Read Khiamniungan Naga Atsangshei 7 Bible Online

Atsangshei 7 - Khiamniungan Naga bible

Atsangshei 7

¹Nungphiai goumchi nai, khiamnok nai, tsüdekünai pai titatso ahsheih tsüsheiau thaiutha, goumchi ahsheih püle lolaokü, ano püle ai tsakü noitsün aünhonghoi püle ngü ep.

²Naiuso aa Goa ün ii thangluttsün kankü, ajepek ainou aünhong amao tsak sungtsün ngü ep. Nungko apaüh sangh asong nou goumchi naiuso khiamnok lutheau sauhai hau kiu, nung aünhonghoi püle nou vekü ngiom,

³“Samüh sam Goa yathsüotsünso khakheng nai ii mothanglutkün lektso, asamüh goumchi, khiamnok, tsüdekünai pai laluthe.”

⁴Nungaih sauhai khakheng nai Goa ün ii thanglutküla, nungso wenai haove 144, 000 noiküla ta ngü lula. Ngüso Israel kau chekü nime ainou noiküla.

⁵Nung Goa ün ii thangluttsünso Yihuda, Reuben, Gad, Asher, Napthali, Manase, Simeon, Levi, Isakar, Zebulun, Yosep, naiuso Benjamin kau chekü nime nouso pungkü ainou haove 12, 000 noiküla.

⁹Nungphiai ngü thaplunai, nungko haove tsüvekhemtsün hoi asong tsak noiküla, nungso sau khaiuniaüh vesanau tsüshio! Ngüso nung kau, shingkhan, mele, naiuso ngio pungkü ainou noiküla. Ngüso nung Nokpao noikham nai moknoitsün Onnemok Thso khako phakhut athaiu thoküta pha nai pengsha shemkü tsakü ngü ep.

¹⁰Ngüsoüh sangh asong nou, “Aasan nou Nokpao noikham nai moknoitsün sam Goa, naiuso Onnemok Thso ainou shiji!” ta wekü ngiom.

¹¹Nungko aa thainian püle, petchehoi nouso, naiuso aünhonghoi chikü, nokpao noikham lemkü tsakü noiküla. Nai ngüsoüh Nokpao noikham khako thaothiokü kaukü Goa tü amkü ngioji,

¹²“Amen! Alomsan, Ajinka, Mongthat mongsai, Nianlomkiu, Asuhat, Oukong, naiuso Akong, sam Goa thaiutha athontsüyang! lüthe! Amen!”

¹³Nungaih petchehoi ongko tsaküh ngo tü, “Nung phakhut athaiu thotsün khaiuniahoi sauhai, naiuso ngüso ti ainou shin?” ta sangh.

¹⁴“Ngü tsünge, APAOU, lüko Ni ngeji,” ta ngü thala. Apaüh ngo tü ngiom, “Nung khaiuniahoi nouso ajeiat asong yankü shitsünso noin. Ngüsoüh meshen shitho athaiu thotsün nung Onnemok Thso she nai phakhut phetankü noin.

¹⁵Nungshioko ngüsoüh Apa Amkham Tsamai Nokpao noikham khako tsakü asoh, anyi tsütukü amji. Nai Nokpao noikham nai moknoitsün nou ngüso kiplu-e.

¹⁶Ngüso loto tilaitso tsünaiu-e, tsüle-e, ngüso da aje jek tsüdekünai ajektsün titso tsüjelute,

¹⁷tiautenai Onnemok Thso, sau Nokpao noikham awem nai noin, apa ngüso jimtsün the-e, naiuso apaüh aa kiutsün khiamngan dongai nialokü khu-e. Naiuso Goa nou ngüso niovei ainou niochekhiam apem beiyankiu-e.”