Read Khiamniungan Naga Atsangshei 15 Bible Online

Atsangshei 15 - Khiamniungan Naga bible

Atsangshei 15

¹Nai ngü aün nai athang ii asong amao ep. Nungko hong chinyat nouso angja chinyat sonkü noiküla, nung athon nouso noin, tiautenai nungso Goa mongmat sungtsün athonting noin.

²Nai in nouko lao-etsün khiamnok susaiu tsakli ngü ep. Nung thainian sotsom naiuso haove tsangkü sau nian tsak noiküla, nungso chiai shiolotsün lüko ngü ep. Ngüso hau Goa nou kiutsün kokiang semkü khiamnok susaiu kuo ai tsakü,

³naiuso ngüsoüh Goa yathsüotsün Mosa jih, naiuso Onnemokthso jih jihkü ngioji: “Apemshiotsün APAOU Goa, achhi titi asong naiuso athanga noin! Mele nouso nokpao, ayam nouso titi asio naiuso ngiotsüo noin!

⁴Ni lun tsühatkü sau noin APAOU? Ni nou niansong tsangshei kiuau sauüh nanne? Ni lu asio noin. Mele chikü shikü akhako amkhame, tiautenai ni nou asio chhi nouso apem nou epiu.”

⁵Nung yanlükhunkütünai, ngü aün nai Goa hatsün nejenkhio nungko sonkü amkham tsam tsak sopkü ep.

⁶Nung amkham tsam ainou angja chinyat taiutsün aünhong chinyat nou sungh, ngüso sheitho chaiou ajin ou nou thokü yanthsüokü, naiuso chaiou omthsa ne nou kong nai woikü noiküla.

⁷Nai nung aa thainian püle ongko tsaküh nungso aünhong chinyat hau athontsüyangkün Goa mongmat sungtsün nou meankü chaiou thengkam chinyat kiu.

⁸Goa ajinka oukong ainou sungtsün inkhao nou amkham tsam mean; naiuso nungso aünhong chinyat nou angja aluhat chinyat mokhemlukün lektso sau nung amkham tsamai nappau tsüshio.