Read Khiamniungan Naga Mikhem 20 Bible Online

Mikhem 20 - Khiamniungan Naga bible

Mikhem 20

¹Israelhai apem ajenapki Dan ainou ajepekki Bersheba saokü, naiuso ajepek nai Gilead goumchi ainou lüko hakü ajontsün thalakü ngüso APAOU khako Mizpa nai tsakhau thekü kamshi.

²Nung Goa ün khaiuniahoi kamshitsünko Israel kau apem ainou aheihoi hakü naiuso nungko hokko keitsün süpai heng 400, 000 noiküla.

³Nung taoko Benjaminhaiüh Israelhai apem Mizpa nai kamshikü noin ta lula. Israelhaiüh sangkü ngiom, “Nung tsümeikün chhisiya titi thawao samtü angio?”

⁴Levihai sau ün nyiu-ib loatkü noiküla apaüh thalakü ngiom, “Jü nyiu-ib je Benjamin goumchi Gibea nai sotso aloau khu.

⁵Gibeahaiüh ngü loatao asoh shikü tsam nou lemlowan, ngüso ayangtaiu nou ngo loatao noiküla, nungliko ngüsoüh jü nyiu-ib tü ngüsoüh mongdem ajisiwop chhiküta apa ean.

⁶Ngo apa mea lokü nelangkü tappek, küta nung Israelhai kau chekü nime nouso dongai haoson tsak tsak hongpeng. Nung khaiunia nousoüh sam mongko angei naiuso ajisiwop chhisiya chhikü noin.

⁷Asam nungko noinso apem Israelhai noin. Nung thaiuthako samüh ti chhiao noin?”

⁸Nungai khaiunia apem aikü tsa- küta ngiom, “Tsamai kihtsün lüko, nejenkhio ai kihtsün lüko, sam saulünou tsamai laokü tsükhu-e.

⁹Samüh nungti chhi-e: samüh phongdeküta Gibea komanao khaiunia ajantso chosane.

¹⁰Israel kau apem ainou haoson che nouko tsak ta vesankü süpaihoi hau eheshiu kankü shikiu-e, küta amao nouso khukü Israel nai ngüsoüh ajisiwop chhikü kankeikü shitsün thaiuthako Gibeahai hau angja kiu-e.”

¹¹Nungtiphe Israelhai apem ayangtaiu chhi tsak thaiutha noksong nou komanao kamshi.

¹²“Nungai asamüh nung tsümei- kün chhi ti chhisan? ta ngioau Israelhai kau nousoüh Benjamin kau haoson goumchi thapekkü khukü ngio-iu ao ngiongem kantsünso hong.

¹³Nung Gibea nai ajisiwophoi samüh lomowanao naiuso Israel nai angei lowanao thaiutha akiuwan.” Lüko Benjaminhaiüh amao Israelhaiüh ngiotsün tü mongtsükiukü lean.

¹⁴Benjamin kauhoi noknio nouso apem ainou Gibea nai amao Israelhai thako ehliao shin.

¹⁵Nung ajekhaiuko nai ngüsoüh süpai heng 26, 000 ngüso noknio ainou chosan. Loüh nung haove mongko tsühakü phatsat khaiunia apem nai Gibeahai paopunghoi tsom 700 mothikü chosankü taiu. Nungso chikü nou watthat tsüphiokü peptsün phatsanghoi noiküla.

¹⁶

¹⁷Israel kau apoi nouso ainou süpai dun kankei montsün heng 400, 000 kamsankü noiküla.

¹⁸Israelhai tsaloküta amkham- thang Bethel nai khu, küta nungai ngüsoüh Goatü sangkü ngiom, “Benjamin haiko ehliao sam sau kau chong khu-e?” APAOU nou thalakü ngiom, “Yihuda kau chong khu-e.”

¹⁹Nungtiphe Israelhai nungthan nyap ahom tsalokü khuküta Gibea noknio shimkü shamkü noi.

²⁰Ngüso Benjamin süpaihoi komao khukü süpaihoi nou noknio tü lalutkü noi-i.

²¹Benjamin süpaihoi noknio ainou shiküta ngüsoüh aje monapkün khako Israelhai süpaihoi heng 22, 000 loatkü wan.

²²Nungai Israelhai amkhamthang nai khuküta APAOU khako asham saokü mongsaiukü noiküla. Ngüsoüh Goa tü sangshikü ngiom, “Sam deisinio Benjaminhai thako ehliao loüh khushi-e süne?” APAOU nou thalakü ngiom, “Ngüso thako ehliao lükhushi.” Nungtiphe Israelhai süpaihoi monglosongshi, küta ngüsoüh süpai- hoi nouso nungthaiu ajekhaiu nouko ehjiothang nai noi-itsünli jimshi.

²³

²⁴Ngüso Benjaminhai süpai thako müjam nou ehliao tsalokü khu.

²⁵Müjam nouko Benjaminhai süpai- hoi Gibea noknio ainou shin, nung taoko nai ngüsoüh Israelhai süpaihoi dun kankei montsün heng 18, 000 loatkü wan.

