Read Khiamniungan Naga Atsangshei 16 Bible Online

Atsangshei 16 - Khiamniungan Naga bible

Atsangshei 16

¹Nai amkham tsam ainou nungso aünhong chinyat nouso tü, “Lükhu küta Goa mongmat sungtsün thengkam chinyat nou goumchi nai lükhepthio!” ta ngiotsün sangh asong tsak ngü lula.

²Ayating aünhong nou khuküta apaüh semtsün amongmat thengkam nou goumchi nai khepthiokiu. Nung thainian ii sontsün naiuso apa sotsom amtsün khaiunia nou tü ajeiatau thatü kiatsün chaikia nou sungh.

³Nai aünhong nime nou apa thengkam khaimnok chinai khepthiokiu. Nai khiam nung khaiunia she li iula, naiuso khiamnok nai noitsün aa thainian apem ean.

⁴Nai aünhong süme nou apa thengkam haiu nouso naiuso khiamngan nouso ai khepthiokiu, naiuso nungso she li iulan.

⁵Khiam nouso chiai oukong noitsün aünhong nou ngiotsün ngü lula, “O Asio Goa, ni sau noin naiuso noiküla!” Amikhem chhi nouso thakü noin!

⁶“Ngüsoüh asiohoi naiuso e-po nouso she lopeng, naiuso ni ngüso hau ashiuau she nou kium. Ngüso ti maikü noin ngüsoüh nung epji!”

⁷Nai ngü amthang ainou sangh tsaküh ngiotsün lula, “APAOU Goa, Apemshiotsün! Ni mikhemtsün atsüoting ngiotsüo naiuso asio noin!”

⁸Nai aünhong püle nou apa thengkam aje nou ta khepthiokiu, naiuso khaiunia ta ajek athsüoting nou kakeiau kiu.

⁹Nai khaiunia nouso tü ajek nou thsüokü kakei, naiuso ngüso angja nungso khako oukong taiutsün Goa nian athesan kiu, lüko ngüso apa hau nianlom naiuso ajinka kiuau tsümongchio.

¹⁰Nai aünhong pungo nou apa thengkam thainian nokpao noikham nai khepthiokiu. Nai thainian nokshing noikham anyakhem iula, naiuso ngüso omhe nou shioko meshen lei ta jei,

¹¹naiuso ngüso akia naiuso chaikia thaiutha aün Goa lochikiu. Lüko ngüso meshen angei yam ainou mong tsüphokle.

¹²Nai aünhong luok nou apa thengkam Eufrates Haiu asong nai khepthiokiu. Nai ajepek ainou shitsün nokpao nouso thaiutha yam sopkiuau nung Haiu apban.

¹³Nai lükiu khekkü tsüsiokün onthso süme sungkü ngü ep. Nungso dragon pao son ainou, atsüotsüdekün e-po son ainou sungkü noiküla.

¹⁴Ngüso biya onthso athanga ii chhitsünso noin. Ngüsoüh Apemshiotsün Goa asong ajekhaiu nouko ehliau thaiutha aikü kamshiau goumchi nokpao nouso chikü dongai khuji.

¹⁵“Anglu! Ngo kau tsakli shiji! “Sau tsosa tsütsakeiau naiuso nyong khako amiam tsüepau thsümonkü naiuso shitho thaiusankü noiji, apa thaiumei!”

¹⁶Nai onthso nousoüh nokpao nouso Ibri ngio nai Armagedon ta jontsün athang tsak ko kamshi-in.

¹⁷Nai aünhong chinyat nou apa thengkam aünwem nai khepthiokiu. Nai amkham tsam nai nokpao noikham ainou sangh asong tsak sungkü ngioji, “Nung chhikhemiu!”

¹⁸Nungko ahlap, angem, ahmok sungh, naiuso ahattau gohhaiu tsak shin, nung apem chiko tsümeitingkün gohhaiu tsak noin!

¹⁹Nai noknio asongting nou süme hau thekü janthat, naiuso goumchi apem ai noknio nouso luthean. Goa mongmat sungtsün akhosak theng thengkam nung Babilon asong hau kiuau thaiutha Goa khako apa yangsaniu.

²⁰Khiamjet nouso apem khuwan, king nouso apem nyoman.

²¹Aün ainou san tsoi kheikü pungongo ngoikü lethsangkü khaiunia da salut, naiuso nungh san aluhat thaiutha khaiunia nou Goa lochi, tiautenai nung alohat thatü asong tsak noiküla.