Read Khiamniungan Naga Atsangshei 22 Bible Online

Atsangshei 22 - Khiamniungan Naga bible

Atsangshei 22

¹Goa naiuso Onnemok Thso nokpao noikham ainou sungkü, lungjee khekkü ajin ou aa khiam haiu nung sonkeng awem nai aünhong tsaküh ngo hau han,

²naiuso nung noknio sonkeng awem nai haiu nou tsangkü noiküla. Haiukuk nemtso ai aa pai samkü noiküla, nung pai nou da pon tsak ko chekü nime jam eiu eiuji, alei tsak ko jamjam eiuji, naiuso nung paisa nouso mele nouso lomeiau thaiutha noin.

³Nung noknio nai Goa athesan titso tsüeppe. Goa naiuso Onnemok Thso nokpao noikham nung noknio nai noi-e, naiuso apa yathsüotsünsoüh apa amkhame.

⁴Ngüsoüh apa kha eppe, naiuso apa nian ngüso khakhengai satlutkü noi-e.

⁵Nungai loto asoh tsünoi-e, naiuso ngüsoüh tson naiuso aje awon ti pokü tsünoi-e, tiautenai APAOU Goa nou ngüso ün awon noi-e, naiuso ngüsoüh athontsüyangkü nokpao nousoühli nok shinge.

⁶Nai aünhong nou ngo tü ngiom, “Nung ngio nouso atsüo naiuso amonglamau noin. Naiuso APAOU Goa sauüh apa Onthso e-po nouso hau kiuji, apaüh apa yathsüotsünso hau shakta ti shinappau noin nung hannau hong.”

⁷“Anglu!” ta Yisuüh ngioji, “Ngo shakta shiji! Nung thsam nai e-po nouso ngio angkü kankeitsünso thaiumei!”

⁸Ngo, Yohanüh nungso ngio lula naiuso ep. Naiuso tilai ngü nungso ngio lula naiuso epkhem, aünhong sauüh ngo hau nungso han, ngo apa khako loian, nai ngü apa tü amkhamau noiküla.

⁹Lüko apaüh ngo tü ngiom, “Nungti lachhi! Ngo ahai, niko aikü yathsüo-etsün naiuso adeisinio e-po nouso, naiuso nung thsam nai sattsün angkü kankeitsünso hai noin. Goa lü-amkham!”

¹⁰Naiuso apaüh ngo tü ngiom, “Nung thsam nouko nou khapiam ngio nouso lakiappan, tiautenai nungso chikü shinappau atao shimkü noin.

¹¹Sau ngiotsüo khaiunia tsüde, apaüh loüh ngiotsüo tsüdekü nou lüchhi, naiuso sau tsüyanthsüo apa loüh tsüyanthsüokü lüthe; sau ngiotsüo khaiunia noin apaüh loüh ngiotsüo lüchhi, naiuso sau asio noin, apa loüh asio lü-iula.”

¹²“Anglu!” ta Yisuüh ngioji. “Ngo shakta shiji! Khaiunia pungkü nou ti chhin nung likü amai kiuau ngo ko noin.

¹³Ngo Alpha naiuso Omega, ayating naiuso athonting.”

¹⁴Sauhaiüh meshen sheitho yanthsüokü phetanküta aa pai ainou eiu heau tinkü noin naiuso noknio nai bekhan tsangkü napji ngüso thaiumei!

¹⁵Lüko noknio phiai noinso nung sauhai amei ainou tsümeikü nai laokü khuji naiuso alonga chhi chhiji, tsütsamtsütsüo, naiuso khaiunia luattsünso, sotsom amtsünso, naiuso atsüotsüdekün ngio nai chhitsünso noin.

¹⁶“Ngo, Yisuüh, donthe nouso thaiutha asam tü nungso ngio tsangshei kiuau, jü aünhong hongiu. Ngo David kaumong ainou nyimsan, Ngo ajetsün Ah-nge Nepoi Kianthsüo noin.”

¹⁷Onthso naiuso ajonlutsün tsammongnyiu nou ngioji, “Ashi!” Nung lulatsün khaiunia pungkü nou lüko ngioji, “Ashi!” Sauhai leji; Ashi, sauüh mongchioji, apaüh yaang paopei tsakli aa khiam lülo.

¹⁸Ngo, Yohanüh, nung thsam nai khapiam ngio lulatsünso khaiunia pungkü tü alotsüo lethsangkü ngioji: ajantsoüh nungso ngio nouko tso tsak hoilutnai, nung thsam nai satkü noitsün aluhat nouso Goa nou apa da hoilut kiu-e.

¹⁹Naiuso ajantsoüh nung thsam ainou khapiam ngio nouso tso tsak wannai, nung thsam nai satkü noitsün aa pai eiu naiuso asio noknio ainou Goa nou apa haoson wanne.

²⁰Sauüh nungso ngio mitha kiuji apaüh ngioji, “Ah, atsüoting! Ngo shakta shiji!” Amen, APAOU Yisu! Ashi!

²¹APAOU Yisu atsüojin asong asiohoi chikü ko lünoi. Amen.