Read Khiamniungan Naga Atsangshei 9 Bible Online

Atsangshei 9 - Khiamniungan Naga bible

Atsangshei 9

¹Nai aünhong pungo nou apa jangong mat. Nungko maou ainou goumchi ai kianthsüo tsak salitsün ngü ep, naiuso athantsüyangkün khan bekhan kiap nou apa hau kiu.

²Kianthsüo nou nung athantsüyangkün bekhan sopnai khan ainou innyai asong inkhaoli sungh, naiuso nung inkhao nou aje, maou, nyakhemkü iula-in.

³Inkhao ainou jongku nouso goumchiai sungh, küta mekhakhanio oukongko wekü ngüso hau oukong kiu.

⁴Ngüso tü goumchi paisam aosam ti tsülotheau ngiom, lüko sauhai khakheng nai Goa nou ii thangluttsün tsünoi nungso tawaiau ngüso tü ngiom.

⁵Jongku nouso hau nung khaiunia nouso loatau tsükiu, lüko ngüso alei pungo thaiutha jeiat-iau kium. Ngüso angja-itsün nung mekhakhanio nou jei nai kiatsünli noiküla.

⁶Nungso alei pungo taoko eantsün yame lüko nung tsüeppe, ngüsoüh eanau aiu-e, lüko eantsün ngüso ainou soikü khuwane.

⁷Nung jongku athapau ehliau khemloutsün mokthsoli, ngüso khaiu nai chaiou kandio khekkü, naiuso ngüso kha khaiunia kha khekkü noiküla.

⁸Ngüso khaiuo nyiuhai khaiuoli, naiuso ngüso hou chongkhaonio hou li noiküla.

⁹Ngüso kong athapau son kongwoi nou kepoktsünli, naiuso ngüso ekuk ngem ehlitsün nai kopkü khutsün mokthso tsamkei piakü ngemli noiküla.

¹⁰Mekhakhanio nousoli ngüso da ami, naiuso alei pungo jeiatiau nou ngüso oukong ami nai noiküla.

¹¹Ngüso chiai nokpao tsak nou athantsüyangkün khako hong asong tsak nou noiküla. Apa nian Ibri ngio nai Abadon, naiuso Grik ngio nai Apolion (athat “Alotheantsün”) ta noin.

¹²Nung chongting Inyate nou yanlükhuniu; loüh Inyate nime nou shishiau noin.

¹³Nai aünhong luok nou apa jangong mat. Goa khako tsakü chaiou amthang anu püle ainou shitsün sangh tsak ngü lula;

¹⁴Aünhong luok nou tü sangh tsak nou ngiom, “Eufrates Haiu asong nai kekü taiutsün aünhong püle nouso lüsokkan!”

¹⁵Aünhong püle nouso sokkan; nung gontao, ajekhaiu, alei, naiuso ponkolu khaiunia haoson süme nouko haoson tsak luatau khemlu-iu.

¹⁶Ngü mokthso chiai moknoitsün akonghoi haove lula; nung haove nai million tsom nime noiküla.

¹⁷Naiuso atsangshei nai ngü mokthso chiai moknoitsünso ep; ngüso sonkongwoi inli aseng, sapphire lengli asangnya, naiuso sulphur lengli noiküla. Nung mokthso khaiu nouso chongkhaonio khaiuli; ngüso son ainou in, inkhao naiuso taoson leng sungh, nungso süme alohat tsangkü khaiunia haoson süme nouko haoson tsak loat.

¹⁸Mokthso son ainou sungtsün inkhao naiuso taoson leng nungso süme alohat tsangkü khaiunia haoson süme nouko haoson tsak loat.

¹⁹Tititenai mokthso nouso oukong ngüso son nai naiuso ami nai noiküla. Ngüso ami nung pao khekkü, akhaiu pokü, nungüh khaiunia tawaiau kankei.

²⁰Khaiunia apoi nouso sauhai nungso alohat tsangkü tsüloat, ngüso chija shantsün ainou mong tsüphokle. Ngüsoüh atsakeiau, athapluau, tsüdekünai alulaau tsüshiokün angei onthso nouso sübao chaiou nou shantsün sotsom amkhamtsün, tangkason, taosonlung naiuso pai nungso ainou ngüso tsülao.

²¹Tsüdekünai ngüso khaiunia loattsün, alonga chhitsün, tsütsamtsütsüo, kau, nungso ainou lüko mong tsüphokle.