Read Khiamniungan Naga Atsangshei 20 Bible Online

Atsangshei 20 - Khiamniungan Naga bible

Atsangshei 20

¹Nai athantsüyangkün khan bekhan kiaptsün naiuso sonkhiang asong tsak apa pha nai semkü aünhong tsak aün ainou saotsün ngü ep.

²Apaüh dragon pao sübao akeng pao tsüdekünai Biya noin, apa thalouküta pon heng tsak thaiutha ke.

³Küta athantsüyangkün khan nai lokthio, naiuso pon heng tsak nou mopungkün lektso apaüh mele nouso asapthioau tsüshiokü hau thaiutha nung kiappan, naiuso nung chiai ii thanglut. Nungphiai atao letletkü thaiutha apa sokau noin.

⁴Nai ngü nokpao noikham nouso ep, naiuso nungso chiai moknoitsünso hau mikhemau oukong kiu. Naiuso Yisuüh hantsün tsangsheikiutsün thaiutha, naiuso Goa ngio ngiotsüo thaiutha sauhai loat nungso onthso nouso ep. Ngüsoüh nung thainyan tsüdekünai apa sotsom tü tsüamkham, naiuso khakheng nai naiuso pha nai thainian ii thangluttsün tsülou. Ngüso aa noi, naiuso Khrista ko pon heng tsak thaiutha nokpao nousoüh lilu nok-shing.

⁵(Pon heng tsak mopungkün lektso ekü noi nouso ahkü tsüshi-e.) Nung ee chongting nouso ahkü shitsün noin.

⁶Sauhai nung chongting ahküshitsün mongko han ngüso amongling asong naiuso ouk. Müjam etsün nou ngüso khako chhiau ti oukong tsünoi, ngüso Goa naiuso Khrista mesonhoi iula-e, naiuso ngüsoüh apako hakü pon heng tsak thaiutha nokshing shinge.

⁷Pon heng tsak nou thangoi nai, Biya nou akhotsam ainopu soke,

⁸küta apa goumchi apemai pengpunkü noitsün mele nouso sapthioau khu-e, nung Gog naiuso Magog noin. Khiamnok sai nai singtsoli piakü Biya nou ngüso hoi chikü ehliau kamshi-i-e.

⁹Ngüso goumchi meankü khuküta asiohoi naiuso apaüh tsüojintsün noknio nou lemluwane. Lüko aün ainou in saokü ngüso jahwane.

¹⁰Nai Akausai, sauüh ngüso sapthio-in, nung athontsüyangkün inheeng nai thainian naiuso atsüotsüdekün e-po nousoko yakthiowan; naiuso ngüso asoh anyih tsüvekü athontsüyangkü omhe noi-e.

¹¹Nai nokpao noikham athaiu asong tsak naiuso nung chiai moknoitsün tsak ngü ep. Apa khako goumchi naiuso aün soikü khuwan; naiuso loto tilaitso nung tsüepshi.

¹²Nai ngü nokpao noikham khako ee nouso asong si ehen tsanoikü ep. Nungko thsam nouso sop, naiuso amao thsam sübao aa thsam noin nung sop. Nungso thsam nai satkü noitsünli ee nouso momo chhi likü mi nou khem.

¹³Nai khiamnok nou meshen da noitsün ee nouso, naiuso ee nok nou meshen da noitsün ee nouso kiushi. Naiuso khaiunia pungkü meshen chhi likü mi nou khem.

¹⁴Nai eantsün naiuso eenok nou athontsüyangkün in nai yakthio.(Nung athontsüyangkün in nou müjam eetsün noin.)

¹⁵Sauhai nian aa thsam nai satkü tsünoi nungso athontsüyangkün in nai yakthio.