Read Khiamniungan Naga Mikhem 7 Bible Online

Mikhem 7 - Khiamniungan Naga bible

Mikhem 7

¹Nyitso Gideon naiuso apa khaiuniaso ahom beta chüokü Harod haiungan shimkü khuküta nungai asaothang shankü noi. Nungai Midianhai saothang nou More king ajenapki shimkü tsamei nai noiküla.

²APAOU nou Gideontü ngiom, “Midianhai shioloau jü thaiuthato niko hatsün khaiunia thatü piakü noin. Ngüsoüh ngüso chija ashio epta yange, naiuso ngo tsüyangsane.

³‘Sauhai hatji ngüso laokü lüya-an ta khaiuniahoi nousotü lüvelut, naiuso sam nungko Gilead King nai noi-e.’” Nungtiphe heng 10, 000, lunoikü heng 22, 000, to laokü yakhuwan.

⁴Nungai APAOU nou Gideontü ngiom, “Loüh niko khaiunia piakü noishin. Ngüso khiamai lünialüthio, nungai ngo athaiutha ngüso janthat kiu-e. Ngo nitü niko khaiunia tsak khuha ao noin ta ngionai, apa khu-e. Nung khaiunia nou niko lakhuha-i ta ngio nai apa tsükhuha-e.”

⁵Gideonüh khaiuniahoi nouso khiam ai nialokü saonai APAOU nou apatü ngiom, “Khaiunia sauhaiüh jii nouli, apa leikhaiu nou khiam koishiu-e, ni ngüso mothikü lütaiu, sauhaiüh khiam shiuao singkaungam lang- thiokü pha nou koishiu-e, ngüso mothikü lütaiu.”

⁶Nungko ngüso phaüh khiam koishiutsün khaiunia tsom süme noiküla, amao nousoto apemüh singkaungam langthiokü shiu.

⁷APAOU nou Gideontü ngiom, “Khaiunia tsom süme sauhaiüh pha nou khiam koishiu ngo ngüsohau Midianhai khako ashiolotsün kiu-e naiuso ni kipsane, amaohaito apem laokü yaanau lüngio.”

⁸Nungtiphe Gideonüh chihshen naiuso jangong- mat kankü noitsün khaiunia tsom süme nousolu taiukü Israelhai apem tsamai laokü hongan. Midianhai asaothang nou ngüso khemai tsamei nai noiküla.

⁹Nungsoh nai APAOU nou Gideontü thoilutkü ngiom, “Achüo, küta Midianhai saotaiu nou lükom- hean, ngo ngüso khako nihau ashiolotsün kiuji.

¹⁰Lüko ni nung komanao hatnaito, atsamki Pura hakü asaothang nai lüsao.

¹¹Ngüso ti ngemji nung ni lu-e, nungai ni nung komanao mong songkü iula-e.” Nungtiphe Gideon naiuso apa tsamki Pura ne ehoi saothang tsai ai sao.

¹²Midianhai, Amalekhai, naiuso singtso goh nai mele nouso tsamei nai jongkuhoi nousoli tsappokkü noikü- la, naiuso haiusai singtso ut nousoli piakü noiküla.

¹³Tilai Gideon shisaom apaüh khaiunia tsaküh apa haimei hau meamean tsak chitekü lula. Apaüh nungti chitekü noiküla: “Ngo jinyakwoi nou shantsün themtsai tsak sam saothangnai monthiokanküta nejenkhio noutü thiokü mean. Nungai nejenkhio nou patlepkü loiankü noiküla.”

¹⁴Apa haimei nou thalakü ngiom, “Nung Joas thso Gideon, Israelhai nou salaiu noin! Amao ti thaiutha tsüde! Goa nou apahau Midianhai naiuso sam süpai hoithum khako ashiolotsün kiuwaniu!”

¹⁵Tilai Gideonüh nung khaiunia meamean lula naiuso nung athat ngela, apaüh goh ai kaukü Goa tü amkham. Küta apa Israelhai saothangnai shikü ngiom, “Atsalo! APAOU nou asamhau Midianhai süpai khako ashiolotsün kiuji!”

¹⁶Apaüh apa süpai tsom süme nouso ahoi süme hau thekü janthat küta khaiunia pungkü hau jangong tsak tsak naiuso pulak tsak tsak nung mongko athip tson saithiokü kiu.

¹⁷Apaüh ngüsotü ngiom, “Tilai ngo Midianhai saonoitsün athun nai ngoi-e ta ngütü thapkü anoi, küta ngo ti chhi-e nung achhiha.

¹⁸Tilai jükeihoiüh naiuso ngo jangong mate, nungai asamüh asaothang lemkü asam jangong nou matkü ‘APAOU thaiutha naiuso Gideon thaiutha!’” ta sang asong nou awe.

¹⁹Gideon, apako khaiunia tsom tsak hakü ehoi saothang thunnai a-wem khatsoko, ehoi nouso ehü li-ekü thunkü saongoi. Nungai ngüsoüh jangong matküta asemtaiutsün pulak nouso lopek,

²⁰naiuso amao ahoi nime nousoüh nungtilu chhishin. Ngüso chiküüh pha tsatai athiptson nouso sem, naiuso pha uai jangong nouso semkü, “APAOU thaiutha naiuso Gideon thaiutha sah tsak ta sang asong nou we-en!”

²¹Khaiunia pungkü meshen asao- thang lemkü momo athang ai tsa, naiuso ehoi nouso thsüokü shikü khulükhunan.

²²Gideon khaiunia nousoüh ngüso jangong matnai, APAOU nou ngüso ehoi ongko ngüso sahüh tsaküh tsak tü he-e-i. Ngüso Bet Shita saokü Zarethan dongai Tabat shimkü Abel Mehola noksong saokü jingkü khulükhunan.

²³Nungai Napthali, Asher, naiuso Manase mele ainou khaiuniahoi nou- so jonshi, naiuso ngüsoüh Midianhai tü komkü khu.

²⁴Gideonüh Efraim king goumchi thapekkü ngiongem kantsünso hongpengkü ngiom, “Midianhaiko ehliao asao. Midianhai hau nungso tsüyan-iau, Yordan Haiu naiuso Betbara saokü haiutsongan nouso lühüjeian.” Efraim khaiuniahoi aikü jonkam, naiuso ngüsoüh Yordan Haiu naiuso Betbara saokü haiutsongan nouso hüjei.

²⁵Ngüsoüh Midianhai nokpao nime Oreb si Zeeb ne thaloküta Oreb nung Oreb Lung dongko loat, naiuso Zeeb nung Zeeb ai sainaoshep noipektsün dongko loat. Ngüsoüh Midianhai tü tsülaokü komkü khu, naiuso Gideon lo sübao Yordan Ajepek ai noin nungai Oreb si Zeeb ne khaiu kankü shin.