Read Khiamniungan Naga Atsangshei 19 Bible Online

Atsangshei 19 - Khiamniungan Naga bible

Atsangshei 19

¹Nung yanlükhunkütünai aün nai khaiunia piakü ngemtsünli angem asong ngü lula, “Goa nian lülom! Aasan, ajinka, naiuso oukong sam Goa ün!

²Apa mikhemtsün ngiotsüo naiuso asio noin! Ajisiwop chhitsün tsangkü sauüh goumchi longeikiu apa mowani-iu. Goa nou apa mowani-iu, tiautenai apaüh apa yathsüotsünso loat.”

³Loüh ngüsoüh wekü ngiom, “Goa nian lülomsan! Nung noknio asong jahtsün innyai ainou inkhao athontsüyangkü sungji!”

⁴Petchehoi kheikü püle naiuso aa thainian püle nouso Goa sau nokpao noikham nai moknoiküla, apa tü kauthiokü amkham. Ngüsoüh ngiom, “Amen! Goa nian lülomsan!”

⁵Nai nokpao noikham ainou sangngem tsak sungkü ngiom, “Khaiunia chikü, apa yathsüotsün chikü, asong naiuso ehen chikü, apa amkhamtsünsoüh sam Goa nian lülomsan!”

⁶Nai hoi asong tsak sangli, naiuso khiampek ngemli, amok asong ngemli ngiokü ngü nungti lula, “Goa lülomsan! Tititenai Apemshiotsün sam APAOU Goa, nung nokpao noin!

⁷Sam monglingeko, samüh apa niansong nian lomsanko! Tititenai Onnemok Thso tsamsigoh shantsün atao shisao-iu, naiuso apako kihaau nou meshen chija khemlou-iu.

⁸Sheitho thaiutha ne ashethup, ajin ou naiuso ayanthsüo ne akihaau nou hau kiu-iu.” (Nung ne ashethop athat nou asiohoi ün asio chhi nouso noin.)

⁹Nai aünhong nou ngo tü ngiom, “Nung lüsat: Onnemok Thso tsamsigoh shantsün sümai nai sauhai jon, ngüso thaiumei.”

¹⁰Nai ngü apa amkhamau apa hok dongko kauthio, lüko apaüh ngo tü ngiom, “Nungti lachhi! Ngo niko naiuso adeisinioso ko aikü yathsüo-etsün hai tsak noin, nung Yisuüh hantsün ngiotsüo mongkü thalutsün noin, Goa lü-amkham!” Tititenai nung ngiotsüo Yisuüh tsangsheikü hantsün e-po nouso lothsümontsün noin.

¹¹Nai ngü aün sopkü nungai mokthso athaiu tsak ep. Nung chiai moknoitsün tü Mong lamtsün naiuso Ngiotsüo ta jon, nungüh ngiotsüo nai apa ehlitsün nai mikhemji.

¹²Apa niovei innyaili, naiuso apa khaiu nai kandio piakü keikü noiküla. Apa da nian tsak satkü noin, lüko apa tü simkü nung sauüh tsünge.

¹³Apa phalaiu phakhut she nou miankü noiküla, Apa nian “Goa Ngio.”

¹⁴Aün nai noitsün akonghoi nou nethaiu ashethop naiuso ayanthsüo thokü mokthso athaiu nouso chiai moknoikü apa phiai hoilut.

¹⁵Nung tsangkü apaüh mele nouso shioloau noin, apa son ainou sah amon tsak sungh. Apaüh ngüso chiai oukong nou nok shinge, naiuso Apemshiotsün Goa ahating mongmat sungtsün nou theng noipektsün tü ngamkei-e.

¹⁶Apa phakhut nou tü naiuso shiokha chiai, “Nokpao nouso khaiuko NOKPAO, naiuso APAOU nouso khaiuko APAOU” ta nian satkü noiküla.

¹⁷Nai ngü aünhong tsak aje nou chiai tsakü ep. Apaüh maou nai jeikeitsün waio chikü tü sangh asong nou wekü ngiom, “Ashi, naiuso Goa sümai asong thaiutha aikü akamshi!

¹⁸Asamüh nokpao nouso nyih, süpai asong nouso nyih, oukong nouso nyih, mokthso nouso naiuso nungso chiai moknoitsünso nyih, khaiunia chikü nyih, khaiuniatsüo naiuso sua nouso nyih, naiuso asong si ehen chikü nyih, heau Goa sümai asong nai aikü akamshi!”

¹⁹Nai nung mokthso chiai moknoitsün naiuso apa akonghoi nouso thako liheau thaiutha, nung thainian naiuso goumchi nokpao nouso ngüso akonghoi kamshikü ngü ep.

²⁰Nung thainian nou atsüotsüdekün e-po sauüh apa khako alonga ii chhi chhikü noiküla, ngüne thaluküta aikü khothio. (Nungko sauhai thainian ii taiuküla, naiuso thainian sotsom nouso tü amkham, alonga chhi nou tsangkü sapthio-itsün noiküla.) Nung thainian naiuso atsüotsüdekün e-po nemtso inheeng nai aa yakthiowan.

²¹Ngüso akonghoi apoi nouso sau mokthso chiai moknoikü apa son ainou sah amonting tsak sungh, nungüh loat, naiuso waio nouso chikü nou ngüso nyih ngüso tü omtso he.