Read Khiamniungan Naga Mikhem 5 Bible Online

Mikhem 5 - Khiamniungan Naga bible

Mikhem 5

¹Nung ajekhaiuko Debora naiuso Abinoam thso Barak neüh nung jih hang:

²APAOU lülomsan! Israelhai ehli aolu mongchiokü noiküla; khaiuniahoi nou thumkü kiuwan.

³Anglu, asam nokpao nouso! Asam nokpao nouso mongkiukü anglu! APAOU tü ngo jih hanglute, Israel Goa APAOU tü ngo jih hanglute.

⁴APAOU, ni tilai Seir king nouso lean, ni tilai Edom ainou sungh, goumchi nou ngaongao naiuso maou ainou ah uo saom, thengmia ainou ah thsüokü uo.

⁵Sinai King nouso APAOU khako ngaongao, nung APAOU Israel Goa khako ngaongao.

⁶Anat thso Shamgar si Jael ne taoko nai, jengtsaiu kantsün tsamkei nouso goh yankü tsükhushi, naiuso süme tsakeitsünsoüh yam amao nai tsakei.

⁷Israel nai noksong nouso lean, Israel nai ni Deborali nyiu tsak mosungkün lektso ngüso laolowan.

⁸Tilai Israelhaiüh goa ayan cholo, ngüso goh ai ehli nou sungh, Israel nai khaiunia heng aopüle mongko tsaküh lüko shisilai kankü noilümo?

⁹APAOU lülomsan! Jümongpem Israelhai lengsiyahoiko noin, naiuso thumkü kiuwantsünko noin.

¹⁰Asam gado athaiu chiai moknoitsünsoüh, nung thaiutha lüngio, asam mokthso chiai noikham ameiko moknoitsünso, naiuso asam hokje tsükeikünso nung thaiutha lüngio.

¹¹APAOU ashiolotsün, ta temkhao lemkü wetsün ngem tü anglu, ta Israelhaiüh shiolotsün chiteji! Nungai APAOU khaiuniahoi ngüso noknio nouso ainou saom.

¹²Lalolao, Debora, Lalolao! Lalolao! lalolao! Jih lühang! Abinoam thso Barak kha ai lükhu, ni khoutaiutsünso nialokü lükhuwan!

¹³Nungko amongkiu nouso ngüso aheihoi dongai saom; APAOU khaiuniahoi apa dongai ehli au khemlokü shin.

¹⁴Ngüso Efraim ainou tsamei gohnai shin, Benjamin kau naiuso nung khaiunia nouso phiko saom. Makir naiuso Zebulun ainou süpai aheihoi nouso saom.

¹⁵Isakar aheihoi Deborako hakü shin, Isakar si Barak lüko shin, naiuso ngüso apatü hoilutkü tsamei nai shin. Lüko Reuben kauto janpekkan, nungtiphe ngüso shi-e süne tsüshi-e ta henyi.

¹⁶Onnemok jimtsünsoüh onnemokhoi jontsün a-ngau tsüdekünaito, tiauta ngüso onnemok hoi phiai noi? ah, Reuben kau janpekkü noiküla, ngüso shi-e süne tsüshi-e ta henyi.

¹⁷Gad kau Yordan ajepek nai noi, naiuso Dan kau kheng nouso dongko noi. Asher kau haiukuk nai noi, ngüso haiukuk nai singso khamkü noi.

¹⁸Lüko Zebulun naiuso Napthali haiüh ehlithang nai ngüso aa thumkü kiu.

¹⁹Nokpao nouso Mekido haiusai Tanak ai shikü ehli, Kananhai nokpaohoi nou ehli lüko ngüsoüh tangkason tsülou.

²⁰Kianthsüo nouso maou nai Sisera thako ehli tsalou.

²¹Kishon Haiu oukong singwom nou ngüso lalükhunan. Ngo tsülaokü oukongkü khu-e!

²²Mokthso nouso ngüso thsanüh tenglo tenglokü kopkü shin.

²³“Miroz nai kihtsünso hau athesan lükiu”, ta APAOU hong nou ngioji; “sauhai nungai kihji ngüso thako athesan lükiu. Tiautenai ngüso APAOU tü hachuau tsüshi.”

²⁴Nyiuhai ongko aküomeiting nou nung, nejenkhio nai kihtsün Kenhai Hefer tsammongnyiu Jael noin.

²⁵Siseraüh khiamtü sao, lüko nyiuhai nou apahau nyao kium; nyiuhai nou apahau chio alengmei nouko ünge kankü shin.

²⁶Nyiuhai nou pha tsakai nejenkhio chanluttsün sem, naiuso pha tsakai senkhaiuhop sem, küta Sisera khaiu thanyomkü thiopek, naiuso apa thai chatkü chi.

²⁷Apa singkao sapshikü nyiuhai hok dongko loithiokü ean.

²⁸Sisera nyiuüh koukhantso nai thapshikü ngiom, “Apa ehli tsamkei shiao tiauta tsangji?” “Apa mokthsoso laokü shiau tiauta yamluji?”

²⁹Mongthat mongsai amei noitsün menyiuhoi nou apatü thashin, naiuso nyiuhai nou meshen mongai yangji.

³⁰“Ngüsoüh akamheau naiuso asonloau thaiutha jengtsaiu, süpai pungkü hau menyiuthso tsak tsak tsüdekünai nimeme, Sisera thaiutha neshe amei nyiuhai nou sang nai khiao, alengmei ne eplokü noiansao.”

³¹Oh APAOU a-ehso chikü lümowani, lüko apaiusoko aje uoli lünoi-i! Naiuso nung goumchi nai nokmei pon aopüle noiküla.