Read Khiamniungan Naga Mikhem 21 Bible Online

Mikhem 21 - Khiamniungan Naga bible

Mikhem 21

¹Tilai Israelhai Mizpa nai kamshi, “Sam sauühtso Benjaminhai hau sam menyiuthsoso tsamsigoh yangau tsükiu-e,” ta APAOU khako athalue tsak shankü noiküla.

²Nungtiphe Israel khaiuniahoi Bethel ai khukü nungai APAOU khako ngüso asham saokü moknoi küta ngüsoüh nungai sang songkü naiuso mongsaiukü shap.

³“APAOU, Israelhai Goa, nung tiauta thawao-in? Israel ainou Benjamin kau tiauta mowanaoli noiküla?”

⁴Nungthan ahom beta khaiuniahoi nousoüh nungko amthang tsak shan, küta ngüsoüh aalo chaithio naiuso ajahtsün chaithio kiu.

⁵Ngüsoüh sang, “Mizpa nai APAOU khako kamshitsünko tsükhuhakü Israelhai kau ong ainou ajantso noianmo?” (Mizpa nai tsükhuhakü ajantso noi naito, loatkü wane ta ngüsoüh ngio- mongshinge tsak shan.)

⁶Israelhaiüh ngüso deisinio Benjaminhai thaiutha yangelatkü ngiom, “Lonyi Israel ong ainou kau tsak mowaniu.

⁷Benjamin kau pohai poikü noinso hau tsammongnyiu kiuao sauüh ti chhi-e? Samüh sam menyiuthsoso saulünou ngüso hau tsamsigoh yangau tsükiu-e ta samüh APAOU tü ngiomong shinge tsak shananiu.”

⁸Tilai ngüso Mizpa nai khukü kamshitsün tao Israelhai kau ongko nou ajantso tsükhuhakü noi süne tsünoi ta sang nai, ngüsoüh Gilead nai Jabes kau ainou tsaktso tsü- khuhakü epsan;

⁹süpaihoi nianjon taoko Jabes kau mongko sauüh tsü- thala.

¹⁰Nungtiphe akamshihoi nou, “Khukü Jabes nai noitsün menyiu methso apem,

¹¹melo naiuso menyiu sauhai asangting tsüde, ngüso loatkü lüwan ta ngiokhem kiukü mongsong khaiunia heng 12, 000 hong.”

¹²Jebushai ongko ngüsoüh asangting menyiu tsom 400 epsan, küta Kanan goumchi nai noitsün Shilo nai ngüso saothang ai nialokü shin.

¹³Nungai akamshihoi apemüh Rimmon Lung dongko Benjaminhai sauhai solokü noin, ngüso dongai ehli nou laowanao ngio hong.

¹⁴Benjaminhai laokü shin, naiuso amao Israelhaiüh Jabes ainou ngüsoüh tsüloatkü niakantsün menyiuthso nouso ngüso hau kium. Lüko ngüso nungsoüh tsüpong.

¹⁵Khaiuniahoi nou Benjaminhai thaiutha mongkiakü yangkiu, tiautenai APAOU nou Israelhai kau tsüjeiaikü iula-i.

¹⁶Nungtiphe akamshihoi ahei nousoüh ngiom, “Loto Benjamin kau nai menyiuhoi tsüpoishi. Sauhai poisankü noin nung khaiunia nouso thaiutha tsammongnyiuhoi yamkiuao samüh ti chhi-e?

¹⁷Israelhaiüh kau chekü nime nou tsaktso tsümowan-iao noin. Benjamin kau kipsanao thaiutha samüh ayam tsak hanau noin,

¹⁸lüko sauüh ngüso hau sam menyiuthsoso tsamsigoh yangau tsükiuji, tiautenai sam kau ongko ajantsoüh sam menyiuthsoso Benjamin kau hau tsamsigoh yangi naito athesan lünoi ta shankiuwaniu.”

¹⁹Nungai ngüsoüh yang, “Shilo nai pon pungkü APAOU ün sümai tsak noiji, nung lo piamkü shisaoji,” (Shilo nung Bethel tü ajenapki, Lebanon tü ajepekki, naiuso Bethel si Shekem ne jetko noitsün yam tü ajepek nai noin.)

²⁰Ngüsoüh Benjaminhai tü ngiom, “Sainaoshep eiu ai khuküta pamkü

²¹naiuso jiokü lünoi. Tilai Shilo nai noitsün menyiuthsohoi sümai taoko jih hangao shi-e, nungai asam sainaoshep eiu ainou ashian. Asam khaiunia pungkü nou kojakü tsammongnyiu ao menyiuthso tsak tsak menyiuthsohoi ong ainou lülo, küta asamko aikü Benjaminhai goh ai laokü lükanlükhun.

²²Ngüso poso tsüdekünai deiso asam dongai shikü khengshi nai, asamüh nungti lüngio, ‘Tsüojinyangko samhau ngüso ataiukiu, tiautenai samüh ngüso sam tsammongnyiuso au theau ehli taoko tsütenlo. Asamüh ngüso asam chija tsükiuphe, asam athalou-e lothean- tsün ko aphio tsünoi.’”

²³Benjaminhaiüh nung chhikü noiküla, ngüso pungkü nou Shilo nai noitsün menyiuthsohoi jih hang taoko tsammongnyiu tsak tsak theao choloküta nialokü khuwan. Naiuso ngüso momo goh ai laokü yakü, ngüso noksong nouso shanshikü nungai kih.

²⁴Nungtaoko nailu amao Israelhai pungkü momo kau, naiuso tsammong, naiuso meshen tengkam dongai laokü khuwan.

²⁵Nungtaoko nai Israel nai nokpao tsünoiküla, nungtiphe khaiunia pungkü nou momoüh mongchiotsünli chhin.