Read Khiamniungan Naga Atsangshei 18 Bible Online

Atsangshei 18 - Khiamniungan Naga bible

Atsangshei 18

¹Nungso yanlükhunkütünai ngü aünhong amao tsak aün ainou saokü ep.Apa oukong asong noiküla, naiuso apa ajinka nou goumchi athom awon-i.

²Apaüh sangh asong nou wekü ngiom, “Apa loianiu! Babilon asong nou loianiu! Loto apa angei onthso nouso akihthang, naiuso tsüsiokün onthso nouso khothiotsün, tsüsiokün i-in apem naiuso achinyan waiohoi noitsün iula-iu.

³Tititenai apa ajisiwop chhitsünko mele apem tukkat-i. Goumchi nokpaohoi nousoüh apako ajisiwop chhin, naiuso apa achinek tsülaokü ainou goumchi thsale memei au iula-in.”

⁴Nai ngü aün ainou sangh amao tsaküh ngiokü lula, “Jükhaiuniaso asungan! Apa ainou asungan! Asamüh apa angei chhi nai lahelou; naiuso asamüh apa alohat nai haoson lalouha!

⁵Tititenai apa angeiso aünli tsokkü kamsaniu, naiuso apa tsümeikün yam nouso Goa nou yangsaniu.

⁶Apaüh asam tü titi kankei nungtilu apa tü lükankei; apa chhi apem thaiutha apa hau phopkü laokü lükiushi. Apaüh athaiutha thengkam khemloutsün tü nime phopkü akongting theng nou apa thengkam lümiankiu.

⁷Apa chija ajinka naiuso abülom kiutsünli apa hau amongkia naiuso angja tekkü lükiushi. Tititenai apaüh meshen mongai ngioji, ‘Ngo nyiuhai nokpao nou nungai mokkü noin! Ngo jihi tsüde, Ngü amongkia au tilaitso tsünge-e!’

⁸Nungshioko nyitso to apa tü alohat, akia, ashap, naiuso naiusile nou shiuh-e. Naiuso apa in nouko jahwane, tiautenai APAOU Goa sauüh mi yamji nung oukong noin.”

⁹Goumchi nokpao nouso sauhai apako ajisiwop naiuso achinek kankei, tilai ngüsoüh apa jektsün inkhao innyai ainou eppe, noknio thaiutha shappe.

¹⁰Apa omhetsün haoson nai haau hat nou shioko ngüso kummai tsakü ngioji, “Inyate! Inyate! Nung asong naiuso akong noknio Babilon! Gontao tsak kolu ami khemiu!”

¹¹Goumchi chaile khaiunia nouso lüko apa thaiutha mongsaiukü shapji, tiautenai loto ngüso chai sauüh tsütuhshi;

¹²ngüso chaiou, tangkason, chaiou lung, naiuso lakkeng nouso sauüh tsütuhshi, ashethup ne, aseng ne, ewoi anelang, chaiou, paiou iin chikü, shenpok hu nou shantsün in chikü, chaiou pai, sonkhiam son, son, marble lung nou shantsün iin chikü,

¹³naiuso kian lonyatsün thio, thangkoinek, angannyam, theng, khaiutsom, wonne, jangtso, onnemok, mokthso, tsamkei, suahoi, naiuso khaiunia aa lüko, nungso apem loto sauüh tsütuhji.

¹⁴Chaile haiüh apa tü ngiom, “Ni theau mongchiotsün jengtsaiu apem mowaniu, ni amemei naiuso aleng jengtsaiu apem khu-iu, loto ni nungso jengtsaiu tilaitso müjam tsüepshi-e!”

¹⁵Chaile khaiuniahoi nung noknio ainou memei iulaitsünso apa omhetsün nai haoson theau hat nou shioko kumai tsakü, mongsaiu-e,

¹⁶naiuso ngio-e, ne ashethup naiuso nyachingkü aseng ne, aseng, chaiou, chaiou lung, naiuso lakkeng nou thotsün “nung Noknio Inyate! Inyate!

¹⁷Gontao tsak mongkolu apa taiutsün jengtsaiu chikü mowaniu!” Kheng nouso, khengpao nouso, atsakeitsünso, naiuso khiamnok nai chhikü heshiu eptsünso apemüh kumai tsakü,

¹⁸apa jahtsün innyai ainou inkhao epkü wekü ngiom, “Nungko nung noknio asong khekkü ti noknio tilaitso tsünoiküla!”

¹⁹Ngüsoüh meshen khaiu nai pu nou lamlutkü mongsaiukü shapkü ngiom, “Inyate! Nung noknio asong thaiutha Inyate! Nung noknio nai sauhaiüh kheng tsantsün nouko apa chiai memei iulan, nung noknio noin! Naiuso gontao tsak mongko apaüh taiutsün apem mowaniu!”

²⁰Aün, lümongling, tiautenai apa mowaniu! Asiohoiso, honghoiso, naiuso e-po nouso, lümongling! Tititenai apaüh asam tü ti chhin nungshioko Goa nou apa mowani-iu!

²¹Nai oukongting aünhong tsaküh anoipektsün lung asong tsak lukkü shikü khiamnok nai yakthiokü ngiom, “Nungti Babilon noknio asong nou thsüokü loiane naiuso loto müjam tilaitso tsüepshi-e.

²²Kokiang khongtsünso, jih hangtsünso, poipoi naiuso jangong mattsünso sangh nou ni tilaitso tsüluhashi-e!

²³Tson awon ni da tilaitso tsüepshi-e, tsamsigoh shanloutsün naiuso nungti akiha khutsün sangh nou ni da tilaitso tsüluhashi-e. Achaile nouso goumchi chikü nai akonghoi noiküla, lüko ni athang aphio chhi nou mele apem sapthiokiu-iu!”

²⁴E-po nouso, asiohoi nouso she nung Babilon noknio nai ep nou shioko apa mowan-in, ah, goumchi nai loattsünso chikü she nungko epsan.