Read Khiamniungan Naga Atsangshei 2 Bible Online

Atsangshei 2 - Khiamniungan Naga bible

Atsangshei 2

¹“Ephesa nai noitsün donthe hong dongai nung lüsat: “Sauüh meshen pha uai kianthsüo chinyat semkü, naiuso chaiou tson taiutsün chinyat ongko tsakeiji, apaüh nungso ngiongem ngioji.

²Ni ti chhin Ngü ngeji, ni titi kowekü chhin naiuso titi mongaulaiukü jeilu nung Ngü ngeji. Ni khaiunia tsümeikünso kiploau tsüshio ta Ngü ngeji, naiuso sauhaiüh ngüso hongthonhoi ta ngioji lüko ngüso hongthonhoi tsüde, ta ni thelu-iu, küta ngüso atsüotsüdekünso ta epsaniu.

³Ni jeilu, ni Jünian thaiutha omhe, lüko ni tsüshanan, nungso chikü Ngü ngen.

⁴Lüko athako ngü nung taim: ni ngo tü aya naili tsütsüojinshi.

⁵Nungtiphe ni ti ainou salian nung lüyangsan! Ni angei ainou mong lüphokle küta aya chhi nouso lüchhi. Ni mong tsüphokle naito, Ngo adongai shikü atson taiutsün ainou tson kanlükhune.

⁶Lüko nung ngio ni lüko ngeji: Nikola hai chhi ti Ngü chinyanji, nungso ta ni lüko chinyanji.

⁷“Donthe nouso tü Onthso nou ti ngioji, asam noukhan pokü noinaito, nung lü-ang! “Sauüh shioji apa hau ngü Goa Aimong ai noitsün aa pai ainou shep eheau kiu-e.

⁸“Smyrna nai noitsün donthe hong dongai nung lüsat: “Sau aya naiuso athon, sau eeküta ahkü shin, apaüh nungso ngiongem ngioji.

⁹Ngü ni atsüoting omhe naiuso tsosilu ta ngeji, lüko ni memei noin! Sauhaiüh ngüso Yihudahai ta ngioji, lüko ngüso Yihudahai tsüde, lüko ngüso Biya ün hoi noin!

¹⁰Ni ti angja epau shimkü noin nunglun lahatsai. Anglu! Asam liluau thaiutha Biya nou asam ajantso akhoutsamai khouthioau shimkü noin, naiuso angja omhe ajekhaiu che saokü noi-e. Ni ee saokü lüjeilu, naiuso ngü ni hau ashiolotsün paopei tsakli aa kandio nou kiu-e.

¹¹“Donthe nouso tü Onthso nou ti ngioji, asam noukhan pokü noinaito nung lü-ang! “Sauüh shioji apa müjam etsün nou tsüangja-e.

¹²“Pergamum nai noitsün donthe hong dongai nung lüsat: “Sauüh sahu nemtso ai amonting pokü sah taim apaüh nungso ngio ngioji.

¹³Ni tiai kihji, nungai Biya noikham noin. Ni Jünian mongkü helukü sübao taoko Jü amonglam mitha kantsün sau Antipa asam ongko Biya kihtsün nai luat, nung taoko lüko ni amonglam mongkü noi, nungso ngü ngen.

¹⁴Lüko nitü khengshiau ngü ngio thsaothsaokü taim, tititenai Balam, sauüh Israel thsoso hau angei sunhe-ikü sotsom nouso hau kiutsün chaithio heshiu nouso he-in, naiuso tsütsamtsütsüokü kankei-au, Balak tü chim, apaüh tsandetsün thetsünhoi ajantso ni nungko taiuji.

¹⁵Nungtilu Nikola haiüh tsandetsün angtsünhoi ajantso asam ongko noin.

¹⁶Nungtiphe mong lüphokle! Tsüdekünaito, Ngo adongai shakta shi-e, küta jüson ai shitsün sah nou ngüso thako lihe-e.

¹⁷“Donthe nouso tü Onthso nou ti ngioji, asam noukhan pokü noinaito nung lü-ang! “Ashio eptsünso hau ngü tsangkü taiutsün manna ajantso kiu-e. Naiuso ngüso pungkü hau lung athaiu tsak, naiuso nungh lung da nian ayan tsak, sübao nian alusantsün tü simkü amao sauüh tsünge nung satkü kiu-e.

¹⁸“Thyatira nai noitsün donthe hong dongai nung lüsat: “Sau niovei innyaili, naiuso sau hok son ajekli, nung Goa Thso ainou ngiongem.

¹⁹Achhi ngü ngen. Ni tsüojintsün, ni mongkiutsün, ni yathsüotsün, naiuso ni jeilutsün ngü ngen. Ni aya chhi nai nouko to athon nai tekkü chhitsün, ngü ngen.

²⁰Lüko ngü ni tü khengshiau nung taim: Jezebel sauüh apa chija Goa ngem kantsün tsak ta ngioji ni nung jeiluji. Apaüh tsandetsün tsangkü ngo yathsüotsünso tsütsamtsütsüokü chhiau yam tsüthakünai niaji naiuso sotsom nouso hau chaithio thiotsün heshiuji.

²¹Ngü apa hau mongphokleau atao kiu, lüko apaüh meshen tsütsamtsütsüokü ainou phokleau tsümongchio.

²²Nungtiphe ngü apa naiuso apako tsütsamtsütsüokü chhitsünso tiko thsüokü omhe noin nung then tsak chiai yakkane. Ngüsoüh apako tsümeikü chhitsün ainou mong tsüphoklekü naito, nung ngü lo chhi-e.

²³Ngü apa sahoiso lüko loat-e, nungphiai amonglamhoi pungkü nou aiutsün naiuso mongyang ngetsün nung Ngo tsak noin ta ngela-e. Asam khaiunia pungkü nou ti chhi taim ngü nung lingkü amai kiu-e.

²⁴“Lüko Thyatira nai sauhaiüh nung atsandetsün tsülukü poikü noin, nungti ajantsoüh ‘Biya ün aokü nou chhi nouso’ ta jontsün asamüh tsünge. Asam tü ngü amao thsa titso tsükanlut-iji, ta ngü ngioji.

²⁵Nungti lüko asamüh ti taim nung ngo moshikün lektso mongkü hekü lünoi.

²⁶Sauüh shioji, naiuso athon saokü jüngio angkü kankeiji, ngü Po ainou ti ep, nung apa hau Mele nouso khako oukong kiu-e.

²⁷Lak saitsün nou lak titi nelangkü thiopekji, nungti apaüh oukong nou ngüso khako nokshing-e.

²⁸Loüh ngü apa hau Nipoi Kianthsüo nou kiu-e.

²⁹“Donthe nouso tü Onthso nou ti ngioji, asam noukhan pokü noinaito nung lü-ang!