Read Khiamniungan Naga Ruth 3 Bible Online

Ruth 3 - Khiamniungan Naga bible

Ruth 3

¹Atao intso noiküta Naomiüh Ruth tü ngiom, “Ni atsamsigoh ta kih ao ngo ni hau tsammongpo tsak yamkiuao noin.

²Sauüh nyiuhoi ko aikü ni chhikü noiküla, nung khaiunia Boaz lüyangshi, apa sam tsammong noin. Lo, anglu, lüsoh asham apaüh jinyak nou nya-e.

³Nungtiphe ni khiam lüpengan, angan nyamtsün moushe intso lütsom, küta aneshe ameiting nouso lütholo. Naiuso apaüh jinyak tiai nyaji nungai lükhu, lüko apaüh moheshiukhemkün khako ni nungai noin ta apa hau lange-i.

⁴Apa tiai saiji nung meikü lüngetaiu, naiuso apa sailaküta khukü apa tenpoktaiu nou lülowan küta apa hok dongai lüsai.Ni ti chhiao noin nung apaüh ni tü ngio-e.”

⁵Ruthüh thalakü ngiom, “Ni ngiotsün alum ngo chhi-e.”

⁶Nungtiphe Ruth jinyak nyatsün athang nai khuküta apa tü apa nyaiüh ti ngiom, nung khekkü chhin.

⁷Tilai Boazüh heshiutsün khem, apa monglingkü noiküla. Apa jinyak kamtaiutsün nai khuküta nungai sailakü saian. Ruth nyankü khuküta, ne nou lekkan küta apa hok dongko saikü noiküla.

⁸Asoh Boaz alekta chunge nai, apa hok dongko nyiuhai tsak saikü epsan.

⁹Boazüh sangkü ngiom, “Ni sau?” Nungai apaüh thalakü ngiom, “Ngo Ruth noin APAOU,” “tiautenai ni tsammong ting tsakphe, ngo paotsangao thaiutha athsale noin. Nungtiphe tsüojinyangkü ni ngo tsamsigoh ayang.”

¹⁰Apaüh ngiom, “APAOU nou ouk kiu.” “Ni anyai thaiutha ti chhikü shin nungko naito ni lo ti in chhiji nungbao tsammong ngiotsüo asong hanji. Ni memei tsüdekünai tsosilu oum khaiunia tsak tü yamkü khuau noiküla, lüko ni nung tsüchhi.

¹¹Nungtiphe loto layangelat Ruth, ni sangtsün alum ngo chhi-e, noksong nai noitsün khaiunia apemüh ni nyiuhai amei tsak noin ta ngeji.

¹²Ngo ashimting tsammong tsak naiuso athaiutha jü thsale noin ta nung atsüo noin, lüko ngüko nai tekkü shimkü noitsün khaiunia tsak noin.

¹³Lüsoh to nungko athangean, küta ahom samüh athaiutha thsale lou-e süne tsülou-e nung nge-e. Nung loukiu naito, thatü mei, tsüloukiukü naito, ngo thsale lou-e ta aa noitsün APAOU nianko ngiomong shingekü ngioji. Loto nungko ahom tü thalutkü lüsaian.”

¹⁴Nungtiphe apa nungai Boaz hok dongko sai, lüko apa ashiochan chu, tiautenai apa nungai noiküla ta Boazüh khaiunia sauhau nge-iao tsü- mongchio.

¹⁵Boazüh apa tü ngiom, “Anehong angiosan küta nungko asapeng.” Apaüh nung sapeng, naiuso apaüh nungko jinyak nou tsoi khei thatso khaiukiu küta apa sangdongkhaiu ai loklut kiukü hachu. Nung kankü noksong nai apa laokü ya.

¹⁶Tilai apa tsamai yasaom, apa nyaiüh apa tü sangkü ngiom, “Jü le-oh, ni titila?” Ruthüh apa thaiutha Boazüh chhitsün alum apa nyai hau chiten.

¹⁷Apaüh ngioshin, “Apaüh ngo adongai phakengto laokü tsüya ao noin ta ngiom, nungtiphe apaüh ngü hau jinyak nung kium.”

¹⁸Naomiüh apa tü ngiom, “Ruth, loto ni moshi- thawaokün lektso ti shithawao-e nungtü thapkü mongaulaiukü anoi. Nung chhisiya mothakhemkiukün lektso lonyi Boaz mong aalo tsünoi-e.”