Read Khiamniungan Naga Atsangshei 21 Bible Online

Atsangshei 21 - Khiamniungan Naga bible

Atsangshei 21

¹Nai ngü Aünnok ayan naiuso Goumchi ayan tsak ep. Chongting aünnok naiuso chongting goumchi nou yalükhunaniu, naiuso khiamnok nou mowan.

²Naiuso meshen tsammongpo ko wao-eau ajonloutsün menyiu sheithotsünli khemloukü asio noknio ayan Yirusalem, Goa naiuso aün ainou saotsün ngü ep.

³Nokpao noikham ainou sangh asong tsaküh ngiokü ngü lula: “Lo Goa tsam khaiunia nouko noin! Apa ngüsoko noi-e, naiuso ngüso apa khaiuniahoi iula-e. Goa apa pem ngüsoko noi-e, naiuso apa ngüso Goa the-e.

⁴Ngüso niovei ainou niochekhiam chikü apaüh beiyankiu-e. Nungai loto eantsün, amongsaiu, ashapau, tsüdekünai akia, tsünoishie. Akeng nouso yanlükhuniu.”

⁵Nai nokpao noikham nai moknoitsün tsak nou ngiom, “Lo ngü apem ayan shanji!” Apaüh loüh ngo tü ngiom, “Nung lüsat, tiautenai nung ngio nouso amonglamau naiuso ngiotsüo noin.”

⁶Naiuso apaüh ngiom, “Nung chhikhemiu! Ngo Alpha naiuso Omega, ayating naiuso athonting. Aletsünso sauhaihau lünou ngü aa haiungan ainou ashiuau khiam amai tsüyangkü kiu-e.

⁷Sauüh ashio nou epji apaüh nungso ngo ainou eppe, Ngo apa Goa iula-e, naiuso apa jüthsoau iula-e.

⁸Lüko ahattsünso, ajanheantsün, laplehoi, khaiunia loattsünso, tsütsamtsütsüokünso, alonga chhitsünso, sotsom amtsünso, naiuso atsüotsüdekünso, chikü nyaikü noitsün athontsüyangkün in nai meshen haoson eppe, nung müjam etsün noin.”

⁹Athonting alohat chinyat nou miankü thengkam chinyat semtsün aünhong ongko tsak jüdongai shikü ngiom, “Ashi, ngü ni tü Onnemok Thso tsammongnyiu theau nou hanko.”

¹⁰Onthso nou ngo tü jim, naiuso aünhong tsaküh ngo kingson atsokting tsakai kanlükhun. Apaüh ngo hau asio noknio Yirusalem aün Goa ainou saotsün

¹¹ajin oukü naiuso Goa ajinka hakü han. Nung noknio nou jasper chaiou lung tsak khekkü, ayanthsüo lungjee khekkü asangling noiküla.

¹²Nung dioai asong, atsok bekhan chekü nime naiuso bekhan nouso tü aünhong chekü nime nou jimkü noiküla. Nung bekhan chiai Israel kau chekü nime nian satkü noiküla.

¹³Ajepekai bekhan süme, ajenapai bekhan süme, ajepekkei ai bekhan süme, naiuso ajenapkei nai bekhan süme noiküla.

¹⁴Nung noknio dioai athanya lung chekü nime noiküla, nung chiai Onnemok Thso hongthon nian chekü nime nian satkü noiküla.

¹⁵Nung noknio bekhan nouso, dioai nouso thatluau thaiutha ngüko chitetsün pha nai chaiou pailai athattsün tsak noiküla.

¹⁶Nung noknio ano püle, atheng atham wekülu noiküla. Aünhong nou nung noknio tü apa athatlutsün pailaiüh thatlu: Nung atheng atham 2400 kilometer wekülu noiküla.

¹⁷Aünhong nou loüh nung dioai tü thatlu nai, meter aoluok apem kaithat nouko wekülu noiküla.

¹⁸Nung dioai jasper lung nou shan, naiuso nung noknio nou chaiou nou lu, naiuso nung noknio susaiu khekkü sanglingkü noiküla.

¹⁹Noknio dioai athanya nou chaiou lung in apem nou meikü shan. Athanya ayating nung jasper lung, nime nou Sapphire lung, süme nou Agate lung, püle nou Emerald lung,

²⁰püngo nou Onyx lung, luok nou Carnelian lung, chinyat nou hamleng Quartz lung, petjei nou Beryl lung, lükao nou Topaz lung, che nou Chalcedony lung, chekü tsak nou Turguoise lung, chekü nime nou Amethists lung, nouso noiküla.

²¹Nung bekhan chekü nime nou lakkeng chekü nime noiküla: bekhan pungkü nou lakkeng noulu shan.Nung noknio sonkeng nou ajin ou susaiuli chaiou asangling noiküla.

²²Nung noknio nouko ngü amkham tsam ti tsüep, tiautenai nung amkham tsam nou to APAOU Goa Apemshiotsün naiuso Onnemok Thso nou noin.

²³Nung noknio nai aje tsüdekünai alei awon ti pokü tsünoi, tiautenai Goa ajinka nou nung awoniji, naiuso Onnemok Thso nou nung ün tson noin.

²⁴Nung goumchi khaiunia nouso nung awon nouko tsakei-e, naiuso goumchi nokpao nousoüh ngüso memei jengtsaiu nung awem nai kankü shi-e.

²⁵Nung noknio bekhan ajekhaiu thumkü soppankü taiu-e, nungso tilaitso tsükiappe, tiautenai nungai asoh tsünoi-e.

²⁶Mele nouso ajinka naiuso memei jengtsaiu nungko kankü nappe.

²⁷Tso tsak tsüyanthsüokü, tsüdekünai achinyan kankeitsün, naiuso atsüotsüdekünso sau nung noknio nai tsünappe. Lüko sauhai nian nung Onnemok Thso aa thsam nai satkü noin ngüsolu nappe.