Read Khiamniungan Naga Atsangshei 17 Bible Online

Atsangshei 17 - Khiamniungan Naga bible

Atsangshei 17

¹Nai aünhong chinyat ongko thengkam chinyat semtsün tsak shikü ngüko chitekü ngiom, “Ashi, ngü ni tü ajisiwop chhitsün titi luhatau noin nung hanne, nung haiu piakü shimkü noitsün noknio asong noin,

²Goumchi nokpaohoi nou apako ajisiwop chhiji, naiuso goumchi khaiunia nouso nung ajisiwop nou thengtuk li tukkat.”

³Onthso nou ngo tü jim, naiuso aünhong tsaküh ngü liutsa ai nialükhun. Nungko Goa lochitsün nian nou miankü, akhaiu chinyat naiuso ong che potsün aseng thainian chiai moknoikü nyiuhai tsak ngü ep. Nung tü thainian khaiu chinyat naiuso ong che pokü noiküla.

⁴Nung nyiuhai nou anyaching naiuso aseng leng tholokü, chaiou, chaiou lung, naiuso lakkeng lakkü noiküla. Apa pha nai achinyan ajisiwop tsüsiokün jengtsaiu nou meankü chaiou thengkam tsak noiküla.

⁵Apa khakheng nai nian tsak satkü noiküla, nung akaungio: “Babilon asong, goumchi ajisiwop chhitsün naiuso achinyan jengtsaiu nyiu” ta

⁶naiuso nung nyiuhai asiohoi she nou naiuso Yisu da monglamtsünso sheüh tukkattsün ngü ep. Tilai ngü apa ep, ngo thatü thsüokü ngawan.

⁷Aünhong nou ngo tü ngiom, “Ni tiau ngaji?” Nung nyiuhai naiuso apa kankü tsakeitsün khaiu chinyat, ong che potsün thainian akaungio ngü ni tü ngioko.

⁸Nung thainian jam aa noiküla, lüko tsünoishi, apa athantsüyangkün khan ainou sunge, naiuso amowantsün nai khuau shimkü noin. Goumchi shan nai yakü aa thsam nai sauhai nian tsüsat, nungtin goumchi ko noinsoüh nung thainian titi noiküla, lüko lo tsünoishi, lüko apa shishi-e ta ngüso ngawane.

⁹Nung mongthat mongsai naiuso angelatsün noiau athat noin. Khaiu chinyat nou king chinyat nungso chiai nyiuhai nou mokkü noin. Ngüso loüh nokpao chinyat nouso noin:

¹⁰ngüso püngo to loianiu, lo tsakühlu nok shingji, naiuso amao tsak nou loüh moshi; tilai apa shi-e, apaüh sakkhalektsolu nok shinge.

¹¹Naiuso sübao thainian jam aa noiküla, lüko tsünoishi, apa nokpao petjei nou, chinyat nou mongko tsak naiuso apato amowan nai khu-e.

¹²“Ni eptsün ong che nou nokpao che nouso noin ngüsoüh loüh nokshing moyalu, lüko gontao tsak thaiutha thainian nouko ngüsoüh nokpao nouso oukong nou kiuji.

¹³Ngüso che nouso mongthat tsaklu, ngüsoüh oukong naiuso aniakei oukong nou nung thainian hau kiuji.

¹⁴Ngüsoüh Onnemok Thso thako li-e-e, lüko Onnemok Thso nou apa achosan nousoko hakü ngüso shio-e; tiautenai apa APAOU nouso khaiuko APAOU, Nokpao nouso khaiuko NOKPAO.”

¹⁵Aünhong nou ngo tü ngiom, “Khiam sübao chiai ajisiwop chhitsün moknoikü ni ep, nungso: mele, khaiunia, kau, naiuso ngio nouso noin.

¹⁶Ni eptsün ong che naiuso thainian nungsoüh ajisiwop chhitsün tü chinyane; ngüsoüh nung nyiuhai nou taiutsün chikü kanlükhune küta apa tsosa wane; ngüsoüh nyiuhai nou nyih he-e naiuso apa in nou jawane.

¹⁷Tititenai Goa nou aikü chhitsün tsangkü apa mongmat kankü khu-iau ngüso mongpemai mongchiotsün taiukiu naiuso Goa ngio nouso atsüo moshinapkün lektso thainian hau nok shingau oukong kiu.

¹⁸“Nyiuhai ni eptsün nung noknio asong sübaoüh goumchi nokpao nouso chiai nok shingtsün noin.”