Read Khiamniungan Naga Atsangshei 5 Bible Online

Atsangshei 5 - Khiamniungan Naga bible

Atsangshei 5

¹Nokpao noikham nai moknoitsün pha uai thsamlai tsak tü ii chinyat nou achiai si akheiai thanglutkü ngü ep.

²Naiuso ngü aünhong oukong tsaküh sangh asong nou, “Nung ii thanglutkü taiutsün thsamlai soppau maikü sau noin?” ta vetsün ngü ep.

³Aün nai, naiuso goum chinai, tsüdekünai goh kheiai nung thsamlai soppau naiuso thappau shiotsün sau tsünoiküla.

⁴Nung thsamlai soppau naiuso thappau shiotsün maikü sau tsünoiphe ngo thsüokü shap.

⁵Nungai petchehoi nouso ongko tsaküh ngo tü ngiom, “Lashapkü athaplu! David tü nyimsantsün asongting sau Yihuda ainou chongkhaum noin, apaüh nung ii chinyat thangtsün thsamlai soppau shio-iu.”

⁶Nungai nokpao noikham awem nouko si aa thainian püle, naiuso petche nousoüh lemjeikü ngü Onnemok Thso ep. Aluattsünli Onnemok Thso tsak ong chinyat naiuso niovei chinyat pokü tsakü, nungso goumchi apem dongai hongtsün Goa Onthso chinyat nouso ep.

⁷Onnemok Thso shi, naiuso nokpao noikham nai moknoitsün pha uai nou thsamlai lu.

⁸Apaüh nung thsamlai louküta, aa thainian püle naiuso petchehoi kheikü püle nousoüh Onnemok Thso khako kauthio. Ngüso pungkü kokiang tsaktsak, naiuso thangkoinek nou meankü noitsün thengkam tsaktsak taiuküla, nungso asiohoi misao lutsün noin.

⁹Ngüsoüh jih ayan tsak hangkü ngiom, “Thsamlai nou louau naiuso nung ii thangtsün soppau maikü ni noin. Tititenai ni loatkü noiküla, naiuso ni etsün chaithio tsangkü mele pungkü ainou khaiuniahoi, ngio pungkü, shingkhan pungkü, naiuso kau pungkü Goa hau tuhwaniu.

¹⁰Ni ngüso sam Goa yathsüoau mesonhoi nokshing shaniu, nungti ngüsoüh goumchi nai nokshing shinge.”

¹¹Loüh ngü thapnai, aünhong haove hengsiheng sangh ngü lula! Ngüso aa thainian püle, naiuso petchehoi nokpao noikham lemkü tsakü

¹²sangh asong nou jih hang: “Onnemok Thso sübao loat apa lu oukong, memei, mongthat mongsai, naiuso oukong, asuhat, ajinka, naiuso alomsan epau tinkü noin!”

¹³Naiuso ngü aün nai, goumchi nai, goh kheiai, sheasong kheiai, goumchiko noitsün thainian apem nou jih nungti hangkü lula: “Nokpao noikham nai mokkü noitsün naiuso Onnemok Thso hau, alomsan, asuhat, ajinka, naiuso oukong, athontsüyang lüthe!”

¹⁴Aa thainian püle nou thalan, “Amen!” Naiuso petchehoi kauthiokü amkham.