Read Khiamniungan Naga Mikhem 4 Bible Online

Mikhem 4 - Khiamniungan Naga bible

Mikhem 4

¹Ehud ean phiai loüh Israelüh APAOU thako angei sunheshi.

²Nungtiphe APAOU nou Kanan nokpao Jabin Hazar noknio nai nokshingkü noitsün hau ngüso shiolowani. Apa süpai ahei Sisera melemaohai ün Haroshet nok nai kihkü noiküla.

³Jabin ün son nou langtsün ehli tsamkei tsom lükao taiuküla, naiuso apaüh Israelhai chiai nokshing tsümeitingkü alothe nou pon khei shingkü shin. Nungai Israelhaiüh APAOU tü ahachu thaiutha vekü ngiom.

⁴Lo nung taoko Lapidot tsammongnyiu Debora nung e-nyiu tsak noiküla, naiuso apaüh nung taoko Israel thaiutha mikhemkiu chhi chhikü noiküla.

⁵Apa Rama naiuso Bethel jetko Efraim king goumchi nai pengpai tsak khemko moknoikü Israelhai apa dongai mi khemkiu-iao shishikü noiküla.

⁶Ajekhaiu tsakko apaüh Napthali goumchi nai Kedes noknio ainou Abinoam thso Barak dongai hongkü ngiom, “APAOU Israel Goa nou nihau nung athoilut kium: ‘Napthali naiuso Zebulun kau ainou khaiunia heng che nialokü Tabor king ai asung.

⁷Ngü Jabin süpai ahei Sisera, Kishon Haiumong nai asam khako ehliao nialokü shi-e. Apa ehli tsamkei naiuso süpaihoi hakü shi lüko, ngo apa khako asam hau ashiolotsün kiu-e.’”

⁸Nungai Baraküh thalakü ngiom, “Ni ngüko hakü khunaito ngo khu-e, lüko ni ngüko tsükhu ha-etünaito, ngo lüko tsükhu-e.”

⁹Deboraüh thalakü ngiom, “Mei, ngo niko hakü khuha-e, lüko ni ashiolotsün thaiutha ti nianlom tsüepe, tiautenai APAOU nou Sisera menyiuhai tsak hau kiuwane.” Nungtiphe Debora, Barak ko aikü Kedes komao tsalokü khu.

¹⁰Baraküh Napthali naiuso Zebulun kauso Kedes ai khuau jon, naiuso apatü khaiunia heng che hoilut.

¹¹Nungtaoko nai Ken hai nou Heferüh apa nejenkhio Zananim nai Kedes dongko lampai shimkü lahsan. Apa Mosa le nou Hobab thsaosithsoso Ken hai ainou soikü khuwan.

¹²Tilai Siseraüh Barak, Tabor king ai sunganiu ta ngela,

¹³apaüh son nou langtsün ehli tsamkei tsom lükao naiuso apa khaiunia apem jonküta ngüso melemaohai ün Haroshet ainou Kishon Haiutü saokü hongpeng.

¹⁴Nungai Deboraüh Barak tü ngiom, “Lükhu! APAOU nou asam yam niaji! Lonyi apaüh Sisera khako ashiolotsün ni hau kiuwaniu.” Nungtiphe Barak apa khaiunia heng che nousoko hakü Tabor king ainou saom.

¹⁵Tilai Baraküh apa süpai hoisoko hakü Sisera kom, APAOU nou Sisera, apa khaiuniaso, naiuso ehli tsamkei nousoko hakü pülaikü iula-i. Sisera apa mokthso chi ainou saoküta hokjeko khulükhun.

¹⁶Baraküh apa ehli tsamkei naiuso apa süpaihoiso tü melemaohai ün Haroshet saokü kom, naiuso Sisera süpaihoi athum loatkü wan.

¹⁷Sisera, Kenhai nou Hefer tsam- mongnyiu Jael nejenkhio nai jingkü khu, tiautenai Hazor nokpao Jabin, Hefer ün tsammongko nokmei nai noiküla.

¹⁸Jael, Siserako pheteau kingchiai shikhukü ngiom, “amongai anap APAOU, tsühatkü jü nejenkhio mongai anap,” küta nung nyiuhai nou apa nejenkhio soai paman.

¹⁹Apaüh nyiuhai noutü ngiom, “Tsüojinyangkü ngü hau khiam ashiu ao akiu; ngo leji.” Nyiuhai nou nyaomeng tsak sopanküta apa hau ashiuao kiu küta loüh jam paman-ishi.

²⁰Nungai apaüh nung menyiu nouko chitekü ngiom, “Nejenkhio koukhan nai tsakü anoi, naiuso khaiunia ajantso shikü nitü nungko khaiunia ajantso noimo ta sangnai tsünoi ta lüngio.”

²¹Sisera thatü tanphe, apa niongao chikü saian. Nungai Jaelüh senkhaiuhop tsak naiuso nejenkhio chantsün paiyan tsak lokü apa dongai nyankü sungküta nejenkhio chantsün paiyan nou apa nouthek nai lathiokü gohtü lalutkü wan.

²²Tilai Barak, Siseratü yamkü shin, Jael apako pheteau kingchiai shiküta apatü ngiom, “Nungai ashi! Ni yamtsün khaiunia nou ngo nihau hanko.” Nungtiphe apa nung nyiuhai nouko hakü tsamai napnai apaüh Sisera, apa khaiu nai nejenkhio chantsün paiyan nou lathiokü goh ai eankü ep.

²³Nung ajekhaiuko Goa nou Israelhai hau Kananhai nokpao Jabin khako ashiolotsün kium.

²⁴Israelhaiüh Kanan nokpao Jabin mothamokün lektso ngüso pha nou Kanan nokpao Jabin chiai phopkü jenkei.