Read Khiamniungan Naga Mikhem 9 Bible Online

Mikhem 9 - Khiamniungan Naga bible

Mikhem 9

¹Gideon thso Abimelek, Shekem noksong tiai apa nyiu tsammongso kihji nungai khuküta ngüso tü,

²Shekem ai noitsün khaiuniahoi nousotü nungti lüsangtü ngiom, “Gideon thsoso aochinyatkü chinyat hau süne khaiunia tsak haulu nok-shingi-e? Abimelek nung asam shesinyi ta lüyangsan sai.”

³Apa nyiu tsammongsoüh nung apa thaiutha Shekem haiko chite, küta Shekem haiüh Abimelek tü hoilutao thalo, tiautenai apa ngüso tsammong noiküla.

⁴Ngüsoüh apahau athalou- etsün Baal amkham tsam ainou tangkason aochinyat kiu, naiuso nung tangka nou apaüh apako haao yaang khaiuniahoi tuhlo.

⁵Apa Ofra nai apa po tsamai khuküta apa deisinio Gideon thsoso aochinyat nou lung tsak chiai loatkü wan. Lüko Gideon thso niophiting Jotham to paman, apa tsüloatha.

⁶Nungai Shekem naiuso Betmilohai apem kamlokü Shekem nai asio lampai dongai khuküta nungai ngüsoüh Abimelek nokpao theao chosan.

⁷Tilai Jothamüh nung lula, apa Gerizim kingkhaiu nai sungkü tsakü ngüsotü sang asong nou wen, “Ngü tü anglu, asam Shekemhai naito Goa nou asamtü a-nge!

⁸Ataojam pai nouso ngüso thaiutha nokpao shingloao kamshi. Nungai ngüsoüh Olip pai noutü ngiom, ‘Ni sam nokpao au athe.’

⁹Olip pai nou thashin, ‘Ngo asamtü shingao thaiutha, Goa naiuso khaiunia nousoüh asuhat kiuao kankeitsün, ngo khaiutsom losantsün laowanao sungji.’

¹⁰Nungai pai nousoüh latpai noutü ngiom, ‘Ni shikü sam nokpao au athe.’

¹¹Latpai nou thashin, ‘Ngo asamtü shingao thaiutha, jüpai eiu anyaothing nou tsü eiushikü laowanao sungji.’

¹²Nungtiphe pai nousoüh sainao- shep tü ngiom, ‘Ni shikü sam nokpao au athe.’

¹³Lüko sainaoshep auo nou thashin, ‘Ngo asamtü shingao thaiutha Goa naiuso khaiuniahoi monglingitsün theng losantsün ainou laowanao sungji.’

¹⁴Nungtiphe pai apem nou tsao-eng noutü ngiom, ‘Ni shikü sam nokpao au athe.’

¹⁵Tsao- eng nou thashin, ‘Asamüh ngo atsüoting asam nokpao au the iau aiu naito, ashiküta jü asokhemai asolo. Asam tsüshikü naito, jütsaopai kia nouso ainou in nou nyai-e naiuso Lebanon nai Cedar pai nouso jekthiowane.’”

¹⁶“Nungai loüh” Jothamüh tsülao- kü ngiom, “samüh Abimelek nokpao au chonai, asam atsüoting ngiotsüo naiuso saitha nai chosan süne? Asamüh Gideon chhisiya thamaikü, apa nian tü asuhat kiukü apa tsamkhaiu ayam nai kankei ta yangjimo?

¹⁷Jüpoüh asam thaiutha ko ehlikü shin ta lüyangsan. Apaüh asam Midianhai phamong ainou kipsanao apa aa thumkü kiu.

¹⁸Lüko lonyito asam jüpo tsammongso thako tsaji. Asamüh apa thsoso aochinyat nouso lung tsak chiai loatkü wan; asamüh apa thso Abimelek, apa tsamki menyiuthso nou thso asam tsammong tü taiukü Shekemhai nokpao au shan.

