Read Khiamniungan Naga Mikhem 19 Bible Online

Mikhem 19 - Khiamniungan Naga bible

Mikhem 19

¹Israel nai nokpao monoikün taoko Levihai tsak Efraim king goh athun nai kihkü noiküla. Apaüh Yihudahai Betlehem ainou nyiu-ib tsak jonlo,

²naiuso nung menyiuthso nou Levihai nouko mongmatkü Betlehem nai apa po tsamai khukü alei püle noian.

³Nung Levihai nou nung menyiuthso dongai khukü apa laokü ashi ta koja au khu, apaüh apa tsamkih naiuso gado nime apako nialokü, nung menyiuthso nou Levihai nou apa tsamai niathio, nungai apa poüh apa ep, apaüh Levihai nou monglingkü nialo.

⁴Pohai nou apatü nungko shamanao koja, nungtiphe apa samnyi nungko shaman.

⁵Nungthan nyap chüoküta ngüne akhuau khemlo. Lüko nung menyiuthso nou poüh Levihai noutü ngiom, “Aje oukongau thaiutha tsotsak lühe, küta aje khuau shio-e.”

⁶Nungtiphe khaiunia nime neüh heshiu nai, menyiuthso poüh apatü ngiom, “Tsüojinyangkü lüsoto nungko alokü lünoian.”

⁷Nung Levihai nou akhuau chüonai, menyiuthso poüh apatü anoian ta koja, nungtiphe apa loüh sotsüo nungko shaman.

⁸Pungo nyap nouko ahom beta Levihai nou akhuau tsalo, lüko menyiuthso poüh ngiom, “Tsüojinyangkü tsotsak lühe, küta a-mongekün lektso taiukü anoi.” Nungtiphe khaiunia nime neüh heshiu.

⁹Tilai Levihai nou, apa nyiu-ib, naiuso apa tsamki lojam akhuau tsalo, pohai nou ngiom, “Athaplu, loto tsanganiu, asam lüsoüh nungko anoian. A nou shakta nya-ane, nungko noikü lü alowan. Lühom beta chüoküta asam tsamai yaau shio-e.”

¹⁰Lüko Levihai nou loto shamshiao tsümongchio, nungtiphe apa naiuso apa nyiu-ib ne, ngüso tsamki, naiuso gado nime thsa meankü kankü khuau tsalo. Ngüso Jebus (Yirusalem) shimkü shinai, ah nou li-ankü noiküla, nungtiphe tsamki nou apa APAOU tü ngiom, “Sam lüsoh nung Jebushai noknioko alokü tiauta tsü shaman?”

¹²Lüko apa APAOUüh ngiom, “Israelhai tsükihkün noknioko sam tsüshame. Samüh intso laiukü yankü khuküta Gibea nai tsüdekünai Rama nai shamane.”

¹⁴Nungtiphe ngüso tsülaokü Jebus noknio yankü khu. Ngüso Benjamin goumchi Gibea nai shisaonai, aje napankü noiküla.

¹⁵Nungai ngüso Gibea nai shamao laokü khu. Ngüso nung noknio nai napküta kengpun nai moknoi, nungsoh nai ngüso alo-iau sauüh tsam tsükiu.

¹⁶Ngüso nungko noitsün taoko, pohai tsak eiu ainou yakü noiküla. Apa atsüoting to Efraim king goh ainou noiküla, lüko lo apa Gibea nai kihküla (nungai kihtsün amao khaiunia nouso Benjamin kau ainouso noiküla.)

¹⁷Pohai nou noknio kengpun nai saikeitsün khaiunia nou epkü apa tü sangkü ngiom, “Asam ti ainou shiji, naiuso tiai khuji?”

¹⁸Levihai nou thalakü ngiom, “Sam Yihuda nai Betlehem noksong ainou noin, küta lo sam, Efraim king goh nai sam tsamai khuji. Ngo alo-ikü nialoau khaiunia sau tsünoi.

¹⁹Sam gado thaiutha chih si tsokap, naiuso jü nyiu-ib je naiuso jütsamki thaiutha themtsai si thengto kankü noin. Samüh potsün samüh alum kan.”

²⁰Pohai nou ngiom, “Asam jütsamai monglingkü loji! Asam kengpun nai shamao tsünoi, ngo asam paotsange.”

²¹Nungtiphe apaüh ngüso apa tsamai niathio naiuso ngüso gado hau waoshen. Apa mesansoüh hok tsawanlo naiuso heshiu.

²²Ngüso mongtsamkü noitaoko, alekta nung noksong ainou ajisiwop chhitsün ajantsoüh tsam lemloküta kuokhan tü haiu ao tsalo. Ngüsoüh pohai nou tü ngiom, “Niko nialokü atsamai shitsün khaiunia kengchiai nialokü ashi! Samüh apako ajisiwop chhiao aiuji!”

²³Lüko pohai nou kengchiai shiküta ngüsotü ngiom, “Nyah,! Jühaiso! Tsüojinyangkü! Nungti nou tsümeikün chhi, ajisiwop chhi lachhi! Nung khaiunia nou jü mesan noin.

²⁴Athaplu! nungko apa ün nyiu-ib naiuso jüthso asangting tsak noin. Ngo ngüso lo kengchiai nialokü shi-e, küta asamüh ngüsotü asamüh mongchiotsünli lüchhi. Asamüh titi aiuji ngüsotü lüchhi, lüko nung khaiunia noutü tsütinkün titso lachhi!”

²⁵Lüko khaiunia nousoüh apa ngio tsü-ang. Nungtiphe Levihai nou apa ün nyiu-ib nou nialoküta ngüso hau kengchiai taiukiu. Ngü- soüh apatü mongdem ajisiwop chhi, naiuso ah thangekü apa lothekiu, naiuso ahom saokü nung chhisiya tsülaolo.

²⁶Ah shiochan nung menyiu nou shikü apa tsammongpo noitsün pe- che kuokhan dongko loian. Ah ngetao lüko apa nungko noiküla.

²⁷Apa tsammongpo ahom chüoküta apa shiao kuo sopantsün tao apaüh apa ün nyiu-ib tsamkha nouko apa pha nou kuokhan tü heloau tsatphukü ep.

²⁸Apaüh ngiom, “Achüo, sam khuko” Lüko ti tsüthashi. Nungtiphe apaüh nung menyiu pem gado chiai loklutküta tsamai khu.

²⁹Tilai apa tsammongai nap, sah tsak lo. Nungai apaüh apa ün nyiu-ib pem haoson chekü nime hau thekü tappek, küta nung Israelhai mele kau chekü nime dongai haoson tsak tsak sonpeng.

³⁰Nung eptsün khaiunia pungkü nou ngiom, “Samüh nungtin chhisiya tilaitso tsülude! Israelhai Ijip wankü khuküta nungtin tilaitso tsüthawaode! Nung thaiuthako samüh tsotsak to chhiao noin! Nung ti chhikota?”