Read Khiamniungan Naga Yihuda 1 Bible Online

Yihuda 1 - Khiamniungan Naga bible

Yihuda 1

¹Yisu Khrista yathsüotsün Yakob nio, Yihuda ainou — Yisu Khristaüh solutsünko Po nou Goa atsüojin nai sauhai tsakeiji naiuso Goa tsangkü jonkü noin, nungso dongai:

²Atsüojinyang, aalu, naiuso atsüojin nou asam thapemkü lünoi.

³Atsüojin haiso, ngü sam aasan haoson aikü janelutsün thaiutha satau thatü mongchiokü noinai, sübao amonglam Goa nou asiohoi hau apem thaiutha jamaulu kium, nung amonglam thaiutha asam thatü kowe au alutsüo satau pohkü noin ta mongchiokü iula.

⁴Sam atsandetsün APAOU Yisu Khrista tsaklu nou tsüloukünso, Goa tsüngekünso ajantso sam ongko ngio tsükiutaiukü akausai nai shinappaniu, ngüsoüh ngüso tsütsamtsütsüokün yam nouso wanluau sam Goa atsüojin thaiutha ngem amei chimtsün lochinyan-iu. Ngüso phiokiukü Asiongio nou atao laiukü naita ngiotaiukü noiküla.

⁵Tititenai asamüh nung chikü angeshio noilüko, APAOU nou jam Israelhai Ijip ainou titithekü kipsan, nungphiai tsümonglamkünso mowanin, ngü asam hau nung yangshi-iau aiuji.

⁶Lüyanglu, aünhonghoi sauhai ngüso oukong asong noitsün ngiokhem mongko tsünoi; lüko ngüsoüh meshen kihtsün wanan; naiuso Goa nou ngüso ajekhaiu asong tiko ngüso phiokiu-ao noin nung thaiutha anya khem akheiting nai athontsüyang thaiutha sonao nou kekü taim.

⁷Sodom naiuso Gomora lüyangsan, naiuso nung shimkü noitsün noksong nouso nai kihtsün khaiuniahoi nou aünhonghoi nousoüh chhitsünli chhiha; tsütsam tsütsüokünai chhi ayam tsüthakünai phokle, chikü dongai alutsüo tsakli ngüsoüh inheeng nai angja ep.

⁸Lo nung sai khekkü, nung khaiunia nousoüh atsangshei epnai ngüso pem thako chija angei sunloji; ngüsoüh Goa ün oukong luchiji naiuso khütha ajinka nouso lutsaoji.

⁹Atengting hong Maikhelüh lüko nung tsüchhi. Apa tilai Biya nouko Mosa mea thaiutha nung sauüh the-e ta tsüo-e, Maikhelüh Biya nou lutsaokü ngio nouso ngioau tsüsom, lüko nunglu ngiom, “APAOU nou ni lüthut!”

¹⁰Lüko nung khaiunia nousoüh ngüsoüh tso tsüngelakü amaoli lutsaoji; naiuso ngüso liu thainian khekkü nou ngüso sai tsangkü ngesanji; nungüh lu ngüso mowanji.

¹¹Ngüso thaiutha inyate! Ngüso Kainüh cholotsün yam tü hoilut. Tititenai ngüsoüh tangka shioko Balamüh aphio sunlutsün nai ngüso chija thumkü kiuwan. Ngüsoüh Koraüh khengshitsünli khengshi, naiuso ngüso apa khekkü mowan.

¹²Ngüso amiam tsülepkü dokkatkü asam chihhe sümai nai achinyan aleng ii sunkü noin. Ngüsoüh ngüso pem lu paotsangji. Ngüso ah-ou tsükanjikantsün ahsheih nou shipkeitsün thengmia khekkü noin. Ngüso to ah-ou tao lüko pai-eiu tsü-eiutsün pai nouso khekkü noin, nungtin pai i-iu nai yakü seksanküta thumkü eanji.

¹³Ngüso amiam chhi leichiomokong khekkü hantsün nung ngüso khiamnok nai khiampek khekkü noin. Ngüso anoithang tsüyangkü tsakeitsün kianthsüohoi khekkü noin, tititenai Goa nou angioau tsüshiokün anyakhem athontsüyangkü thaiutha athang tsak khemkü taim.

¹⁴Adam ainou saitha nyimsantsün luok nou Enoküh ngüso thaiutha nung atao laiukünai yakü ngiotaiukiukü noiküla; “APAOU apa ün asio aün honghoi ngüso apem khaiuko mikhem kiuau heng piakü hakü shi-e.

¹⁵Goa tsühakün chhi ngüsoüh chhikü shitsün chikü phio-iau, naiuso Goa tsüngekün angei khaiuniahoi nou apa thako ngio atsao chitetsün chikü thaiutha mikhem kiu-e!”

¹⁶Nung khaiunia nousoüh asaichi amaohai tü lutsaokü namnamji; ngüsoüh ngüso chija tsümeikün achinektsün phiai tsakeiji; ngüso chija meshen thaiutha bülomji, naiuso ngüsoüh alesan eppau thaiutha amaohai ko pumkü chiteji.

¹⁷Lüko jü haiso, lüyanglu, kümi sam APAOU Yisu Khrista honghoi tsangkü asam tü titi ngiokü noiküla.

¹⁸Ngüsoüh ngiom, “Tilai athon ajekhaiu nouso shi-e, asam lutsaoau khaiuniahoi sunge, nung khaiuniahoi Goa tsühakün achinek yamai tsakei-e.”

¹⁹Ngüsoüh Onthso tsütaiu, ngüso shesinyih achinektsün nou miankü, naiuso ajanpek lusantsün khaiunia nouso nungso noin.

²⁰Lüko asam, jü haiso, asam thatü asio amonglam chiai asam chija mongkü lütaiu. Asio Onthso oukong nai misao lüsao,

²¹asamüh sam APAOU Yisu Khrista atsüojinyang nai asam hau athontsüyang aa kiuau taiukü noitsünli, Goa atsüojin nai lütaiu.

²²Sauhai henyinyikü noin ngüso hau atsüojinyang lühan;

²³amaohai in ainou aploukü ngüso lükipsan; naiuso amaohai dongai ahat nouko hakü atsüojinyang lühan, angei shesinyih achinektsün lepkü noitsün ngüso neshe nouso ta lu lüchinyan.

²⁴Sauüh asam tsüsalian-ikü taiuau shioji, naiuso asam aphio tsüsunkü naiuso amongling nai apa ün ajinka hatsün khako apa dongai niaau,

²⁵sam APAOU Yisu Khrista tsangkü, sam Aasantsün Goa tsaklu dongai, ajinka, oukong, naiuso nokshing oukong, ayanan vetao chikü ainou, naiuso lo, naiuso athontsüyang lünoi! Amen.