Read Khiamniungan Naga Atsangshei 1 Bible Online

Atsangshei 1 - Khiamniungan Naga bible

Atsangshei 1

¹Nung Yisu Khrista atsangshei sungtsün chhi sattaiutsün thsam noin. Tsütsangkü ti thawaoau noin nung apa yathsüotsünso hau atsangshei kium. Khristaüh nungso chhi apa yathsüotsün Yohan hau Apa hong hongkü nge-in,

²naiuso Yohanüh apaüh eptsün apem chiten. Nung ngiongem nou Goa ainou Yisu Khristaüh tsangsheikiutsün noin.

³Nung thsam vetsün naiuso nung thsam nouko satkü noitsün khapiam ngiongem kankeitsünso thaiumei. Tititenai nungso apem thawaoau atao shimkü noin.

⁴Yohan ainou Asia singtap nai noitsün donthe chinyat nouso dongai: sau lo noin, naiuso noiküla, naiuso sau ashiau noin, naiuso apa nokpao noikham dongko noitsün Onthso chinyat ainou,

⁵naiuso amonglam mitha, ee ainou chongting ahshitsün naiuso goumchi nokpao nouso khako nokshingtsün Yisu Khrista ainou, asam ko atsüojin naiuso aalu lünoi. Apaüh sam tsüojinji naiuso apa chaithio kiukü tuhsantsün tsangkü sam angei ainou apaüh soktham,

⁶naiuso apaüh sam apa nokshing tsak nai Goa naiuso Po yathsüo-iau sam meson nouso iula-in, apa tü ajinka naiuso nokshingtsün athontsüyang lünoi! Amen.

⁷Athaplu, apa thengmia nai shiji! Khaiunia pungkü naiuso sauhaiüh apa tü lai nou chi ngüsoüh apa eppe. Goumchi khaiunia chikü nou apa thaiutha mongsaiu-e. Amen!

⁸Sau lo noin, naiuso noiküla, naiuso ashiau noin, nung APAOU Goa Apemshiotsün nou ngioji, “Ngo Alpha naiuso Omega,” ayating naiuso athonting.

⁹Ngo asam deisinio Yohan, Yisu Khrista sahoi tsakli sauhai apa nokshing ün noin ngüso dongai angja shitsünko mongau laiukü jeilutsün nai haoson janelutsün noin.

¹⁰APAOU Ajekhaiu nai ngo Onthso nou meankü, jangongmat ngem tsak khekkü jüphiai chitetsün sangh asong tsak lula.

¹¹Nungti ngiom, “Ni ti epji nung lüsat, küta nung thsam nou noknio chinyat nai noitsün donthe chinyat: Ephesa, Smyrna, Pergamum, Thyatira, Sardis, Philadelphia, naiuso Laodicea dongai lühong.”

¹²Ngüko chitetsün tü thapau ngo phoklenai, ngü chaiou tson taiutsün chinyat ep;

¹³nai tson taiutsün awem nai Khaiunia Thso tsakli, hok saokü phakhut khutkü, konglemkü chaiou omkhi nou khikü ep.

¹⁴Apa khaiuou onnemok ponli athaiu tsüdekünai nyinli, naiuso niovei innyaili noiküla;

¹⁵apa hok taoson losangkü jeetsün khekkü, naiuso apa sangh khiampek sangngemli noiküla.

¹⁶Apa pha uai kianthsüo chinyat noiküla. Apa son ainou sahu nemtso ai amonting pokü sah tsak sungh. Apa kha anyi aje awonli noiküla.

¹⁷Tilai ngü apa ep, ngo eeli apa khako loian. Apaüh apa pha uai nou ngo tü thankü ngiom, “Lahatsai! Ngo ayating naiuso Athonting.”

¹⁸Aa noitsün Ngo! Ngo ee noiküla, lüko lo vetao si vetao Ngo aa noiji. Ee khako naiuso eantsün goumchi khako ngo oukong taim.

¹⁹Nungtiphe ni ti ep, lo ti noin, naiuso nungphiai ashiau noin nung lüsat.

²⁰Jüpha uai sübao kianthsüo chinyat, naiuso chaiou tson taiutsün chinyat, ni ep, nung akaungio nungso noin: Nungso kianthsüo chinyat nou donthe chinyat honghoi noin; naiuso chaiou tson taiutsün chinyat nou donthe chinyat noin.