Read Khiamniungan Naga Atsangshei 14 Bible Online

Atsangshei 14 - Khiamniungan Naga bible

Atsangshei 14

¹Ngü thapnai Onnemok Thso nou Zion kingai tsakü, apako khaiunia haove 144, 000 hakü, ngüso khakheng nai apa nian naiuso apa Po nian satkü noiküla.

²Naiuso ngü aün ainou khiamtsang ngemli, naiuso ahmokngem asongli, angem tsak lula. Nung ngü lulatsün angem nou kokiang khung ngemli noiküla.

³Khaiunia haove 144, 000, aa thainian püle, naiuso petchehoi nousoüh jih ayan tsak, sübao ngüsoühlu ngen, nung nokpao noikham khako tsaküta hang. Khaiunia le ongko sauhai shiosan nung ngüsolu noiküla.

⁴Ngüso sauhai meshen chija nyiuhai ko angei tsükankeikü siokü taiulutsün asangting khaiunia nouso noiküla. Onnemok Thso nou tilüsongai khuji, ngüso apa phiai hoilutkü khuji. Goa naiuso Onnemok Thso thaiutha ayating lusiotsünso kiuau nou nungso khaiunia ong ainou shiosaniu.

⁵Ngüso sonkuo nai tsütsüokü ti tsüep; ngüso thsülupia tsüpokünso noin.

⁶Nai aünwem nai aünhong amao tsak jeikeikü, goumchi khaiunia nouso kau pungkü, shingkhan pungkü, ngio pungkü, naiuso mele pungkü athontsüyangkün Ngem amei ngio thipengau kankü ngü ep.

⁷Apaüh sangh asong nou ngiom, “Goa asulühat, naiuso apa asongting nian lülomsan! Tititenai apaüh khaiuniahoi tü mi yamau atao shikü noin. Sauüh goum, aün, khiamnok, naiuso haiungan nouso shan apa lü-am!”

⁸Aünhong müjam nou chongting nou tü hoilutkü ngioji, “Apa loianiu! Babilon asong nou loianiu! Apaüh apa theng khaiunia piakü hau shiu-in, nung theng akongting apa tsütsamtsütsüo achinek sungtsün noin!”

⁹Aünhong süme nou chongting hong nime nou tü hoilutkü sangh asong nou ngioji, “Khaiunia sauhaiüh nung thainian naiuso sotsom amji, naiuso meshen khakheng nai tsüdekünai pha nai ii nou luji,

¹⁰Goa mongmat sungtsün thengkam nai apa mongmat sungtsün theng sübao khemlukü noin, nung apaüh lüko shiu-e! Naiuso nung shiutsünso asio aünhong khako naiuso Onnemok Thso khako in naiuso taoson lung nou omhe-i-e.

¹¹Ngüso angja-itsün inkhao athontsüyangkü sungji. Naiuso sauhaiüh nung thainian naiuso apa sotsom amji, naiuso apa ün ii taim, asoh, anyi, ngüso aalu tsüepkü angjaji.”

¹²Sauhaiüh Goa ngiokhem nouso angkü Yisu da monglam, asiohoi thaiutha nung ajeilutsün haoson tsak nai ajontsün noin.

¹³Nai ngü aün ainou sangh tsaküh ngiokü lula, “Nung lüsat: Loyakü sauhai APAOU chhi nai eji, ngüso thaiumei!” “Ah, atsüoting!” ta Onthso nou thashiji. “Ngüso meshen atannattsün chhi ainou alu-e, tiautenai ngüso chhi atsangshei ngüso ko aikü khuji.”

¹⁴Nai ngü lunai, thengmia athaiu tsak ep, nai nung thengmia chiai Khaiunia Thso khekkü tsak moknoi, apa khaiu nai chaiou kandio, naiuso pha nai tsolam sah amon tsak semküla.

¹⁵Nai amkham tsam ainou aünhong amao tsak sungkü thengmia nai moknoitsün tü sangh asong nou wekü ngiom, “Ni tsolam sah kankeikü goumchi be-eiuyam lüyam, tiautenai ayamheau atao sao-iu; goumchi nou be-eiuyamau nyaniu!”

¹⁶Nungai sau thengmia nai moknoi, apaüh goumchi nai tsolam sah kankeikü goumchi be-eiuyam nou yamhe.

¹⁷Nai amao aünhong aün amkham tsam ainou sungkü ngü ep, naiuso apaüh lüko tsolam sah amon tsak semkü noiküla.

¹⁸Nai in chiai oukong suntsün aünhong amao tsak amthang ainou sungh. Apaüh tsolam sah amon semkü noitsün aünhong tü sangh asong nou wekü ngiom, “Ni tsolam sah amon nou kankeikü goumchi sainaoshep lükamshi, tiautenai sainaoshep nouso semiu!”

¹⁹Nungtiphe nung aünhong nou goumchiko meshen tsolam sah kankeikü, goumchi sainaoshep kamshi, küta Goa mongmat sungtsün sainaoshep noipektsün nai thio.

²⁰Sainaoshep nouso nung noknio bechiai anoipektsünsoüh ngamkei, naiuso anoipektsün ainou shelei li she sungkü atheng nai kilometer 300 naiuso auo nai meter nime ngoikü tsang.