungti tsüdekünaito, ni naiuso atsamkhaiu athum mowane.”

²⁶Küta ngüso tsülaokü khuwan. Mikaüh ngüso thatü kongsimong kü ep, nungtiphe apa phoklekü tsamai laokü khuwan.

²⁷Dan kau nousoüh meson naiuso Mikaüh shantaiutsün sotsom nouso lowankütün phiai Betrehob tsamei ai alokü noitsün, khaiuniahoi, naiuso noksong Lais khukü koman. Ngüsoüh nungko kihtsünso loatküta noksong nou jekthiowan. Nungko ngüso kipsanao sau tsünoiküla; tiau- tenai Lais noksong nung Sidon ainou laiukü jetekü noiküla, naiuso ngüso amao khaiunia sauko tsümei-e. Dan kau nou nung noksong shanshi küta ngüso nungko kihshi.

²⁹Ngüsoüh Lais nok nian nung ngüso paosipo Yakob thso Dan nianphi nianlo.

³⁰Dan kau nousoüh ngüsoüh amkhamao sotsom shan naiuso Mosa thsao nou Gershom thso Jonathanüh Dan kau thaiutha meson tsakli yathsüo, naiuso khaiuniahoi nou thalokü mokhuwankün lektso apa thsaosithsosoüh ngüso hau chhisiya yathsüo kium.

³¹Shilo nai Goa amkhamtsün Nejenkhio nou mosoiankün lektso Mika ün sotsom lüko nungtao chikü nungai taiuküla.