Read Khiamniungan Naga Atsangshei 13 Bible Online

Atsangshei 13 - Khiamniungan Naga bible

Atsangshei 13

¹Nai ngü thainian tsak khiamnok ainou sungtsün ep. Apa tü ong che naiuso khaiu chinyat pokü noiküla; nai apa ong pungkü kandio che, naiuso apa khaiu pungkü nai Goa luchitsün nian nouso satkü noiküla.

²Nung thainian athappau khau khekkü, ahok nou sap hok khekkü, naiuso apa son chongkhao son khekkü noiküla. Nung dragon pao nou apa oukong, apa nokpao noikham naiuso anyakeiau oukong asong apa hau kiu.

³Nai apa khaiu nouso ongko khaiu tsak tsümeitingkü tawaikü noiküla, lüko nung mou nou meila-ankü noiküla. Nai goumchi apem nung thainian thaiutha ngakü apa tü hoilut.

⁴Khaiunia pungkü nou nung dragon pao tü amkham, tiautenai apaüh nung thainian hau apa oukong kiu. Ngüsoüh thainian tü amkhamkü ngioji, “Nung thainian khekkü sau noin? Apako sau li-e au shio-e?”

⁵Nung thainian hau Goa lutsaokü abülom ngio chiteau sonkou, naiuso alei aopülekü nime saokü tsülaokü chhiau son oukong kiu.

⁶Apaüh meshen son sopkü Goa thako alotsao ngio nou apa nian naiuso apa noitsün, naiuso aün ai noinso apem lutsaoau kiukü yachu-i.

⁷Nung asiohoi nouko li-ekü, ngüso shiolouau apa hau oukong kiu, naiuso shingkhan, mele, ngio naiuso kau pungkü khako oukong kiu.

⁸Goumchi mosaikün khako Onnemok Thso aa thsam nai sauhai nian mosat nungso tü simkü, goumchi nai aakihtsün khaiuniathso apem nou nung amkhame.

⁹“Asam tü noukhan pokü noinaito lü-anglu!

¹⁰Ajantso eh nou thalouwanau noinai, atsüoting eh nou thalouwane, ajantso sah nou heatau noinai, atsüoting sah nou tsangkü mowanne. Nung asiohoi nouso thaiutha ajeilu naiuso amonglam haoson ajontsün noin.”

¹¹Nai amao thainian tsak, goumchi ainou sungkü ngü ep. Nung tü Onnemok Thso ongli ong nime pokü noiküla, naiuso nungüh dragon pao khekkü chite.

¹²Apaüh aya nou thainian oukong chikü apa khako kankeiji. Sübao mou meilo, ayating thainian tü apa goumchi naiuso nungai noinso chikü hau apaüh kojakü amkham-iji.

¹³Nung thainian müjam nou athanga chhi asong chhin; apaüh khaiunia nouso khako aün ainou goumchiai in sao-in.

¹⁴Naiuso nung ayating thainian khako sübao athanga nouso chhiau apa hau kiu, nungüh apaüh goumchiko noinso sapthio-in. Naiuso apaüh sübao thainian sah mou pokü shan, apa sotsom tsak shanau goumchiko noinso tü ngiom.

¹⁵Thainian müjam nou ayating thainian sotsom nou da ii matthioau kiu, nungtiphe nung sotsom nou ngio chiteau shio-e, naiuso sauhaiüh nung tü tsüame ngüso chikü luatau kiu.

¹⁶Nung thainian nou khaiunia chikü, asong naiuso ehen, memei naiuso tsosilu, sua naiuso khaiuniatsüo, nungso chikü pha uai tsüdekünai khakheng nai ii nou thanglut-iau koja.

¹⁷Nung ii thainian nian, tsüdekünai apa nian haove sauüh tsütaiu, apaüh atuh au tsüdekünai ajanau tsüshio-e.

¹⁸Nung mongthat mongsai thaiutha jonji. Sauüh angelaau shiom, apaüh nung thainian haove veluau shio-e, tiautenai nung haove khaiunia tsak nian thaiutha noin. Apa haove 666 noin.