Read Khiamniungan Naga Atsangshei 11 Bible Online

Atsangshei 11 - Khiamniungan Naga bible

Atsangshei 11

¹Athapau athatlutsün auo li ngo hau pailai tsak kiu küta ngo tü ngiom,

²“Lükhu küta Goa amkham tsam naiuso amthang lüthatlu, naiuso amkham tsam nai sauhaiüh amji, nungso lüvelu. Lüko kengchi nouto lathatlu, tiautenai nungso to Asio Noknio khako alei aopülekü nime melemao haiüh ngamkeiau kiuwaniu.

³Ngü jümitha nime nou nethe tenkü honge; naiuso nungso ajekhaiu 1260 ngüsoüh Goa Ngem amei chime.”

⁴Nung mitha nime nou Olip pai nime naiuso tson nime athat nung goumchi APAOU khako tsatsün noin.

⁵Ajantsoüh ngüso omhe-iau kowenai, ngüso son ainou in sungkü ngüso ehso hean khemji; naiuso nungtilu ajantsoüh ngüso omhe-iau kowenai ngüso luatkü wanne.

⁶Ngüsoüh Goa Ngem amei chitetsün ajekhaiu nai atsüo-iau, maou kiappau ngüso oukong noin. Ngüso tü haiungan nouso she iula-iau oukong noin, naiuso ngüsoüh aluhat in amomo nou goumchi tü titsojam shiuao aiuji ngüso da oukong noin.

⁷Tilai ngüsoüh Ngem amei nou chitekheme, nungaih athantsüyangkün khan ainou thainian sungkü, ngüsoko ehli-e. Apaüh shioküta ngüso luate,

⁸ngüso APAOU paiphu nai laluttsün noknio sonkeng asong nai ngüso mea noi-e. Nung noknio nian athat nou Sodom tsüdekünai Ijip noin.

⁹Mele apem ainou, shingkhan apem ainou, ngio apem ainou, naiuso kau apem ainou, khaiunia nousoüh ajekhaiu süme küta ayantso ngüne mea thappe, naiuso ngüso mea etam nai taiuau tsükiu-e.

¹⁰Nung nime eantsün thaiutha goumchi khaiuniahoi monglinge. Ngüso haisihai hau paopei kiu-ekü monglinge-e, tiautenai nung e-po nime nou khaiuniahoi hau angja kankü shikiu.

¹¹Ajekhaiu süme küta ayantso phiai ngüso tü Goa ainou aa kiutsün ii nou shin küta ngüso da map naiuso ngüne tsakütsüo naiuso sauhaiüh ngüne ep, ngüso thatü hatat.

¹²Nai e-po nime nou aün ainou ngüne tü jontsün sangh asong tsak lula, “Nungai asung!” Ngüso ehoiüh lukü noinai, ngüne thengmia nai aün ai sungkhuwan.

¹³Nungtaokolu gohhaiu asong tsak shikü noknio haoson che nouko haoson tsak luthean, naiuso nung gohhaiu nou khaiunia 7000 luat. Nai khaiunia apoi nouso hatkü aün Goa hau alomsan asong ajinka kiu.

¹⁴Inyate nime nou yanlükhuniu, lüko Inyate süme nou shakta shiji!

¹⁵Nai aünhong chinyat nou apa jangong mat, nungai aün nai angem asong sungkü ngiom, “Goumchi chiai nokshing oukong nouso loyakü sam APAOU naiuso Khrista nokshing iulaji, naiuso apaüh athontsüyangkü nok shinge!”

¹⁶Nai Goa khako nokpao noikham nai moknoitsün petchehoi kheikü püle nousoüh kha thaothiokü amkü ngioji,

¹⁷“Lo sau noin, naiuso noiküla, nung Apemshiotsün APAOU Goa! Samüh anian lomji, tititenai ni meshen oukong asong lou-iu, naiuso anokshing tsalou-iu!

¹⁸Don tsüthekünso mongmat nou mianan, tiautenai ni mongmat sungtsün atao shi-iu, nung eh nouso mikhemau atao shikü noin. Ni yathsüotsün e-pohoi hau naiuso ni tü amtsünso asiohoi asong ehen wekü hau paopei kiuau atao shi-iu. Goumchi mowan-itsünso mowan-iau atao shisaokü noin!”

¹⁹Aün nai Goa amkhamtsam soppan, naiuso nungko Athaloue Ngiokhem Paidan ep. Nai ahlap si ahmok ngem, gohhaiu naiuso san piakü saokü noiküla.