²⁶Nungai Israel khaiunia apem Bethel nai sungküta nungai mongsaiukü noiküla. Ngüso APAOU khako moknoikü asham tü thalutkü titso tsüheshiu. Ngüsoüh nungko alo chaithio naiuso ajahtsün chaithio ajantso APAOU hau kiu.

²⁷Nungtaoko nai Goa ün Athalue Paidan Bethel nai taiukü, Aron thsao, Eleazar thso nou Phinehas nung khemko apaotsang thekü noiküla. Khaiuniahoi nou APAOU tü sangkü ngiom, “Sam deisinioso Benjaminhaiko sam loüh khukü ehli-e süne tsüdekünai laolowane?” APAOU nou thalakü ngiom, “Lüli-e. Lühomto ngo ngüso khako asam hau ashiolotsün kiu-e.”

²⁸

²⁹Nungtiphe Israelhaiüh Gibea lemkü süpaihoi ajantso pamkü noi-i.

³⁰Nungai ngüso Benjamin süpaihoi thako ajekhaiu samnyi chikü likü shiküta samnyap nouko ngüso süpaihoi Gibea tü lalutkü ehlithang nai noi-i.

³¹Benjaminhai süpaihoi ehliao noknio ainou shiküta ngüso pengpun. Aya naililu, ngüsoüh Israelhai Bethel naiuso Gibea yamai naiuso ajantso kengpun nai loatao yachu. Ngüsoüh Israelhai khaiunia aosam thatso loattan.

³²Benjamin khaiunia nousoüh ngiom, “Samüh nung thaiuko chhikü shitsünli ngüso samüh shioheanji.” Lüko Israelhaiüh to ngüso noknio ainou yamai taishiküta nanao ayang- taiu noiküla.

³³Nungti tilai Israelhai süpaihoi soikü shiküta Baaltamar nai kamloshi, nungai noknio lemkü king nouso ai jiopeng noitsünso alekta ngüso ehjiothang ainou kamshi.

³⁴Israel apem ong ainou mothikü chosantsün heng 10, 000 noiküla, ngüsoüh Gibea komhe, nung ehli thatü thsüokü noiküla. Benjamin haiüh ngüso mowane ta ayang tsünoiküla.

³⁵APAOU nou Israelhai hau Benjamin khako ashiolotsün kium. Nungh ajekhaiuko Israelhaiüh ehoi heng 25, 100 loatkü wan.

³⁶Nungai Benjamin haiüh ngüso shioheaniu ta ngela. Israelhai apia nouto Gibea ai ngüsoüh lemkü jiotaiutsünso tü monglamkü Benjaminhai ainou laokü shian.

³⁷Nung khaiunia nouso Gibea nai liukü khuküta pengpunkü nung noknioko noitsün khaiuniahoi loatkü wan.

³⁸Israel atengting süpaihoi apia nou naiuso ehjio nai pamtaiutsün khaiuniahoi nousoüh ii tsak kiuao khemtaiu. Tilai noksong ainou inkhao thengmiakhaoli asong tsak khaosantsün eppe,

³⁹ehlithang nai khukü noitsün Israelhaiüh lem- lokü phokleao noiküla. Lüko nung taokoto Benjaminhaiüh Israelhai heng 30, 000 loatkü wan. Ngüsoüh ngüso chija ngemhekü ngiom, “Samüh ngüso atsüoting nung thaiuko chhikü shitsünli shiolowaniu.”

⁴⁰Nungai ii hantsün nung noksong ainou inkhao thengmia sungtsünli yachu. Benjaminhaiüh ngüso phiai thapshinai noknio athum nung in nyaitsün epsankü ngawan.

⁴¹Nungai Israelhai laokü shin, Benjaminhai henyikü noian, tiautenai ngüso mowanao noin ta ngela.

⁴²Ngüso Israelhai ainou kengpun nai jingkü khu, lüko ngüso tsüthakhu. Ngüso süpaihoi apia nou si khaiunia sauhai noknio ainou shikü noiküla ngüso nungkolu thalowan-in.

⁴³Israelhaiüh ehoi tü jiotaiuküla, naiuso ngüso tsülaolokü Gibea ajepek saokü, akhotsün taoko chaoat chaoatkü komkü khu.

⁴⁴Benjaminhai süpai ameiting heng 18, 000 loatkü wan.

⁴⁵Amao nouso Rimmon Lung dongai kengpun nai jingkü khutsün yamko ngüso heng 5, 000 loatkü wan. Israelhaiüh Gidom saokü apoi nou- sotü tsülaokü komkü khuküta heng 2, 000 loat.

⁴⁶Amongsong süpaihoi apem nung ajekhaiu ko Benjaminhai heng 25, 000 loatkü wan.

⁴⁷Lüko apoi nouso khaiunia tsom 600 Rimmon Lung dongai kengpun nai solokü, ngüso nungai alei püle kih.

⁴⁸Benjaminhai apoitaiu nouso thako Israelhai laokü shiküta melo, menyiu, methsoso, naiuso thainian apem loatkü wan. Ngüsoüh nung shingkhan nouko noitsün noksong nouso apem jekthiowan.