Read Khiamniungan Naga Mikhem 2 Bible Online

Mikhem 2 - Khiamniungan Naga bible

Mikhem 2

¹APAOU hongthon nou Gilgal ainou Bokim nai khuküta Israelhai tü ngiom, “Ngo asam Ijip ainou niasanküta asam paosiposo tü thalotaiutsün goumchi nai nialokü shin ta, ‘Ngo niko thalu-etsün tilaitso tsülothe-e.

²Asamüh nung goh nai kihtsün khaiuniako tilaitso athalou-e tsüshanao noin. Asamüh ngüso amthang lothekü wanao noin.’ Lüko ngo asamtü ti ngiom, nung asamüh tsüchhi!

³Nungtiphe ngo lo asamtü ngioji, asam khaai khunai ngo nung khaiunia nouso tsükoman kiu-e. Ngüso asam ehso noi-e, naiuso asam ngüso goa amkhamtsün jin tsangkü mone.”

⁴Tilai hong nou nung ngiom, Israelhai apem shapao yachu,

⁵nung shioko nung athang noutü Bokim ta jon. Nungko ngüsoüh APAOU hau aloat chaithio kium.

⁶Yihusuaüh Israelhai momo yamai hongpengan, naiuso khaiunia pungkü momo goumchi tengkam hao- son loau khu.

⁷Yihusua aa noitsün lektso, Israelhaiüh APAOU yathsüo, naiuso apa eanphi lüko aheihoi sauhaiüh Israel thaiutha APAOU nou chhisiya asong chhitsün epkü noiküla, ngüso aa noitsün lektso ngüsoüh APAOU yathsüokü shin.

⁸APAOU yathsüotsün Nun thso Yihusua aakihlaiu pon 110 nai apa ean.

⁹Apa Gaas king ajenapki nai Efraim king goh nai Timnat Sera athang tengkhaiu goh nai khanan.

¹⁰Nung vetao athum yankü khuwan, küta nungthan vetao nouto APAOU nou Israel thaiutha ti chhin nung bean.

¹¹Nungai Israelhaiüh APAOU thako angei sunlo naiuso Baal yathsüoau tsalo.

¹²Ngüsoüh APAOU, ngüso paosiposo Goa, sauüh ngüso Ijip ainou niasan nung amkhamtsün laowan küta ngüso lemkü noitsün khaiuniahoi nouso goa, amkhamao tsalo. Ngüsoüh nung goa sotsom nou- so khako kauthiokü amkham naiuso APAOU mongmat-in.

¹³Ngüso APAOU amkhamtsün laowan küta Baal naiuso Astarod goa sotsom nouso amkham.

¹⁴Nungtiphe APAOU nou Israel haiko mongmat sungküta akamheantsünso hau ngüso kamheanao thumkü kiuwan. Apaüh ngüso lemkü noitsün ehoi hau ngüso shiohean-in, naiuso loto Israelhaiüh ngüso meshen chija soloau tsüshio.

¹⁵APAOU nou ngio- tsünli, ngüso ehli ao iutsün pungkü APAOU oukong ngüsoko tsüha. Nungtiphe ngüso thatü monghenkü noiküla.

¹⁶Nungai APAOU nou Israel ongko akamheantsünso ainou kipsanao aheihoi sungi.

¹⁷Lüko Israelhaiüh ngüso aheihoi tü angio tsüang. Israelhaiüh APAOU tü mongtsükiu- shikü amao goa sotsom nouso amkham. Ngüso posoühto APAOU athoilut nouso angio angkü shin, lüko vetao ayan nouto angio tsüang.

¹⁸Tilai APAOU nou Israel hau ahei tsak kiu, APAOU nou apatü hachu naiuso apa aa kihtsün lektso ngüso ehoi ainou khaiunia nouso kipsankü shin. APAOU ngüso khako atsüojinyang noikü shin tiautenai ngüso angja omhe ajeiat nai ngetkü noiküla.

¹⁹Lüko tilai ahei nou ean, Khaiuniahoi nouso akeng saisile nouso ai laokü khushi küta ngüso paosipo vetao nou ta phopkü tsaokü iulashi. Ngüsoüh amao goa sotsom nouso yathsüokü amkham, naiuso ngüso tsümeikün chhisiyaso leanao tsümongchio.

²⁰Nungai APAOU nou Israel tü mongmatkü ngioji, “Ngo ngüso paosiposotü thoiluttsün athalou-e nung mele nou lotheaniu. Tiautenai ngüsoüh ngütü angio tsüang.

²¹Loto ngo Yihusua eantsün taoko amao mele sauhai kihkü noiküla nungso sautso tsükomane.

²²Ngüso paosiposoüh chhikü shit- sünli, Israelhaiüh jüyam tü hoilute süne tsühoilute, nung epsanao ngo ngüso kankei-e.”

²³Nungtiphe APAOU nou nungso mele nouso ngüso goumchi nai kih ao sopkiu; apaüh Yihusua hau ngüso khako ashio nou tsüepi, naiuso Yihusua ean phiai lüko ngüso tsükoman.