Read Khiamniungan Naga Atsangshei 8 Bible Online

Atsangshei 8 - Khiamniungan Naga bible

Atsangshei 8

¹Tilai Onnemok Thso nou ii thangluttsün chinyat nou sop, nungko gontao apaitso aün nai ti tsüngemkü noiküla.

²Nai ngü honghoi chinyat Goa khako tsakü noitsün ep, naiuso ngüso hau jangong chinyat kiu.

³Thangkoinek jahtsün chiu sübao Chaiou nou shan nung semkü aünhong tsak amthang nai shikü tsa. Nungko Nokpao noikham khako noitsün Chaiou amthang chinai asiohoi misao nai luthiokiu au apa hau thangkoinek piakü kiu.

⁴Asiohoi misao nouko aünhong Goa khako tsakü noitsün pha ainou thangkoinek inkhao nou Goa dongai sungh.

⁵Nai aünhong nou thangkoinek jahtsün chiu luküta nungko amthang ainou in luthioküta goumchiai yakthio. Nungko amoksangh, ahsalap, naiuso gohhaiu shin.

⁶Nai jangong chinyat nou semtsün aünhong chinyat nou jangongmatau khemlou.

⁷Chongting aünhong nou apa jangong mat. Nungai goumchi nai san, in, she nouko lao-ekü saom. Goumchi haoson süme nouko tsak, khengliu alum naiuso aa chikü lahe-an.

⁸Nai aünhong nime nou apa jangong mat. Nai in nyaikü noitsün king asong tsakli tsotsak khiamnok nai sathiowan. Nungaih khiamnok haoson süme nouko haoson tsak she li sengkü iulawan,

⁹naiuso khiamnok nai noitsün aa thainian haoson süme nouko tsak ean, naiuso kheng haoson süme nouko tsak mowan.

¹⁰Nai aünhong süme nou apa jangong mat, Nungko tsonli nyaikü noitsün kianthsüo asong tsak maou ainou haiu haoson süme nouko tsak nou chiai naiuso khiamngan nouso chiai sali.

¹¹(Nung kianthsüo nian nou “Akhosak” ta noin.) Khiam haoson süme nouko tsak akhosak iulan naiuso nung khiam shiu nouso khaiunia piakü ean. Tiautenai nung khiam akhosak noiküla.

¹²Nai aünhong püle nou apa jangong mat. Nungso awon haoson süme nouko haoson tsak mowanau thaiutha, aje haoson süme nouko tsak, kianthsüo haoson süme nouko tsak, alei haoson süme nouko tsak, nungai ajekhaiu haoson süme nouko tsak, naiuso aso haoson süme nouko tsak anyakhem noiküla.

¹³Nai ngü thapnai, maou awem nai letche tsak jeikeikü sangh asong nou vetsün nungti lula, “O Inyate! Inyate! Amao aünhong süme nou jangong mattsün ngem lunai sauhai goumchi nai noin nungso thaiutha angja omhe titithatso noili-e!”