Read Khiamniungan Naga Mikhem 3 Bible Online

Mikhem 3 - Khiamniungan Naga bible

Mikhem 3

¹Nungtiphe APAOU nou Kanan nai ehli tsühakünso mele ajantso Israelhai theluao thaiutha poitaiu.

²Apaüh nung Israelhai vetao pungkü nou ta ehli ao thaiutha tsüde, mo- thikü sauhai peh nai ehli tsü-iuhade, ngüso thaiutha noiküla.

³Kanan goumchi ainou tsükoman hakü poitsün Filistiahai noknio pungo, Kananhai, Sidonhai, naiuso Lebanon king ainou Baal Hermon king Hamat Aoyan saokü kihkü noitsün Hivhai noiküla.

⁴Ngüso Israelhai thaiu- thaau athelu tsakli noiküla, nung APAOU nou Mosa tsangkü ngüso paosiposo hau thoiluttaiutsün ta Israelhaiüh angio angsitsü-ang epsanau thaiutha noiküla.

⁵Nung- tiphe Israelhai, Kananhai, Hivhai, Amorhai, Perizhai, Hit hai, naiuso Jebushai, ongko kihloha.

⁶Israel- haiüh nung mele nousoko tsamsigoh yang, naiuso ngüso goa sotsom tü amkhamha.

⁷Israelhaiüh APAOU ngüso Goa bean, ngüsoüh APAOU thako angei sunhe naiuso Baal si Ashera sotsom nousotü amkham.

⁸Nungtiphe APAOU nou Israelhaiko mongmat, küta Mesopotamia nokpao Kushan Rishathaim hau ngüso shiolowani, naiuso apaüh ngüso chiai pon petjei nok-shing.

⁹Nungai Israelhaiüh APAOU tü venai apaüh ngüso sokthamao khaiunia tsak hongtsün nung Kaleb nio Kenaz thso Otniel noiküla.

¹⁰APAOU Onthso apa da saoküta apa Israel ahei iula. Otniel ehli iu, naiuso APAOU nou apa hau Mesopotamia nokpao khako ashiolo nou kium.

¹¹Nung goumchiko pon aopüle nokmei noiküla, nungphiai Otniel ean.

¹²Israelhaiüh loüh APAOU thako angei sunhe. Nung shioko APAOU nou Moabhai nokpao Eklon nung Israel tü kongkü iula-i.

¹³Eklon nokpao nung Amorhai si Amalekhai ta hoilut, ngüsoüh pengpai noknio ta jontsün Yeriko thalowan naiuso Israelhai ehli nai shiolo.

¹⁴Israelhai Eklon khemko pon chekü petjei kih.

¹⁵Nungai Israelhaiüh APAOU tü vekü jonküta apaüh ngüso sokthamau khaiunia tsak hong. Nung Ehud, phatsat khaiunia tsak Benjamin kau ainou Gera thso noiküla. Israelhaiüh Moab nokpao Ehud, Eklon dongai paopei kankü hong.

¹⁶Ehudüh apa thaiutha salaiu sahou nemtso ai monkü phasab tsak shan. Apaüh nung apa nekhem uai supkü taiu,

¹⁷küta apaüh Eklon hau paopei nou kiu, nung khaiunia thatü tsakü noiküla.

¹⁸Tilai Ehudüh paopei nouso kiuwan, apaüh nung paopei kantsünso laokü hongan.

¹⁹Lüko Ehud to Gilgal dongko sotsom langtaiutsün athang ainou Eklon dongai laokü khukü ngiom, “O Nokpao, ngo athaiutha akaungio tsak kankü noin.” Nungtiphe nokpao nou apa tsamki nousotü ngiom, “Sam pemsalu awanan!” Nungai ngüso apem khuwan.

²⁰Nungai nokpao nou apa tsampai atangsep nai noitaoko, Ehud apa dongai sungkü ngiom, “Ngo athaiutha Goa ainou ngiongem tsak kankü noin.” Nokpao nou tsakü chüo,

²¹Ehudüh apa nekhem uai salaiu suptaiu nou tensanküta nokpao thai nai chi.

²²Sah nou sapiu thalimkü chithio naiuso nung nyih nou nomjeian. Ehudüh nokpao thai ainou sah nou tsütenshi, naiuso nungko chinyan nou shih.

²³Nungai Ehud kingchiai shikhu, apa kou nou kiaploküta nyijei taiukü khuwan,

²⁴Tsamki nouso shinai kou nou nyijeikü ep, lüko ngüsoüh nokpao nou tsammongai alokü noin ta yang.

²⁵Ngüsoüh mongaulaiu shilakü jim, lüko nung saokü apaüh kou nou tsüsopphe, ngüso chija sopannai apa nung uochi nai eankü ep.

²⁶Lüko Ehud to ngüsoüh apa taiukü noi taoko khulowan. Apa lung langtaiutsün yankü khukü Seira nai khulo.

²⁷Tilai apa nung Efraim king goh nai shisaom, apaüh Israelhai tü ehli ao jangongmatkü jonküta apaüh ngüso king ainou nialokü saom.

²⁸Apaüh ngiom, “Jü phiai ahoilut! APAOU nou asam hau asam ehso Moabhai shioloau oukong kiu-iu.” Nungtiphe ngüso Ehud phi hoilutkü saoküta Moabhaiüh Yordan yankü noitsün athang nou khiaplo, naiuso ngüsoüh khaiunia tsaktso haiu yankü tsükhu-i.

²⁹Nung ajekhaiuko ngüsoüh Moabhai süpai ameiting nouso sautso tsüjashikü hengche thatso loatkü wan.

³⁰Nung aje- khaiuko Israelhaiüh Moabhai shiohe, loto nung goumchiko pon aopetjei alokü noiküla.

³¹Nungthanko ahei nou Anat thso Shamgar noiküla. Apaüh jangtso lemkeitsün pailai nou Filistiahai tsom luok thioatkü Israelhai kipsan.