Read Khiamniungan Naga Atsangshei 6 Bible Online

Atsangshei 6 - Khiamniungan Naga bible

Atsangshei 6

¹Nai Onnemok Thso nou ii thangluttsün nouko aya nou soppan nou ngü ep, naiuso aa thainian püle nouso ongko tsaküh, “Ashi!” ta amok sanghli ngiokü ngü lula.

²Ngü thapnai, nungko mokthso athaiu tsak ep. Nung chiai moknoitsün pha nai uokop tsak noiküla, naiuso apa hau kandio tsak kiu. Apa ashiolutsün tsakli ashioluau tsalo.

³Nai Onnemok Thso nou ii thangluttsün nime nou sop, naiuso aa thainian nime nou, “Ashi!” ta ngiokü ngü lula.

⁴Nungai mokthso amao aseng leng tsak sungh. Nung chiai moknoitsün hau tsaksitsak he-elatikü goumchi nai ehli lusanau oukong kiu. Apa hau salaiu asong tsak kiu.

⁵Nai Onnemok Thso nou ii thangluttsün süme nou sopnai, aa thainian süme nou, “Ashi!” ta ngiokü ngü lula. Ngü thapnai nungko mokthso anya tsak noiküla. Nung chiai moknoitsün pha nai tsoithat nime semkü noiküla.

⁶Aa thainian püle ong ainou sungtsün sanghli, ngü angem tsak, “Nyitso mephaiu mai tsonyak tsoi tsak, naiuso nyitso mephaiu mai barli tso tsoi süme; lüko olip pai naiuso sainaoshep ai nouso lalothe!” ta ngiokü lula.

⁷Nai Onnemok Thso nou ii thangluttsün püle nou sopnai, aa thainian püle nou, “Ashi!” ta ngiotsün sangh ngü lula.

⁸Ngü thapnai nungko mokthso tsak hamlengli, nung chiai moknoitsün nian nou Ee, naiuso Ee-nok nung simkü hoilut ta ep. Ehli nai loatau, naiusile nou, akia nou, naiuso liu thainian nouso tsangkü luatau ngüso hau goumchi haoson püle nouko tsak khako oukong kiu.

⁹Nai Onnemok Thso nou ii thangluttsün püle nou sop. Nungko Goa Ngio naiuso ngüsoüh monglamkü chimtsün thaiutha sauhai luat, ngüso onthso amthang akheiai ngü ep.

¹⁰Ngüsoüh sangh asong nou wekü ngiom, “Akhengteng APAOU, asio naiuso ngiotsüo! Goumchiko noinso tü sam she thaiutha thamshiau ni tilektso tsangkü noi-e?”

¹¹Ngüso pungkü hau phakhut athaiu tsaktsak kiu, naiuso ngüso aikü yathsüotsünso naiuso ngüso deisinioso sauhai ngüsoli loat-e, nungso haove mothapungkün lektso ngüsoüh sakhalektso aaloukü noiau noin ta ngüso tü ngiom.

¹²Nai Onnemok Thso nou ii thangluttsün luok nou soptsün ngü ep. Nungko athsüoting gohhaiu tsak shin, naiuso aje nou ne anyali nyachingkü naiuso alei nou sheli sengkü iulan.

¹³Asheih athsüoting nou saiukei nai latshep mosemkünso pai ainou saliantsünli, kianthsüo nouso goumchi nai salian.

¹⁴Maou nou thsam laishiantsünli monlükhunan, naiuso king si khiamnok nouso apem momo anoithang ainou soikü khuwan.

¹⁵Nai goumchi nokpao-nokshing, atengting süpaihoi, memei naiuso oukong nouso, sua naiuso khaiuniatsüohoi apem, ngüso king, ken naiuso lung nouso suo ai pamlu.

¹⁶Ngüsoüh king si lung nouso tü ngiom, “Nokpao noikham nai moknoitsün si Onnemok Thso mongmat sungtsün ainou sam pamluau sam chiai asalut!

¹⁷Ngüso amongmat athsüoting sungtsün ajekhaiu shikü noin, nungthako sauüh tsakü noiau shio-e?”