Read Khiamniungan Naga Ruth 4 Bible Online

Ruth 4 - Khiamniungan Naga bible

Ruth 4

¹Boazüh noksong bekhan hoikam athang nai khuküta nungai moknoi. Nungai Elimelek ün tsammong ashimting khaiunia sau thaiutha Boazüh chitekü noiküla, nung khaiunia nou shin, naiuso Boazüh apa tü “Jühai, nungai ashi noi, ta jonkü noiküla. Nungtiphe apa nungai sungküta moknoi.”

²Nungai Boazüh noksong nai noitsün aheihoi khaiunia che tü nungai noiha ao sangkü, tilai ngüso nungko mokkü noiküla,

³apaüh apa tsammong nou tü ngiom, “Lo Naomi Moab ainou laokü shikü noin, apaüh sam tsammong Elimelek ün eiu janao aiuji,

⁴naiuso ngo yangji asamüh nung thaiutha to ngeao aiukü noi-e. Nungtiphe ni nung aiu naito, nungko moknoitsün khaiuniahoi khako nung atuhlo. Tiautenai nung tuhloau ayam ayating nai athaiu noin küta, nungphiailu jüthaiu noi-e. Lüko ni nung tuh ao tsüaiu naito, ngo tuh-e ta angiolu.” Nung khaiunia nou ngiom, “Ngo nung tuh-e.”

⁵Boazüh ngiom, “Thatü mei, lüko ni nung eiu Naomi ainou tuh naito, nungaito ni Moab hai nou jihinyiu Ruth lüko tuhloji, nungailu nung eiu nou ean khaiunia tsamkhaiu ün noi-e.”

⁶Nung khaiunia nou ngiom, “Aküo nou nungti tünaito, nung eiu tuh ao noitsün ainou ngo bao laolowane, tiautenai nung jü thsosoüh teng tsükame ta ngiotsün noin. Ngo bao tsütuh-e, nung ni lütuh.”

⁷Penaito, jengtsaiu ajantsün si ehe-etsün yamko atsamloau nai jeng- tsaiu jantsün khaiunia nou atuhlo- tsün khaiunia hau apa hokkhut ngiosan küta kiukiukü Israel hai saisile noiküla. Nungli Israel haiüh atsamlotsün yamko kankeikü shitsün hankü noiküla.

⁸Nungtiphe tilai nung khaiunia nou Boaz tü “Nung eiu nou ni lütuh,” ta ngiom, apaüh apa hokkhut ngiosan küta nung Boaz hau kiu.

⁹Nungai Boazüh aheihoi naiuso amao khaiunia nungai noitsünso tü ngiom, “Elimelek naiuso apa thsoso Kelon si Malon ne thaiu nou alum Naomi ainou ngo tuhji ta asam apem lonyi mitha noin.

¹⁰Nungko hakü Malon ün jihinyiu, Moab hai nou Ruth, jü tsammongnyiu iulaji. Nungüh ean khaiunia tsammong ün jengtsaiu ta taiu-e, naiuso apa khaiuniaso si noksong nai apa tsamkhaiu tsülomokü noi-e. Nung thaiutha lonyi asam mitha noin.”

¹¹Aheihoi naiuso amao nousoüh ngiom, “Ah, sam mitha nouso noin. APAOU nou atsammongnyiu Yakob hau thsoso piakü chetkiutsün Rachel si Lea ne khekkü lünoi-i. Efrat kau nai memei naiuso Betlehem nai nian- song khaiunia tsak lü-iula.

¹²Nung meso nou tsangkü atsamkhaiu Yihuda naiuso Tamar thso, Perez tsamkhaiu khekkü, APAOU nou ni hau thsoso lükiu.”

¹³Nungtiphe Boazüh Ruth apa tsammongnyiu au theao tsamai nialokü khu. APAOU nou apa oukkiu, apa pem tsükengkü iula küta melothso tsak chetkiu.

¹⁴Menyiuhoi nousoüh Naomi tü ngiom, “APAOU Lülom! Apaüh lonyi ni paotsangao thsao melothso tsak ni hau kiu-iu. Nung melothso Israel nai niansong lüiula!

¹⁵Ale-oh ni tü tsüojinji, küta melothso chinyat chiai athaiutha thsüokü chhikiu-iu. Naiuso lo apaüh ni hau thsao melothso tsak chetkiu-iu, apaüh adongai ayang ayan kankü shi-e, naiuso ni ason yamai apaüh ni hau aalo nou kiu-e.”

¹⁶Naomiüh methso nou loklo, küta apa tü paotsanglokü tsadlo.

¹⁷Phaosipo menyiuhoi nousoüh nung melothso nou Obed ta niankiu. “Naomi tü melothso tsak chetlutkiu!” ta ngüsoüh khaiunia pungkü hau chite. Obed nung Jese po iula, Jese nung David po noiküla.

¹⁸Lo, nungso Perez ainnou chetsinyimsantsünso noin: Perez tü Hezron nyimsan, Hezron tü Ram nyimsan, naiuso Ram tü Aminadab nyimsan, Aminadab tü Nashon nyimsan, naiuso Nashon tü Salmon nyimsan; Salmon tü Boaz nyimsan, naiuso Boaz tü Obed nyimsan, naiuso Obed tü Jese nyimsan, naiuso Jese tü David nyimsan.