¹⁹Nungaito lonyi asamüh Gideon naiuso apa tsam- mongsotü chhitsün nung mongtsüo naiuso ngiotsüo nou chhin tünaito, Abimelek ko monglingkü lünoi, naiuso apa asamko monglingkü lünoi-i.

²⁰Tsüdekünaito, Abimelek ainou in sungikü Shekemhai naiuso Betmilohai achetheani, naiuso Shekemhai si Betmilohai ainou in sungikü ta Abimelek achethean.”

²¹Tiautenai Jotham apa dei lun hatnou shioko Beer nai kih au khulükhun.

²²Abimeleküh Israelhai tü pon süme nok-shing.

²³Nungai Goa nou Abimelek naiuso Shekemhai jetko tsüngela-ekü sungiküta Abimelek tü khengshi.

²⁴Gideon thso aochinyat nouso loatkü shelopengtsün thaiutha ngüso dei Abimelek tü naiuso Shekemhai paopunghoi sauhaiüh ngüso deisinio loatao hachu, nungso tü phaosanao Goa nou nung chhin.

²⁵Shekem khaiuniahoi nousoüh Abimelek tü po au kingson nai jiokü noi-i, küta nung yamai yanlü- khuntsün apemtü ap hekü noiküla. Nung thaiutha Abimelek hau chite.

²⁶Nungai Ebed thso Gaal apa deisiniosoko hakü Shekem nai shin, naiuso Shekem khaiuniahoi apa da amongtsam ep.

²⁷Ngüso chikü sainaoshep eiu ai khukü shep panlo, küta nungüh theng shiukü sümai tsak shan. Naiuso ngüso goa amkham tsamai khukü ngüsoüh heshiukü Abimelek lotsaokü chite.

²⁸Gaalüh ngiom, “Shekem nai sam ti in khaiuniahoi ta yangji? Tiauta samüh Abimelek yathsüoji? Atsüo tüenaito, apa sau? Apa Gideon thso tsüdeso! Zebulüh apa ainou loji, naito samüh tiauta apa yathsüo-e? Asam kau athanya kiutsün Hamor bao lüyathsüo!

²⁹Ngo nung khaiuniahoi niajikantünto! Ngo Abimelek to wananio-ela! Asüpaiso ou lülokong- shi, küta shikü ehli nou lülih, ta ngo apatü ngio-ela!”

³⁰Noknio nokpao Zebulüh Gaal ngio lulanai apa mongmat.

³¹Apaüh Aruma nai Abimelek dongai ngiongem kantsünso hongkü ngiom, “Ebed thso Gaal naiuso apa deisinioso Shekem ai shikü noin, küta ngüsoüh asam noknio nai tsünapiao khiapkü jimji.

³²Loto, ni naiuso akhaiuniaso apem liutsa nai khukü lüpamlowan.

³³Lühom ajepek taoko noknio noutü alekta pha lüpoh. Nungko tilai Gaal naiuso apa khaiuniaso niko lih au noknio ainou shi-e, nungai asamüh shiotsünlektso pha lüpoh!”

³⁴Nungtiphe Abimelek naiuso apa khaiuniaso asoh soikü khuküta Shekem noknio bechiai ahoi püle hau thekü pamkü noi.

³⁵Tilai Abimelek naiuso apa khaiuniasoüh Gaal, noknio bekhan dongko tsakü ep, nungai ngüso jiothang ainou ngüso tsajikan.

³⁶Gaalüh ngüso epkü Zebul tü ngiom, “Athaplu! nungai khaiuniahoi nouso kingson nouso ainou saoji!” Zebulüh thalakü ngiom, “Nungso khaiuniahoi tsüde,” “lüko king nai asohkhemlu noin.”

³⁷Gaalüh ngioshin, “Athaplu! kingkhaiu ainou khaiuniahoi nouso saoji, naiuso ngiotaiutsünsohoi tsak ün lampaidong ainou shiji!”

