Read Khiamniungan Naga Mikhem 8 Bible Online

Mikhem 8 - Khiamniungan Naga bible

Mikhem 8

¹Nungai Efraimhaiüh Gideon tü ngiom, “Ni Midian haiko ehliao khunai sam tü tiauta tsüjonha? Ni sam tü nungli tiauta kankei?” Ngüsoüh nung thaiutha thatü thsüokü namnam.

²Lüko apaüh ngiom, “Ngo ti chhisiya shiokü chhin nungto asamüh chhitaiutsün nouko ti awe-eau tsünoi. Jü kauthum nou ti chhisiyakü noin nungko naito Efraim haiüh ehenthso chhitsün bao songtso.

³Ngio-e tünaito, Goa oukong tsangkü asamüh Midianhai nokpao nime Oreb naiuso Zeeb ne loat. Nungko wekü ngo ti chhin?” Apaüh nung ngionai ngüso mongmattsün nyaplokü shin.

⁴Nung taoko Gideon naiuso apa khaiunia tsom süme nouso Yordan Haiu yankü khu. Ngüsotü tan lüko ehoi akom tsülao.

⁵Tilai ngüso Sukot nai shisaom, apaüh nung noksong khaiuniahoi nousotü ngiom, “Tsüo- jinyangkü jü khaiunia hau eheau themtsai intso akiu. Ngüsotü tankü noin, naiuso ngo Midianhai nokpao Zeba naiuso Zalmuna netü komkeiji.”

⁶Lüko Sukothai aheihoi nousoüh ngiom, “Ni loüh Zeba naiuso Zalmuna ne mothalokü noikü, tiauta samüh asüpaiso hau eheshiu kiu-e?”

⁷Gideonüh ngiom, “Nyüh! tilai APAOU nou ngühau Zeba si Zalmuna ne shiolo-i-e, ngo asamtü liutsa nai noitsün mükai tsao nou shioh-e!”

⁸Gideon Penuel ai khuküta nungai noitsün khaiunia nousotü nungtilu kojashi, nungaih Penuel haiüh lüko Sukot haiüh thashitsünlilu thashin.

⁹Nungtiphe apaüh ngüsotü ngiom, “Ngo aa meikü yashi-e, naiuso tilai ngo ameilu yashi-e, ngo asam tsamthong thiopeke!”

¹⁰Zeba si Zalmuna ne süpaihoi Karkor nai noiküla. Singtso goh naiuso king khaiuniahoi nouso heng 15, 000 lu poitaiukü süpaihoi heng 120, 000 nouso apem loatkü wan.

¹¹Noba naiuso Jogbeha netü ajepek ai singtso gohthun yam tsangkü shiküta Gideonüh alekta süpaihoi komhean.

¹²Midianhai nokpao Zeba si Zalmuna ne khulükhunan, lüko apaüh ngüne komkü khukü thalo, naiuso süpaihoi apem hatatkü khupengi.

¹³Gideon, nung ehlithang ainou Heres Aoyan yam tsangkü laokü yashi taoko,

¹⁴apaüh Sukot ainou pühe tsak thaloküta apatü sang. Nung oum khaiunia nou Sukothai ahei nian aochinyatkü chinyat Gideon hau satkiu.

¹⁵Küta Gideon Sukothai dongai khukü ngiom, “Asamüh ngütü hachuau nantsün yangshijimo? Ngo Zeba naiuso Zalmuna ne mothalokün tsangkü, asamüh jü süpaihoi tanatkü noinou- so hau eheshiu ti tsükiu-e ta ngiom. Ngüne nungko noin!”

¹⁶Küta apaüh ngeptsao nouso singtso goh ainou loküta Sukot nai noitsün aheihoi angja kiukü kankei.

¹⁷Apaüh Penuel nai tsamthong nou lüko laopengan- kiu naiuso nung noknio khaiuniahoi nouso loatkü wan.

¹⁸Nungai Gideonüh Zeba naiuso Zalmuna netü, “Ajeüh Tabor nai khaiuniahoi loattsün thaiutha titi ta sang?” Ngüsoüh thalakü ngiom, “Ngüso aluao ni khekkü naiuso khaiunia apem nokpao tsak thso khekkü noiküla.”

¹⁹Gideonüh thalakü ngiom, “Ngüso jü deisinioso, jü nyiutingthso melothsoso noiküla. Asamüh ngüso tsüloat tünto, ngo lüko asam tsüloatela ta ngo kongkü ngioji.”

²⁰Nungai apaüh apa melothso yamchong Jether tü ngiom, “Ngüso lüloat!” Lüko nung melothso nou apa sah saisanao henyi, tiautenai apa methsolu noiküla.

²¹Nungai Zeba si Zalmuna neüh Gideontü ngiom, “Ashi, nilu je aloatan. Pohai tsak chhisiyato pohaiüh chhiao noin.” Nungtiphe Gideonüh ngüne loatküta ngüne ut sang ainou taosilak ngiolowan.

²²Israelhaiüh Gideontü ngiom, “Ni naiuso athsaosithsosoüh sam chiai nok-lüshing; tiautenai ni sam Midianhai ainou kipsaniu.”

²³Gideonüh thalakü ngiom, “Ngo tsüdekünai jüthsoüh asam chiai nokshing tsüshinge. APAOU nou asam ta shinge.”

²⁴Loüh apaüh tsülaokü ngiom, “Ngo asamtü tsotsak sange. Asam pungkü nou nuotao lotsün ngühau akiu.” (Midianhaiüh amao singtso goh khaiunia nousoüh tao- tsünli chaiou lakkeng nuotao nouso aiuji.)

²⁵Khaiuniahoi nousoüh thala, “Samüh nungso nihau monglingkü kiu-e” Ngüsoüh ne tsak sapengküta khaiunia pungkü nou apaüh thalotsün nuotao nouso taiukiu.

²⁶Gideonüh eptsün chaiou lakkeng nuotao nouso tsoithat nai kilogram khei thatso noiküla, nungko taosilak, lak, Midianhai nokpao nou tentsün nepat amatchai naiuso ngüso ut sang ai kumluttsün sangkom tsümong- thioha.

²⁷Gideonüh chaiou lakkeng sotsom tsak shanküta nung apa noksong Ofra nai taiu. Israelhai apemüh Goa leankü nung sotsom amkhamao khu. Nung Gideon naiuso apa tsammongso thaiutha jin tsak noiküla.

²⁸Nungti Israelhaiüh Midianhai shioloküta loto ngüso lun hatao ti tsünoishi. Gideon moekün lektso nung goumchi nai pon aopüle nokmei noiküla.

²⁹Gideon apa tsamai laokü khukü kih.

³⁰Apa thso melo aochinyat noi- küla, tiautenai apaüh tsammongnyiu piakü jon.

³¹Apaüh Shekem nai lüko nyiu-ib menyiu taiuküla, nung menyiu nou apa hau melothso tsak chetkiu, naiuso apaüh methso nou Abimelek ta niankiu.

³²Joas thso Gideon thatü sonanküta ean, naiuso apa meshen po Joas etam nai Abiezer kau ün noksong nian nou Ofra ai khanan.

³³Gideon ean phiai Israelhai Goa tü mongtsükiukü Baal tü amkhamkü khuwan. Ngüsoüh Baal nung ngüso athalue goa au shan;

³⁴naiuso ngüso lemkü noitsün ehoi ainou sauüh kipsan ngüsoüh nung APAOU Goa loto tsüyathsüoshi.

³⁵Ngüso hau Gideon tsamkhaiuüh amei chhikiutsün thaiutha ngüsoüh amongling tsühan.