Read Khiamniungan Naga Atsangshei 3 Bible Online

Atsangshei 3 - Khiamniungan Naga bible

Atsangshei 3

¹“Sardis nai noitsün donthe hong dongai nung lüsat: “Sauüh Goa Onthso chinyat naiuso kianthsüo chinyat taim apaüh nungso ngio ngioji. Achhi ngü ngen, ni nianautsolu aa noin, lüko ni ee noin!

²Nungtiphe ni lüthsümon, thumkü moeankün khako ni lo taiutsün lülomong. Tititenai jü Goa khako achhi thapemkü iulatsün loüh ngü ti tsüep.

³Naito ni hau titi tsande naiuso ti lula nung lü-ang, naiuso angei ainou mong lüphokle.Ni tsüthsümonkü naito, ngo adongai kaoli shi-e, naiuso tilai ngo shi-e nung atao ni tsünge-e.

⁴Lüko asam Sardis nai thsaothsaoküüh lu neshe yanthsüokü taiu-iu. Asam neshe athaiu tenkü ngoko tsakei-e, tiautenai nung chhiau asam tinkü noin.

⁵Sauüh shioji apa nungti sheitho athaiu nai tholo-i-e, naiuso ngü ngüso nian aa thsam ainou tsübeiane. Jüpo khako naiuso apa ün honghoi khako ngü ngüso ngü ün ta khakhakü thalou-e.

⁶“Donthe nouso tü Onthso nou ti ngioji, asam noukhan pokü noinaito nung lü-ang!

⁷“Philadelphia nai noitsün donthe hong dongai nung lüsat: “Sau Asio naiuso Ngiotsüo, sau pha nai David Bekhan kiaptsün taim, sauüh soppan nai nung sauüh akiapshiau tsüshio, naiuso kiapnai asopau tsüshioji, apaüh nungso ngio ngioji.

⁸Achhi ngü ngen, ni oukong intso noin, naiuso jüngio angkü kankei, naiuso jünian tsüthalukü tsünoi. Ngü akhako kuokhan tsak sauüh kiapau tsüshiotsün nung sopkü taim.

⁹Anglu! Biya ünhoi sauhaiüh meshen tü Yihudahai ta ngioji, lüko ngüso Yihudahai tsüde, lüko atsüotsüdekü chiteji, ngü ngüso akhako shikü amkhami-e. Nungko ngü ni tü tsüojinji ta ngüso apemüh nge-e.

¹⁰Tiautenai asamüh ngü thoiluttsün jeilukü taiuphe, ngü lüko goumchiai noitsün khaiunia chikü tü theluau sübao angja atao shiji nung ainou asam kipsankü taiu-e.

¹¹Ngo shakta shiji. Akandio sauühtso tsüluwanau thaiutha ni ti taim nung mongkü athalu.

¹²Sauüh shioji apa jü Goa amkham tsamai ngü kheam tsak hau shane, naiuso loto apa nung ainou tsüsoiane. Nungko jü Goa nian, naiuso jü aün Goa ainou saotsün noknio ayan Yirusalam nian naiuso jü nian ayan apa da satlut-e.

¹³Donthe nouso tü Onthso nou ti ngioji, asam noukhan pokü noinaito nung lü-ang!

¹⁴“Laodicea nai noitsün donthe hong dongai nung lüsat: “Sau, Amen, sau amonglamtsün, naiuso ngiotsüo atsangshei, sau Goa nou shantsün ayachu nou noin, apaüh nungso ngio ngioji.

¹⁵Ngü achhi ngen, ni atang lüko tsüde, alam lüko tsüde. Ni atang tsüdekünai alam theau ngü mongchioji!

¹⁶Lüko ni tanglamlamküphe, ngü jüson ainou phusanan-e!

¹⁷‘Ngo memei naiuso saiu-iu, ngü apotsün chikü taim,’ ta ni ngioji. Lüko ni titithatso aküothe naiuso atsüojinau lümeikü tsak noin nung ni tsünge! Ni tsosilu, tsosa, naiuso niopek noin!

¹⁸Ngü ni lotsüoji, ni memei iulaau thaiutha asangling chaiou, ngo ainou atuh. Naiuso ni tsosa noitsün amiam lopokkau thaiutha, ni achija shitho athaiu atholu, naiuso aniovei ai tsomau moushe ajantso atuh.

¹⁹Titithatso tü ngü tsüojinji, ngü ngüso tü thutji naiuso luhatji. Nungtiphe ni mongchiokü lüphokle.

²⁰Anglu! Ngo koukhan dongko tsaküta kou tü haiuji, ajantsoüh jüsangh lukü kou sopnai, ngo apa tsamai nappe, küta apako heshiu-e naiuso apa ngoko heshiu-e.

²¹Ngü ashio epküta jü Po ko apa nokpao noikham nai moknoiji, nungti sauüh shioji apa ngoko jü nokpao noikham nai moknoi-i-e.

²²“Donthe nouso tü Onthso nou ti ngioji, asam noukhan pokü noinaito nung lü-ang!”