³⁸Nungai Zebulüh apa tü ngiom, “Ni ngio asong singiotsün tiai noin? Samüh nung khaiunia Abimelek tiauta yathsüo-e ta ngiotsün ni noin. Ni lotsaokü kankeitsün khaiunia nungso noin. Lo khuküta ngüso ko lüli-e.”

³⁹Gaalüh Shekem khaiunia nouso niakü khuküta Abimelekko ehli.

⁴⁰Gaal khulükhun, naiuso Abimeleküh apatü komkü khunai, khaiunia piakü tawaikü noiküla.

⁴¹Abimelek Aruma nai kih, naiuso ngüso Shekem ai kih au tsüshioshikü Zebulüh Gaal naiuso apa deisinioso koman.

⁴²Nungthan ajekhaiu nai Abimeleküh Shekem khaiunia nouso liukhaiu tsakai khuau yamji ta ngela,

⁴³apaüh apa khaiuniaso nialoküta ngüso ahoi süme hau thekü janthat, kü ngüso khutsün yamtü jiokü noi. Tilai apaüh khaiuniahoi nouso noknio ainou kingchiai shikhutsün ep, apa ajio taiu ainou Shekemhai loatao shin.

⁴⁴Abimelek ko hatsünhoi nouso noknio bekhan tü ehü ao kha ai liukü khunai, amaohoi nime nousoüh ngüso chikü loat.

⁴⁵Ajekhaiu thumkü ehliküta Abime- leküh noknio nou thalo, naiuso nungko kihtsün loatkü noknio lothean, naiuso jem nou goh nou sokpokkü wan.

⁴⁶Tilai Shekem nai noitsün ehü ahei nousoüh nung lula, ngüsoüh aasan loau athalou-e Baal ta ngiotsün amkham tsam tü yam.

⁴⁷Ngüso nungai kamshi noin ta Abimelek hau chite,

⁴⁸nungtiphe apa Zalmon king nai khaiuniaso hakü sunghkü apaüh o tsak loküta paikia tsak hesankü nung apa sangdong- khaiu ai pilo. Apaüh apa khaiunia- sotü apaüh chhitsünli chhiao ngiom.

⁴⁹Nungtiphe khaiunia pungkü nou paikia tsak tsak helo küta, ngüso Abimelek tü hoilut naiuso nung amkham tsam tü pai nou danglut. Amongai khaiunia nouso noitsün tsam tü ngüsoüh in jeklut, naiuso nung tsam mongai noitsün khaiunia melo, menyiu, apem nai heng tsak thatso jekkatan.

⁵⁰Nungai Abimelek Thebez ai khuküta noknio nou lemlo, naiuso nung thalo.

⁵¹Nungai tsamthong mongkü tsak noiküla, naiuso noknio nai noitsün melo, menyiu, aheihoi hakü, nung dongai jingkü khu. Ngüsoüh ngüso chija nung mongai kiapjeiloküta tsamkhaiu nai sungh.

⁵²Tilai Abimelek nung tsamkhaiu lotheanao shin, apa nung tsamthong koukhan nai in jeklutao sungh.

⁵³Lüko menyiu tsaküh Abimelek khaiusuo nai ethoilung tsak yaklut, nungko apa khaiuou paian.

⁵⁴Nungai apaüh apa sahsilai kantsün oum khaiunia tsaktü liukü jonkü ngiom, “Asalaiu sailoküta ngü aloatan. Ngü menyiu tsaküh loatan ta ngio-iau tsüaiu.” Nungtiphe oum nou apa chatkü lai nou jhhi küta ean.

⁵⁵Tilai Israelhaiüh Abimelek eankü ep, ngüso chikü tsamai laokü khuwan.

⁵⁶Nungli Goa nou Abimeleküh apa po thako angei chhikü apa deisinioso aochinyat loattsün thaiutha laokü kiu.

⁵⁷Goa nou Shekem khaiuniahoi hau lüko ngüso angei thaiutha angja nou laokükiu. Gideon thso Jothamüh athesan kiutsün ngüso chiai shin.